ଭୁବନେଶ୍ବର, ୨୦/୯ : ମେଜର ଓ ବାନ୍ଧବୀଙ୍କୁ ମାଡ଼ ମରା ଘଟଣା ଦିନକୁ ଦିନ ତିବ୍ର ହେବାରେ ଲାଗିଛି । ସେନା – ପୋଲିସ ମୁହାଁମୁହିଁ । ଏହାକୁ ନେଇ ରାଜନୈତିକ ମହଲରେ ତୀବ୍ର ପ୍ରତିକ୍ରିୟା‌ ପ୍ରକାଶ ପାଇଛି । ଆଜି  ଉପମୁଖ୍ୟମନ୍ତ୍ରୀ ପ୍ରଭାତି ପରିଡ଼ା ଏମ୍ସ ଯାଇ ପୀଡ଼ିତାଙ୍କୁ ଭେଟିଛନ୍ତି । ସେ କହିଛନ୍ତି, ମୁଁ ଏମ୍ସରେ ପୀଡ଼ିତାକୁ ଭେଟିଲି । ତା’ର ସବୁ କଥା ଶୁଣିଲି । ଏହି ଘଟଣାରେ ଡିଜିପି ୫ଜଣଙ୍କୁ ସସପେଣ୍ଡ କରିଛନ୍ତି । ମାମଲା କ୍ରାଇମବ୍ରାଞ୍ଚକୁ ଯାଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ମୁଁ ଏଠାକୁ ଆସିଲି । ସରକାର ଜିରୋ ଟଲେ୍ରାନ୍ସ କହିଛନ୍ତି । ଯାହା ବି ରିପୋର୍ଟ ଆସିବ କମ ଦିନରେ ଆସିବ, ଆଜି ବି ସେ ସବୁ କହିଛି, ଜିରୋ ଟଲେରାନ୍ସରେ କେହି ବାଧକ ହେଇ ପାରିବେନାହିଁ । ରାଜ୍ୟର ଉପ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ସମ୍ପୂର୍ଣ୍ଣ ହୋଇ କହୁଛି, ଯିଏ ଦୋଷୀ ସେ ଦଣ୍ଡିତ ହେବ, ସେ ଝିଅର ଅବସ୍ଥା ବହୁତ ଭଲ ଅଛି, ମାତ୍ର ସେ ମାନସିକ ସ୍ତରରେ ବହୁ ଦୁଃଖିତ ଅଛି । 

ଅନ୍ୟପଟେ ଯଦି ଦେଖିବା ଏହି ଘଟଣାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝି ଆଜି ଟୁଇଟ(ଏକ୍ସ) କରିଛନ୍ତି, ଭରତପୁର ଥାନାରେ ସେନା ଅଧିକାରୀ ଓ ତାଙ୍କ ସହିତ ଥିବା ଜଣେ ମହିଳାଙ୍କୁ ଅସଦାଚରଣ ତଥା ଆକ୍ରମଣ ଅଭିଯୋଗକୁ ସରକାର ଅତ୍ୟନ୍ତ ଗୁରୁତର ଭାବେ ଗ୍ରହଣ କରିଛନ୍ତି । ଘଟଣା ସରକାରଙ୍କ ଦୃଷ୍ଟିକୁ ଆସିବା ମାତ୍ରେ ବିଭାଗୀୟ କାର୍ଯ୍ୟାନୁଷ୍ଠାନ ସହିତ ଆଇନ ଅନୁଯାୟୀ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଇଛି । ଘଟଣା ଅତ୍ୟନ୍ତ ସଂବେଦନଶୀଳ ହୋଇଥିବାରୁ କ୍ରାଇମ ବ୍ରାଞ୍ଚକୁ ଘଟଣାର ଯାଞ୍ଚ କରି ତୁରନ୍ତ ନିର୍ଦ୍ଦିଷ୍ଟ ସମୟସୀମା ଭିତରେ ରିପୋର୍ଟ ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ତଦନ୍ତ ରିପୋର୍ଟ ପ୍ରାପ୍ତ ହେବା ମାତ୍ରେ ଆଇନ ଅନୁଯାୟୀ ଦୋଷୀଙ୍କୁ ଦୃଷ୍ଟାନ୍ତମୂଳକ ଦଣ୍ଡବିଧାନ କରାଯିବ। ମହିଳା ହିଂସା ବିରୁଦ୍ଧରେ ସରକାର ‘ଶୂନ୍ୟ ସହନଶୀଳତା’ ନୀତି ଅବଲମ୍ବନ କରୁଛନ୍ତି ଏବଂ ମହିଳା ନିର୍ଯାତନାକୁ କୌଣସି ପ୍ରକାରେ ବରଦାସ୍ତ କରାଯିବ ନାହିଁ।