ଦୁବାଇ,୦୯/୧୦: ଚଳିତ ମହିଳା ଟି-ଟ୍ୱେଣ୍ଟି ବିଶ୍ୱକପ୍ରେ ବୁଧବାର ଭାରତ ଓ ଶ୍ରୀଲଙ୍କା ପରସ୍ପରକୁ ଭେଟିବାକୁ ଯାଉଛନ୍ତି । ଗତ ଏସିଆ କପ୍ ଫାଇନାଲ୍ ପରାଜୟର ପ୍ରତିଶୋଧ ନେବା ପାଇଁ ଭାରତ ପ୍ରସ୍ତୁତ ରହିଛି । ଶ୍ରୀଲଙ୍କା ମଧ୍ୟ ଟକ୍କର ଦେବାକୁ ଅପେକ୍ଷା କରିଛି । ଉଭୟ ଦଳ ପାଇଁ ମ୍ୟାଚ୍ଟି ବେଶ୍ ଗୁରୁତ୍ୱପୂର୍ଣ୍ଣ ହୋଇଯାଇଛି ।
ଭାରତ ପ୍ରଥମ ମ୍ୟାଚ୍ରେ ନ୍ୟୁଜିଲାଣ୍ଡ ଠାରୁ ପରାଜିତ ହେବା ପରେ ଦ୍ୱିତୀୟ ମ୍ୟାଚ୍ରେ ପାକିସ୍ତାନକୁ ହରାଇଥିଲା । ଶ୍ରୀଲଙ୍କା ୨ଟି ଯାକ ମ୍ୟାଚ୍ରେ ଯଥାକ୍ରମେ ପାକିସ୍ତାନ ଓ ଅଷ୍ଟ୍ରେଲିଆ ଠାରୁ ପରାଜିତ ହୋଇଛି । ପଏଣ୍ଟ ତାଲିକାରେ ଭାରତ ଚତୁର୍ଥ ଓ ଶ୍ରୀଲଙ୍କା ପଞ୍ଚମ ସ୍ଥାନରେ ରହିଛନ୍ତି । ଫର୍ମାଟ୍ ଅନୁଯାୟୀ ଉଭୟ ଗ୍ରୁପ୍ର ଶ୍ରେଷ୍ଠ ୨ଦଳ ସେମି ଫାଇନାଲ୍କୁ ଯୋଗ୍ୟତା ଅର୍ଜନ କରିବେ । ତେଣୁ ମ୍ୟାଚ୍ଟି ଉଭୟ ଦଳ ପାଇଁ ‘କର ବା ମର’ ପରିସ୍ଥିତି ସୃଷ୍ଟି କରିଛି ।
ଭାରତୀୟ ଦଳରେ ବହୁ ତାରକା ବ୍ୟାଟର ରହିଥିଲେ ହେଁ କେହି ଏପର୍ଯ୍ୟନ୍ତ ଦକ୍ଷତା ଦେଖାଇ ନାହାନ୍ତି । ତେଣୁ ଶ୍ରୀଲଙ୍କା ବିପକ୍ଷରେ ସ୍ମୃତି ମନ୍ଧନା ଓ ଶେଫାଳି ବର୍ମା ଫର୍ମକୁ ଫେରିବାକୁ ପ୍ରୟାସ କରିବେ ।
ଭାରତୀୟ ଦଳ: ଶେଫାଳି ବର୍ମା, ସ୍ମୃତି ମନ୍ଧନା, ଜେମିମା ରୋଡ୍ରିଗ୍ସ, ହର୍ମନପ୍ରୀତ କୌର (ଅଧିନାୟିକା), ରିଚା ଘୋଷ, ଦୀପ୍ତି ଶର୍ମା, ସଜୀବନ ସଜନା, ଅରୁନ୍ଧତୀ ରେଡ୍ଡୀ, ଶ୍ରେୟଙ୍କା ପାଟିଲ, ଆଶା ଶୋଭନା, ରେଣୁକା ସିଂହ ।
ଶ୍ରୀଲଙ୍କା ଦଳ: ଭିଷ୍ମୀ ଗୁଣରତ୍ନେ, ଚାମରି ଆଟାପଟୁ (ଅଧିନାୟିକା), ଏ ହର୍ଷିତା ସମରବିକ୍ରମା, କବିଶା ଦିଲହାରୀ, ନୀଳକ୍ଷୀକା ସିଲଭା, ହାସିନି ପେରେରା, ଅନୁଷ୍କା ସଞ୍ଜିବନୀ, ସୁଗନ୍ଧିକା କୁମାରୀ, ଇନୋଶି ପ୍ରିୟଦର୍ଶିନୀ, ଉଦେଶିକା ପ୍ରବୋଧିନି, ଇନୋକା ରଣବୀରା ।
