ଉଦଳା,୧୨।୮ : ମୋବାଇଲ ଲୁଟି ଖସି ଯିବାକୁ ଉଦ୍ୟମ କରି ଫସିଗଲେ ଲୁଟେରା। ଖରାପ ରାସ୍ତାରେ ଯାଇ ଫସିଗଲେ। ଗାଡି ରୁ ପଡିଲେ ଆଉ ତା ପରେ ଲୋକଙ୍କ ହାତରୁ ଛେଚା ଖାଇ ଏବେ ପୋଲିସ କବଜାରେ ଲୁଟେରା। ଏଭଳି ଘଟଣା ଘଟିଛି ଉଦଳା - ବାଲେଶ୍ୱର ରାସ୍ତାର ସାଇଁକୁଳା କଲେଜ ନିକଟରେ।
ନୂଆଗାଁ ଗ୍ରାମର ଜଣେ ଯୁବତୀ କଲେଜ ନିକଟରେ ଫୋନରେ କଥା ହୋଇ ଚାଲି ଚାଲି ଯାଉଥିଲେ। ଏହି ସମୟରେ ୩ ଜଣ ଲୁଟେରା ବାଇକରେ ଆସି ତାଙ୍କ ନିକଟରୁ ମୋବାଇଲ ଲୁଟିନେବାକୁ ଉଦ୍ୟମ କରିଥିଲେ। ହେଲେ ମୋବାଇଲ ଲୁଟିବାରେ ସଫଳ ହୋଇପାରି ନ ଥିଲେ। ଯାହା ପରେ ଯୁବତୀ ପାଟି କରିବାରୁ ଲୁଟେରାମାନେ କଲେଜ ଛକ ରୁ ଦାମାସାହି ରାସ୍ତାରେ ଦ୍ରୁତଗତିରେ ଚାଲିଯାଇଥିଲେ। ହେଲେ ଉକ୍ତ ରାସ୍ତାଟି ଖାଲ ଢିପରେ ଭର୍ତ୍ତି ଥିବାରୁ ଅନ୍ଧାରରେ ଜାଣି ନ ପାରି ଲୁଟେରାମାନେ ଭାରସାମ୍ୟ ହରାଇ ବାଇକ ସହ ତଳେ ପଡିଯାଇଥିଲେ। ଏହି ସମୟରେ ଯୁବତୀଙ୍କ ଚିତ୍କାର ଶୁଣି ଲୁଟେରାମାନଙ୍କୁ ଗୋଡ଼ାଉଥିବା ସ୍ଥାନୀୟ ଲୋକଙ୍କ ହାବୁଡ଼ରେ ପଡ଼ିଥିଲେ। ସ୍ଥାନୀୟ ଲୋକେ ଲୁଟେରାଙ୍କୁ ଉତ୍ତମ ମଧ୍ୟମ ଦେବା ପରେ ପୋଲିସକୁ ସୂଚନା ଦେଇଥିଲେ। ଗାଡି ରୁ ପଡି ଲୁଟେରା ଗୁରୁତର ହୋଇଥିବା ବେଳେ ଉଦଳା ମେଡିକାଲରେ ଚିକିତ୍ସା ନିମନ୍ତେ ଭର୍ତ୍ତି ହୋଇଥିଲେ। ପୋଲିସ ୩ ଜଣ ଲୁଟେରାଙ୍କୁ ଗିରଫ କରିବା ସହିତ ସେମାନଙ୍କୁ ପଚରାଉଚରା ଜାରି ରଖିଛି।
