ମାଲକାନଗିରି /ଚିତ୍ରକୋଣ୍ଡା, ୬/୧୦: ବାପା ସାଜିଲା ସୈତାନ  । ଦ୍ଵିତୀୟ ସ୍ତ୍ରୀ କଥାରେ ପଡି ନିଜ ୫ବର୍ଷର ଶିଶୁ କନ୍ୟାକୁ ଛୁରୀ ଭୁସି ହତ୍ୟା କଲା ବାପା । ମୃତ ଝିଅ ବ୍ଲେସି ରାଣୀ ଭତ୍ରା(୫) ଏବଂ ତାଙ୍କ ବାପା ସଞ୍ଜୀବ ଭତ୍ରା ବୋଲି ଜଣାପଡ଼ିଛି । ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଥାନା  ଦୋରାଗୁଡ଼ା ପଂଚାୟତ ର ଆରଏସସି-୧୪ ଗ୍ରାମରେ ଏପରି ଅଭାବନୀୟ ଘଟଣା ଘଟିଛି । 

ସୂଚନା ମୁତାବକ, ଛୋଟ ଝିଅ ବ୍ଲେସି ରାଣୀ ଭତ୍ରା ପଡୋଶୀ ଘରେ ଖେଳୁଥିବା ସମୟରେ ବାପା ସଞ୍ଜୀବ ଭତ୍ରା ଛୁରାରେ ଭୁସି ଥିଲା । କୁନି ଝିଅ ର ଚିତ୍କାର ଶୁଣି ପଡ଼ୋଶୀଲୋକେ ଘଟଣା ସ୍ଥଳରେ ପହଞ୍ଚି ଥିଲେ । ସେଠାରେ ରକ୍ତ ଜୁଡୁବୁଡୁ ଅବସ୍ଥାରେ ବ୍ଲେଶୀକୁ ଦେଖିଥିଲେ । ଏହା ଦେଖି   ରକ୍ତାକ୍ତ ବ୍ଲେସିକୁ ଚିତ୍ରକୋଣ୍ଡା ଉପଖଣ୍ଡ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ । କିନ୍ତୁ ମେଡ଼ିକାଲରେ ପହଞ୍ଚିଲା ପରେ ଡାକ୍ତର ତାକୁ ମୃତ ଘୋଷଣା କରିଛନ୍ତି । ଝିଅକୁ ଛୁରୀ ମାରି ସୈତାନ ବାପା ଘଟଣା ସ୍ଥଳରୁ ହତ୍ୟାକାରୀ ଫେରାର ହୋଇଯାଇଥିଲା । 

ଏ ସମ୍ପର୍କରେ ଚିତ୍ରକୋଣ୍ଡା ଥାନାରେ ଜଣାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି  ଶିଶୁର ମୃତ ଶରୀର ଜବତ କରି ବ୍ୟବଚ୍ଛେଦ ନିମନ୍ତେ ପଠାଇ ତଦନ୍ତ ଆରମ୍ଭ କରିଛନ୍ତି । ବୁଧବାର ପୋଲିସ ହତ୍ୟାକାରୀ ବାପାକୁ ଗୋଲାପୀଗୁଡା ଗ୍ରାମରୁ ଗିରଫ କରିବାରେ ସକ୍ଷମ ହୋଇଛି । ମୃତ ବ୍ଲେସିଙ୍କ ଜେଜେବାପା ବିନୋଦ ଭତ୍ରା କହିଛନ୍ତି ଯେ, ତାଙ୍କ ପୁଅ ସଞ୍ଜୀବ ଭତ୍ରା ନିଜ ଦ୍ୱିତୀୟ ସ୍ତ୍ରୀ କଥାରେ ପଡ଼ି ପ୍ରଥମ ସ୍ତ୍ରୀର ନିଜ ଝିଅ ବ୍ଲେସିକୁ ହତ୍ୟା କରିଛି । ସାବତ ମାଆ କଥା ପଡ଼ି ଏପରି ଜଘନ୍ୟ ହତ୍ୟାକାଣ୍ଡ ଘଟାଇଛି । ବର୍ତ୍ତମାନ ହତ୍ୟାକାରୀ ବାପାକୁ ଗିରଫ କରିବା ସହ ପଚରାଉଚରା ଜାରି ରଖିଥିବା ଚିତ୍ରକୋଣ୍ଡା ପୋଲିସ ସୂଚନା ଦେଇଛି।