ନୂଆଦିଲ୍ଲୀ: ଚେସ୍ ଦୁନିଆର ନୂଆ ବାଦଶାହ ଭାରତର ଡି. ଗୁକେଶ । ସେ ସର୍ବକନିଷ୍ଠ ବିଶ୍ବ ଚେସ୍ ଚାମ୍ପିଅନ୍ ହେବାର ସୌଭାଗ୍ୟ ଅର୍ଜନ କରିଛନ୍ତି । ଚୀନ୍ର ଚେସ୍ ସାମ୍ରାଜ୍ୟକୁ ଧ୍ବସ୍ତ କରି ବିଶ୍ବ ବିଜେତା ହୋଇଛନ୍ତି ୧୮ ବର୍ଷୀୟ ଗୁକେଶ । ଡିଫେଣ୍ଡିଂ ଚାମ୍ପିଅନଙ୍କୁ ହରାଇ ଗୁକେଶ ଇତିହାସ ରଚିଛନ୍ତି ।
ବିଶ୍ବ ଚେସ୍ ଚାମ୍ପିଅନସିପ୍ ୨୦୨୪ର ଫାଇନାଲ୍ ମୁକାବିଲା ସିଙ୍ଗାପୁରରେ ଖେଳାଯାଇଥିଲା । ଏହି ମୁକାବିଲାରେ ଡି.ଗୁକେଶଙ୍କ ଟକ୍କର ଡିଫେଣ୍ଡିଂ ଚାମ୍ପିଅନ୍ ଏବଂ ଚୀନ୍ର ଚେସ୍ ମାଷ୍ଟର ଡିଙ୍ଗ ଲିରେନ୍ଙ୍କ ସହ ହୋଇଥିଲା । ଫାଇନାଲ୍ର ୧୪ ତମ ରାଉଣ୍ଡରେ ଲିରେନଙ୍କୁ ମାତ୍ ଦେଇ ୧୮ ତମ ବିଶ୍ବ ଚେସ୍ ଚାମ୍ପିଅନ୍ ହୋଇପାରିଛନ୍ତି ଭାରତୀୟ ଗ୍ରାଣ୍ଡମାଷ୍ଟର ଗୁକେଶ ।
କିମ୍ବଦନ୍ତୀ ଚେସ୍ ପ୍ଲେୟାର ବିଶ୍ବନାଥନ ଆନନ୍ଦଙ୍କ ପରେ ଦ୍ବିତୀୟ ଭାରତୀୟ ଭାବରେ ଏହି ଉପଲବ୍ଧି ହାସଲ କରିଛନ୍ତି ଡୋମାରାଜୁ ଗୁକେଶ । ଫାଇନାଲ୍ର ୧୪ ତମ ରାଉଣ୍ଡ ଏବଂ ୫୮ ତମ ମୋଭ୍ରେ ଚୀନ୍ ଖେଳାଳିଙ୍କ ବଡ଼ ଭୁଲ୍ ଗୁକେଶଙ୍କ ପାଇଁ ଆଣିଦେଇଛି ବୃହତ୍ତ ବିଜୟ । ତେବେ ଚୀନ୍ର ଡିଙ୍ଗ ଲିରେନ୍ ଏବଂ ଗୁକେଶ ଉଭୟ ୬.୫ ପଏଣ୍ଟ ସହ ଫାଇନାଲ୍ର ୧୪ ତମ ରାଉଣ୍ଡରେ ପ୍ରବେଶ କରିଥିଲେ ।
Historic and exemplary!
— Narendra Modi (@narendramodi) December 12, 2024
Congratulations to Gukesh D on his remarkable accomplishment. This is the result of his unparalleled talent, hard work and unwavering determination.
His triumph has not only etched his name in the annals of chess history but has also inspired millions… https://t.co/fOqqPZLQlr pic.twitter.com/Xa1kPaiHdg
ଗୁକେଶଙ୍କ ଐତିହାସିକ ବିଜୟ ପରେ ତାଙ୍କୁ ଶୁଭେଚ୍ଛାର ସୁଅ ଛୁଟିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ଟ୍ବିଟ୍ କରି ଗୁକେଶଙ୍କୁ ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ ମୋଦୀ ଲେଖିଛନ୍ତି, ‘ ଐତିହାସିକ ଓ ଅନୁକରଣୀୟ । ଗୁକେଶଙ୍କ ଏହି ବିଶାଳ ଉପଲବ୍ଧି ପାଇଁ ତାଙ୍କୁ ବହୁତ ଶୁଭେଚ୍ଛା । ଏହା ପ୍ରତିଭା, ପ୍ରତିବଦ୍ଧତା ଏବଂ କଠିନ ପରିଶ୍ରମର ପରିଣାମ । ତାଙ୍କର ଏହି ବିଜୟ କେବଳ ବିଶ୍ବ ଚେସ୍ ଇତିହାସରେ ତାଙ୍କର ନାଁ ସାମିଲ କରିଛି ତାନୁହେଁ ବରଂ ଲକ୍ଷ ଲକ୍ଷ ଯୁବକଙ୍କୁ ସ୍ବପ୍ନ ଦେଖିବାକୁ ପ୍ରେରଣା ଦେବ । ଆଗାମୀ ଟୁର୍ଣ୍ଣାମେଣ୍ଟ ଲାଗି ଶୁଭକାମନା ।’
