ବାଂଶପାଳ, ୨୬/୧୨: ସ୍ୱାମୀଙ୍କ ବିୟୋଗ ପରେ ଆର୍ଥିକ ସମସ୍ୟା ଏବଂ ପାରିବାରିକ ଅଶାନ୍ତିରୁ ଜୀବନ ହାରିଲେ ମହିଳା । ବେସାହାରା ହୋଇ ପଡିଲେ ୨ ସନ୍ତାନ । ମୃତ ମହିଳା ଜଣକ ପକି ମୁଣ୍ଡା(୩୨) ବୋଲି ଜଣାପଡ଼ିଛି । କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ନୟାକୋଟ ଥାନା ଅନ୍ତର୍ଗତ କୁଶକଳା କିସାନ ସାହିରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, କିସାନ ସାହିର ନିରଞ୍ଜନ ମୁଣ୍ଡା ୩ ବର୍ଷ ତଳେ ରୋଗଗ୍ରସ୍ତ ହୋଇ ମୃତ୍ୟୁ ବରଣ କରିଥିଲେ । ସ୍ୱାମୀଙ୍କ ବିୟୋଗ ପରେ ପତ୍ନୀ ପକି ମୁଣ୍ଡା ୧୬ ବର୍ଷର ଝିଅ ଓ ୧୨ ବର୍ଷର ପୁଅକୁ ନେଇ ଘରେ ରହୁଥିଲେ । ତେବେ ସ୍ୱାମୀଙ୍କ ମୃତ୍ୟୁ ପରେ ପରିବାରରେ ଆର୍ଥିକ ସମସ୍ୟା ଲାଗି ରହିଥିଲା । ଅର୍ଥାଭାବ ଦୂରେଇବାକୁ ଝିଅ କିଛି ଦିନ ହେବ ବାହାରକୁ କାମ କରିବାକୁ ଚାଲି ଯାଇଥିବା ବେଳେ ସପ୍ତମ ଶ୍ରେଣୀରେ ପଢୁଥିବା ପୁଅ ଗୁରୁ ମୁଣ୍ଡାଙ୍କ ସହିତ ପକି ଗୁରୁବାର ସନ୍ଧ୍ୟାରେ ଖାଇ ସାରି ଘରେ ଶୋଇଥିଲେ । ସକାଳୁ ପୁଅ ଉଠି ମାଙ୍କୁ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲା । ଏହା ଦେଖି ଗୁରୁ ତାଙ୍କ ପୋଡ଼ୋଶୀଙ୍କୁ ଖବର ଦେଇଥିଲେ । ପଡ଼ୋଶୀମାନେ ଦୌଡ଼ି ଆସି ପକିଙ୍କୁ ଝୁଲନ୍ତା ଅବସ୍ଥାରେ ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ନୟାକୋଟ ଥାନା ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
