ଦାରିଙ୍ଗବାଡି, ୩/୬ : ୨୦ ତାରିଖରେ ଶେଷ ହୋଇଛି ଜି. ଉଦୟଗିରି ମଣ୍ଡଳୀର ସାଧାରଣ ନିର୍ବାଚନ । ନିର୍ବାଚନ ସରିବା ପରେ ପ୍ରାର୍ଥୀଙ୍କ ମଧ୍ୟରେ ଚାଲିଛି ଅଙ୍କକସା। ସମସ୍ତ ଦଳର ପ୍ରାର୍ଥୀମାନେ ଦଳୀୟ ନେତାଙ୍କୁ ଡାକି ହିସାବ କିତାବ କରିସାରିଛନ୍ତି । ଜି. ଉଦୟଗିରି ନିର୍ବାଚନ ମଣ୍ଡଳୀରେ ୪ ଗୋଟି ବ୍ଲକ ରହିଛି। ସେଥି ମଧ୍ୟରୁ ଦାରିଙ୍ଗବାଡି ବ୍ଲକରେ ସର୍ବାଧିକ ଭୋଟର। ଦାରିଙ୍ଗବାଡି ବ୍ଲକରେ ୮୪ ହଜାର ୭୪୬ ଭୋଟର ରହିଥିବା ବେଳେ ୬୧ ହଜାର ୬ ଜଣ ଭୋଟର ମତଦାନ କରିଛନ୍ତି। 

ସେହିପରି ରାଇକିଆ ବ୍ଲକରେ ୪୨ ହଜାର ୮୨୬ ଜଣ ଭୋଟରଙ୍କ ମଧ୍ୟରୁ ୨୮ ହଜାର ୯୪୩ ଭୋଟର, ଜି.ଉଦୟଗିରି ବ୍ଲକରେ ୩୭ ହଜାର ୮୨୬ ଭୋଟରଙ୍କ ମଧ୍ୟରୁ ୨୩ ହଜାର ୮୦୩ ଜଣ ଭୋଟର ଓ ଟିକାବାଲି ବ୍ଲକରେ ୪୨ ହଜାର ୭୮୫ ଭୋଟରଙ୍କ ମଧ୍ୟରୁ ୩୦ ହଜାର ୬୧୧ ଭୋଟର ମତଦାନ କରିଛନ୍ତି। ଏଭଳି ଭାବେ ଜି. ଉଦୟଗିରି ନିର୍ବାଚନ ମଣ୍ଡଳୀରେ ୨ ଲକ୍ଷ ୮ ହଜାର ୧୮୩ ଜଣ ଭୋଟର ମଧ୍ୟରୁ ୧ ଲକ୍ଷ ୪୪ ହଜାର ୩୬୩ ଜଣ ଭୋଟର ମତଦାନ କରିଛନ୍ତି। ଏଥି ମଧ୍ୟରୁ କେଉଁ ବ୍ଲକରୁ କେତେ ଭୋଟ ମିଳିବ ସେନେଇ ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀମାନେ ଦଳୀୟ ନେତାଙ୍କୁ ଡାକି ଏକ ଆନୁମାନିକ ହିସାବ କରିଛନ୍ତି । ସବୁ ଦଳ ପୂର୍ବାନୁମାନ କରି ବିଜୟ ନିଶ୍ଚିତ କହୁଥିବା ବେଳେ ଦାରିଙ୍ଗବାଡି ବ୍ଲକର ଭୋଟ ହିଁ ପ୍ରାର୍ଥୀଙ୍କ ଭାଗ୍ୟ ନିର୍ଧାରଣ କରିବ। ଆସନ୍ତାକାଲି ଗଣତି ରହିଥିବା ବେଳେ ଜନତା କାହାକୁ ବିଜୟ ମୁକୁଟ ପିନ୍ଧାଉଛନ୍ତି ତାକୁ ଦେଖିବାକୁ ବାକି ରହିଲା।