ମାଲକାନଗିରି /କାଲିମେଳା, ୧୬/୧୦(ଆପ୍ର ): ପାରିବାରିକ କଳହ ହେଲା କାଳ । ବ୍ଲେଡରେ ସ୍ତ୍ରୀର ଗଳା କାଟି ହତ୍ୟା ଉଦ୍ୟମ କରିଛି ସ୍ୱାମୀ। ଗୁରୁତର ଅବସ୍ଥାରେ ହସ୍ପିଟାଲ ରେ ସ୍ତ୍ରୀ ଚିକିତ୍ସିତ ହେଉଥିବା ବେଳେ ସ୍ୱାମୀ ଥାନାରେ କରିଛି ଆତ୍ମସମର୍ପଣ। ମାଲକାନଗିରି ଜିଲ୍ଲା କାଲିମେଳା ଥାନାସ୍ଥ ଏମପିଭି ୨୩ ଗ୍ରାମରେ ଏପରି ଘଟଣା ଘଟିଛି ।
ଏମପିଭି ୨୩ ଗ୍ରାମର ବିଭାସ ମିର୍ଦ୍ଧା ଓ ତାଙ୍କ ପତ୍ନୀ ମୋନିକା ମିର୍ଦ୍ଧାଙ୍କ ମଧ୍ୟରେ କୌଣସି କାରଣରୁ ବିବାଦ ଦେଖାଯାଇଥିଲା। ମହିଳା ଜଣଙ୍କ କିଛି ଦିନ ହେଲା ନିଜ ବାପା ଘର ଏମପିଭି ୨୩ ଗ୍ରାମରେ ରହି ଆସୁଥିଲେ। ତେବେ ଆଜି ସକାଳ ପ୍ରାୟ ୧୦ଟା ସମୟରେ ମହିଳା ଜଣଙ୍କ ଘରେ ଥିବା ବେଳେ ସ୍ୱାମୀ ଅଚାନକ ସେଠାକୁ ଯାଇ ସ୍ତ୍ରୀର ବେକକୁ ଏକ ବ୍ଲେଡ ସାହାଯ୍ୟରେ କାଟି ଘଟଣାସ୍ଥଳରୁ ଫେରାର ହୋଇ ଯାଇଥିଲେ। ଘର ଲୋକ ରକ୍ତ ଜୁଡୁବୁଡୁ ଅବସ୍ଥାରେ ଗୁରୁତର ମୋନିକାଙ୍କୁ ପ୍ରଥମେ କାଲିମେଳା ମେଡିକାଲରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ତାଙ୍କୁ ଆମ୍ବୁଲାନ୍ସ ଯୋଗେ ମାଲକାନଗିରି ଜିଲ୍ଲା ହସ୍ପିଟାଲକୁ ସ୍ଥାନାନ୍ତର କରାଯାଇଛି । ଅନ୍ୟପଟେ ସ୍ୱାମୀ ବିଭାସ ମିର୍ଦ୍ଧା କାଲିମେଳା ଥାନାକୁ ଯାଇ ଦୋଷ ସ୍ୱୀକାର କରି ଆତ୍ମସମର୍ପଣ କରିଛନ୍ତି। ଥାନାରେ ଅଟକ ରଖି ପୁଲିସ ପଚରା ଉଚରା କରିବା ସହିତ ଘଟଣାର ତଦନ୍ତ କରୁଛି।