ଝାରସୁଗୁଡ଼ା/ଜାମଗାଁ,୧୬/୦୭: କ୍ୟାନସର୍ ଆକ୍ରାନ୍ତ ସ୍ୱାମୀଙ୍କ ମୃତ୍ୟୁ ବେଦନା ଥିଲା ଅସହ୍ୟ । ସକାଳେ ସ୍ୱାମୀଙ୍କ ମୃତ୍ୟୁ ପରେ ରହସ୍ୟମୟ ଭାବେ ନିଖୋଜ ହୋଇଗଲେ ପତ୍ନୀ । ଆଉ ଶେଷରେ ରାତିରେ ମିଳିଛି ତାଙ୍କର ଶାଢ଼ି, ଚପଲ ଏବଂ ଚଷମା । ସନ୍ଧ୍ୟାରେ ପତିଙ୍କ ଜୁଇ ଜଳିବା ପରେ ଘରୁ ବାହାରି ଯାଇଥିବା ପତ୍ନୀ ସ୍ୱାମୀଙ୍କ ଚିତାରେ ଝାସ ଦେଇ ପ୍ରାଣ ହାରିଥିବା ଅନୁମାନ କରାଯାଉଛି । ଏଭଳି ଅବିଶ୍ୱସନୀୟ ଘଟଣା ଝାରସୁଗୁଡ଼ା ଜିଲ୍ଲା ସୀମାବର୍ତ୍ତୀ ଛତିଶଗଡ଼ର ରାୟଗଡ଼ ଜିଲ୍ଲା ଅନ୍ତର୍ଗତ ଚିଟ୍କାକାନି ଗ୍ରାମରେ ଚର୍ଚ୍ଚାର ବିଷୟ ପାଲଟିଛି ।
ରାୟଗଡ଼ ଜିଲ୍ଲା ଅନ୍ତର୍ଗତ ଚକ୍ରଧରନଗର ଥାନାର ଚିଟ୍କାକାନି ଗ୍ରାମରେ ସପରିବାର ରୁହନ୍ତି ଜୟଦେବ ଗୁପ୍ତା (୫୯) । କର୍କଟ ଆକ୍ରାନ୍ତ ଜୟଦେବ ୧୦ ବର୍ଷ ହେଲା ଚିକିତ୍ସିତ ହେଉଥିଲେ । କ୍ୟାନସର୍ ସହ ଲଢ଼ି ଜୀବନ ବଞ୍ଚାଇବା ପାଇଁ ତାଙ୍କର ସଂଗ୍ରାମ ଜାରି ରହିଥିଲା ।ମାତ୍ର ଶେଷରେ ସେ ହାର ମାନିଥିଲେ । ଗତ ରବିବାର ସକାଳେ ତାଙ୍କର ମୃତ୍ୟୁ ହୋଇଯାଇଥିଲା । ଅପରାହ୍ନ ୫ଟାରେ ପରିବାର ଲୋକେ ଏବଂ ଆତ୍ମୀୟସ୍ୱଜନ ଜୟଦେବଙ୍କ ଶବ ସତ୍କାର କରିବାକୁ ଶ୍ମଶାନକୁ ଯାଇ ଦୁଇ ଘଣ୍ଟା ପରେ ଫେରିଥିଲେ । ରାତି ପ୍ରାୟ ୧୧ଟାରେ ମୃତକଙ୍କ ପୁଅ ସୁଶୀଳ ମା' ଗୁଲାପୀ ବାଈଙ୍କ ସହ କୌଣସି ବିଷୟରେ କଥା ହେବାକୁ ଚାହିଁଥିଲେ । ହେଲେ ଗୁଲାପୀଙ୍କ କୌଣସି ଖୋଜଖବର ମିଳି ନ ଥିଲା। ପରିବାର ସଦସ୍ୟ ଗ୍ରାମବାସୀଙ୍କ ସହାୟତାରେ ଖୋଜାଖୋଜି କରି ଜୟଦେବଙ୍କ ଜୁଇ ଜଳୁଥିବା ସ୍ଥାନରେ ପହଞ୍ଚିଥିଲେ । ସେଠାରେ ଯାହା ଦୃଶ୍ୟ ଦେଖିଥିଲେ ତାହା ସେମାନଙ୍କୁ ହତବାକ୍ କରି ଦେଇଥିଲା । ଚିତା ଜଳିଥିବା ସ୍ଥାନକୁ ଲାଗି ତଳେ ପଡ଼ି ରହିଥିଲା ଗୁଲାପୀଙ୍କ ଶାଢ଼ି, ଚପଲ ଏବଂ ଚଷମା । ମାତ୍ର ଆଖାପାଖରେ କେଉଁଠି ବି ଗୁଲାପୀ ନ ଥିଲେ । ଗୁଲାପୀ ସ୍ୱାମୀଙ୍କ ଚିତାରେ ଝାସ ଦେଇଥିବା ଜାଣି ପାରି ପରିବାର ସଦସ୍ୟ, ଆତ୍ମୀୟସ୍ୱଜନ ମଶାଣିରୁ ଫେରିଥିଲେ । ସ୍ୱାମୀଙ୍କୁ ହରାଇବାର ଦୁଃଖ ଜଣେ ପତ୍ନୀଙ୍କୁ ଏଭଳି ଏକ ଚରମ ନିଷ୍ପତ୍ତି ନେବାକୁ ବାଧ୍ୟ କରିବ ଏକଥା ଅବିଶ୍ୱସନୀୟ ହେଲେ ବି ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ଅନ୍ୟପଟେ ଘଟଣା ସମ୍ପର୍କରେ ଥାନାକୁ ଜଣାଇବା ପରେ ପୁଲିସ୍ ପ୍ରାଥମିକ ଭାବେ ଏକ ନିଖୋଜ ମାମଲା ରୁଜୁ କରିଛି । ଛତିଶଗଡ଼ ରାୟଗଡ଼ ଏସ୍ପି ଦିବ୍ୟାଙ୍ଗ ପଟେଲଙ୍କ ନିର୍ଦ୍ଦେଶ କ୍ରମେ ଚକ୍ରଧରନଗର ପୁଲିସ୍ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
