କାମାକ୍ଷାନଗର,୦୩/୧୦: ଶୌଚ ହେବା ପାଇଁ ଯାଇଥିବାବେଳେ ଟ୍ରେନ ଧକ୍କାରେ କଟିଲା ଗୋଡ଼ । ଗୁରୁତର ଯୁବକ ଜଣକ ବିବେକ ପ୍ରଧାନ ବୋଲି ଜଣାପଡ଼ିଛି । ଯୁବକଙ୍କ ବାମ ଗୋଡ କଟି ଯାଇଥିବାବେଳେ ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ମହୁପାଳ ନିକଟରେ ଅନୁଗୁଳ-ସୁକିନ୍ଦା ରେଳ ଲାଇନରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବିବେକ ଗୁରୁବାର ସକାଳୁ ଶୌଚ ହେବାପାଇଁ ଟ୍ରେନ ଲାଇନ ନିକଟକୁ ଯାଇଥିଲେ । ଏହି ସମୟରେ ହଠାତ୍ ଏକ ଟ୍ରେନ୍ ମାଡି ଆସିଥିଲା ଏବଂ ଯୁବର ଜଣକ ଜାଣି ପାରିନଥିଲେ । ଫଳରେ ଟ୍ରେନ ଧକ୍କାରେ ଯୁବକଙ୍କ ବାମ ଗୋଡ଼ କଟିଯାଇଥିଲା । ସେ ଯନ୍ତ୍ରଣାରେ ଚିତ୍କାର କରିଥିଲେ । ଏହା ଶୁଣି ସ୍ଥାନୀୟଲୋକେ ତୁରନ୍ତ ତାଙ୍କୁ ସେଠାକୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ । ପରେ ଏନେଇ କାମାକ୍ଷାନଗର ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ କରୁଛି ।
