ଠାକୁରମୁଣ୍ଡା, ୧୨/୮( ଆପ୍ର ) : ସ୍ତ୍ରୀକୁ ଲୁହା ରଡ୍ରେ ପିଟି ପିଟି ହତ୍ୟା। ଠାକୁରମୁଣ୍ଡା ବ୍ଲକ ମହୁଲଡିହା ଥାନା ଅନ୍ତର୍ଗତ ଚମ୍ପାଝର ଗ୍ରାମ ପଞ୍ଚାୟତରେ ଏଭଳି ଘଟଣା ଘଟିଛି। ମୃତକ ଜଣକ ହେଲେ ଚମ୍ପାଝର ଗ୍ରାମର ସାଲିତା ମୁଣ୍ଡା।
ଚମ୍ପାଝର ଗ୍ରାମର ଜଗନ୍ନାଥ ହୋଙ୍କ ପୁଅ ଉଦୟ ହୋ (୫୦) କେନ୍ଦୁଝର ଜିଲ୍ଲା ଜୋଡା ରେ ରହି ଟ୍ରକ ଡ୍ରାଇଭର ଭାବେ କାମ କରନ୍ତି। ଉଦୟ ହୋ କିଛି ଦିନ ହେଲା ଗ୍ରାମକୁ ଆସି ଅତ୍ୟଧିକ ମଦ୍ୟପାନ କରି ସ୍ତ୍ରୀ ସାଲିତା ସହିତ ଝଗଡ଼ା କରୁଥିଲେ। ୧୧ ତାରିଖ ଅପରାହ୍ନ ୪ ଟା ସମୟରେ ଉଦୟ ମଦ୍ୟପାନ କରି ସ୍ତ୍ରୀ ସହ ଝଗଡ଼ା କରିଥିଲା। ଏକ ଲୁହା ରଡ୍ ଏଵଂ ପ୍ଲାଷ୍ଟିକ ପାଇପରେ ସାଲିତାର ମୁଣ୍ଡକୁ ପିଟି ଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଖବର ପାଇ ମହୁଲଡିହା ଥାନା ଅଧିକାରୀ ଅରୁଣ କୁମାର ଟୁଡୁ, ଏଏସ ଆଇ ସଞ୍ଜୟ କୁମାର ନାଏକ ଘଟଣା ସ୍ଥଳରେ ପହଞ୍ଚି ମୃତ ଦେହ ଜବତ କରି ବ୍ୟବଛେଦ ପାଇଁ ପଠାଇଛନ୍ତି। ଉଦୟ ହୋଙ୍କୁ ପୁଲିସ ଅଟକ ରଖି ପଚରାଉଚରା କରୁଛି।
ସୂଚନାଯୋଗ୍ୟ ଯେ, ସାଲିତା ମୁଣ୍ଡା ହେଉଛନ୍ତି ଉଦୟ ହୋଙ୍କ ତୃତୀୟ ସ୍ତ୍ରୀ। ପ୍ରଥମ ସ୍ତ୍ରୀର ମୃତ୍ୟୁ ପରେ ତୁଳସୀ ହୋଙ୍କୁ ଦ୍ୱିତୀୟ ବିବାହ କରିଥିଲେ। ତୁଳସୀ ହୋଙ୍କୁ ପଥରରେ ଛେଚି ଉଦୟ ହତ୍ୟା କରିବା ଅଭିଯୋଗରେ ୬ ବର୍ଷ ଜେଲ୍ ଦଣ୍ଡରେ ଦଣ୍ଡିତ ହୋଇଥିଲେ। ଜେଲରୁ ଫେରିବା ପରେ ଉଦୟ ସାଲିତାଙ୍କୁ ତୃତୀୟ ଵିଵାହ କରିଥିଲେ।
