ଭୁବନେଶ୍ୱର, ୨୯/୦୩: ଲଗେଜରେ ଭର୍ତ୍ତି କରି ବ୍ୟାଙ୍କକ୍ରୁ ଭୁବନେଶ୍ୱରକୁ ବିଭିନ୍ନ ପ୍ରକାରର ବଣ୍ୟଜନ୍ତୁ ଆଣିଥିଲେ ଯୁବକ । ଚେକିଂ ସମୟରେ କଷ୍ଟମ ବିଭାଗ ହାତରେ ଧରା ପଡ଼ିଲେ ଯୁବକ । ଭୁବନେଶ୍ୱର ବିମାନ ବନ୍ଦରରୁ ଜବତ ହେଲା ୧୦ ଟି ବହୁରୂପୀ ଗୋଧି, ୯ ଟି କିଙ୍ଗ୍ ସ୍ନେକ୍ ଓ ୧୨ ଟି କଇଁଛ । ଯୁବକ ଜଣକ ହେଲେ ତାମିଲନାଡୁର ଶଙ୍କର ମୂର୍ଗନ୍ । କଷ୍ଟମ ବିଭାଗ ସମ୍ପୃକ୍ତ ଯୁବକଙ୍କ ପାସପୋର୍ଟକୁ ଜବତ କରିଛି ।
ସୂଚନା ମୁତାବକ, ତାମିଲନାଡୁର ଶଙ୍କର ମୂର୍ଗନ୍ ନାମକ ଯୁବକ ବ୍ୟାଙ୍କକ୍ରୁ ୧୦ ଟି ବହୁରୂପୀ ଗୋଧି, ୯ ଟି କିଙ୍ଗ୍ ସ୍ନେକ୍ ଓ ୧୨ ଟି କଇଁଛକୁ ଏକ ଲଗେଜରେ ଭର୍ତ୍ତି କରି ଭୁବନେଶ୍ୱର ଆଣିଥିଲେ । ସେଗୁଡ଼ିକ ଭୁବନେଶ୍ୱରରୁ ଚେନ୍ନାଇର ବିଭିନ୍ନ ସ୍ଥାନକୁ ବିକ୍ରି ପାଇଁ ପଠାଯାଇଥାନ୍ତା । ହେଲେ ସବୁ ପ୍ଲାନ୍ ଭଣ୍ଡୁର କରିଦେଲା କଷ୍ଟମ ବିଭାଗ । ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନ ବନ୍ଦରରେ ଆସି ପହଞ୍ଚିବା ପରେ କଷ୍ଟମ ବିଭାଗର ଚେକିଂ ବେଳେ ଯୁବକ ଜଣକ ଧରା ପଡ଼ିଥିଲେ । ତାଙ୍କଠାରୁ ସମସ୍ତ ବଣ୍ୟଜନ୍ତୁଙ୍କୁ ସୁରକ୍ଷିତ ଭାବରେ ଜବତ କରିବା ସହ ଯୁବକଙ୍କ ପାସପୋର୍ଟ ମଧ୍ୟ ଜବତ କରିଛି କଷ୍ଟମ ବିଭାଗ । ଉଦ୍ଧାର ହୋଇଥିବା ସମସ୍ତ ବଣ୍ୟଜନ୍ତୁଙ୍କୁ ନନ୍ଦନକାନନରେ ରଖାଯିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି ।
ତେବେ ଘଟଣାରେ ସମ୍ପୃକ୍ତ ଥିବା ଯୁବକଙ୍କର ପଟିଆ ଅଞ୍ଚଳରେ ଜଣେ ବ୍ୟବସାୟୀଙ୍କ ସହ ଲିଙ୍କ୍ ଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ଏହି କାରବାରରେ ଆଉ କିଏ କିଏ ସାମିଲ ଅଛନ୍ତି ଏବଂ ସେଗୁଡ଼ିକୁ ଚେନ୍ନାଇର କେଉଁ କେଉଁ ସ୍ଥାନକୁ ଚାଲାଣ ହୋଇଥାନ୍ତା, ତାହାର ତଦନ୍ତ କରୁଛି ବନ ବିଭାଗ ।
