ନୂଆଦିଲ୍ଲୀ,୨୩/୦୮: ଏକ ଅସାଧାରଣ ମାମଲା ପାଇଁ ଆଲୋଚନାର ବିଷୟ ହୋଇଛି ଅଷ୍ଟ୍ରିଆ । ଏହାକୁ ନେଇ ଦେଶରେ ବିତର୍କ ମଧ୍ୟ ଆରମ୍ଭ ହୋଇଛି । ୨୯ ବର୍ଷୀୟ ଜଣେ କଏଦୀଙ୍କୁ ନେଇ ବିବାଦ, ଯାହାଙ୍କ ଓଜନ ହାରାହାରି ୩୦୦ କିଲୋ । ତାଙ୍କ ଖାଦ୍ୟପେୟରେ ଜଣେ ହାରାହାରି କଏଦୀଙ୍କ ଖର୍ଚ୍ଚଠୁ ୧୦ ଗୁଣ ଅଧିକ ଅର୍ଥ ଖର୍ଚ୍ଚ ହେଉଛି । ଏହି ଓଜନଦାର କଏଦୀଙ୍କ ଉପରେ ଖର୍ଚ୍ଚକୁ ଦେଶବାସୀ ସମାଲୋଚନା କରୁଛନ୍ତି । ଡ୍ରଗ୍ସ ଚୋରାଚାଲାଣ ମାମଲାରେ ଦୋଷୀ ସାବ୍ୟସ୍ତ ଜଣେ କଏଦୀଙ୍କ ଉପରେ ଦେଶର କରଦାତାଙ୍କର ଅର୍ଥ କାହିଁକି ଖର୍ଚ୍ଚ ହେଉଛି ବୋଲି ଲୋକେ ପ୍ରଶ୍ନ କରିଛନ୍ତି ।
ଗଣମାଧ୍ୟମ ଅନୁସାରେ, ତାଙ୍କ ପାଖରୁ ୪୫ କିଲୋ ଗଞ୍ଜେଇ, ୨ କିଲୋ କୋକେନ, ପ୍ରାୟ ୨ କିଲୋ ଆମ୍ପେଟାମାଇନ୍ ଏବଂ ୨୦୦୦ରୁ ଅଧିକ ଅବୈଧ ବଟିକା ମିଳିବା ପରେ ପୁଲିସ ତାଙ୍କୁ ଗିରଫ କରିଥିଲା । ପ୍ରଥମେ ତାଙ୍କୁ ଭିଏନାର ଜୋସେଫ୍ଷ୍ଟାଡ୍ଟ ଜେଲ୍ରେ ରଖାଯାଇଥିଲା । ଅତ୍ୟଧିକ ଓଜନ ଯୋଗୁ ତାଙ୍କ ଖଟ ଦବିଯିବାରୁ ତାଙ୍କୁ ସେଠାରୁ ସ୍ଥାନାନ୍ତର କରାଯାଇ କୋରନିଉବର୍ଗ ଜେଲରେ ରଖାଗଲା । ଜେଲରେ ତାଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଖାସ୍ ତାଙ୍କ ପାଇଁ ସ୍ୱତନ୍ତ୍ର ରୂପେ ଏକ ଖଟ ନିର୍ମିତ ହୋଇଛି । ବାହାର ନର୍ସ ୨୪ ଘଣ୍ଟା ତାଙ୍କ ସ୍ୱାସ୍ଥ୍ୟର ଯତ୍ନ ନେଉଛନ୍ତି । ରିପୋର୍ଟ ଅନୁସାରେ, ଦିନକୁ ତାଙ୍କ ପିଛା ୧.୬ ଲକ୍ଷ ଟଙ୍କା ଖର୍ଚ୍ଚ ହେଉଛି । ଅନ୍ୟପକ୍ଷେ, ଜଣେ ସାଧାରଣ କଏଦୀ ପାଇଁ ଦିନକୁ ୬ ହଜାର ଟଙ୍କା ଖର୍ଚ୍ଚ ହେଉଛି । ତାଙ୍କ ପାଇଁ ହେଉଥିବା ଖର୍ଚ୍ଚ ସାଧାରଣ ଲୋକଙ୍କ ଆକ୍ରୋଶ ବଢ଼ାଇଛି । ଲୋକେ କହୁଛନ୍ତି, ଡାକ୍ତରଙ୍କ ପରାମର୍ଶ ପାଇଁ ଜଣେ ସାଧାରଣ ବ୍ୟକ୍ତିକୁ ମାସ ମାସ ଅପେକ୍ଷା କରିବାକୁ ପଡୁଛି । କିନ୍ତୁ ଜଣେ ଜଘନ୍ୟ ଅପରାଧୀ ପାଇଁ ବିପୁଳ ପରିମାଣରେ ଅର୍ଥ ଖର୍ଚ୍ଚ କରିବା ଲୋକଙ୍କ ପାଇଁ ଚିନ୍ତାର ବିଷୟ ହୋଇଛି ।
