ଭୁବନେଶ୍ୱର, ୨୪।୧୦: ପାଖଉଛି ବାତ୍ୟା, ବଢ଼ୁଛି ଭୟ । ଭୀଷଣ ବାତ୍ୟାର ରୂପ ନେଲା ଦାନା । ଘଣ୍ଟାପ୍ରତି ୧୨ କିମି ବେଗରେ ଆଗକୁ ବଢ଼ୁଛି । ତେବେ ବାତ୍ୟା ପ୍ରଭାବରେ ରାଜଧାନୀରେ ଦେଖାଦେବନି ପାଣି ସମସ୍ୟା । ବାତ୍ୟା ସମୟରେ ରାଜଧାନୀବାସୀଙ୍କୁ ମିଳିବ ପିଇବା ପାଣି । ରାଜଧାନୀବାସୀଙ୍କୁ ପାଇପ୍ ପାଣି ଯୋଗାଣ କରିବ ୱାଟକୋ । ବିଦ୍ୟୁତ୍ ବିଭ୍ରାଟ ଘଟିଲେ ଲୋକଙ୍କୁ ପାଣି ଦେବାରେ ଦେଖାଦେବନି ସମସ୍ୟା । ପାଣିକୁ ନେଇ ସମସ୍ୟା ଥିଲେ ଉପଖଣ୍ଡ କାର୍ଯ୍ୟାଳୟ ପ୍ରବନ୍ଧକଙ୍କ ମୋବାଇଲ ନଂରେ ଯୋଗାଯୋଗ କରିବାକୁ ଦିଆଯାଇଛି ପରାମର୍ଶ । ଯେଉଁଠି ଲୋକେ ସମସ୍ୟା ଅନୁଭବ କରିବେ ସେ ଅଞ୍ଚଳର ଉପଖଣ୍ଡ କାର୍ଯ୍ୟାଳୟ ପ୍ରବନ୍ଧକଙ୍କ ମୋବାଇଲ ନଂରେ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି । ଏଥିପାଇଁ ରାଜଧାନୀ ୱାଟକୋ କାର୍ଯ୍ୟାଳୟର ୧୪୮ଟି ପମ୍ପ ହାଉସ୍ରେ ୧୨୩ଟି ଡିଜି ରଖାଯାଇଛି ।
ୱାଟକୋର ଡିଭିଜନ୍-୨ ଅଧିନରେ ୬୮ଟି ପମ୍ପ ହାଉସ୍ରେ ୭୨ଟି ଡିଜି ମହଜୁଦ୍ ରହିଛି । ଏହାବ୍ୟତୀତ ୨୮ଟି ଅସ୍ଥାୟୀ ବାତ୍ୟା ଆଶ୍ରୟସ୍ଥଳୀରେ ପାଣିଟାଙ୍କି ରଖାଯାଇ ସେଥିରେ ପାଣି ବ୍ୟବସ୍ଥା ମଧ୍ୟ କରାଯାଇଛି । ପାଣି ସମସ୍ୟା ଅଭିଯୋଗ ଦୂର ପାଇଁ ଜାରି କରାଯାଇଛି ଉପଖଣ୍ଡ କାର୍ଯ୍ୟାଳୟ ପ୍ରବନ୍ଧକଙ୍କ ମେବାଇଲ୍ ନଂ । ବିଏମ୍ସିକୁ ଆସୁଥିବା ପାଣି ସମସ୍ୟା ଦୂର ଅଭିଯୋଗର ସମାଧାନ ପାଇଁ ୱାଟକୋର ୩ ଜଣ କର୍ମଚାରୀଙ୍କୁ ବିଏମ୍ସି କାର୍ଯ୍ୟାଳୟରେ ପର୍ଯ୍ୟାୟକ୍ରମେ ଉପସ୍ଥିତ ରହିବାକୁ କୁହାଯାଇଛି । ବାତ୍ୟା ପରେ କେଉଁଠି ଗଛ ଭାଙ୍ଗିପଡ଼ିଲେ ତାହାକୁ ହଟାଇବା ଲାଗି ଗଠନ ହୋଇଛି ସ୍ୱତନ୍ତ୍ର ଦଳ । ସେହିପରି ୱାଟକୋ ଡିଭିଜନ୍-୧ ଅଧିନ ୫ଟି ଉପଖଣ୍ଡ କାର୍ଯ୍ୟାଳୟ ପଳାଶୁଣି, ନୂଆପଲ୍ଲୀ, ଘାଟିକିଆ, ଚନ୍ଦ୍ରଶେଖରପୁର, ଓ ମୁଣ୍ଡଳୀ ଅଧିନରେ ୮୦ଟି ପାଣି ପମ୍ପ ରହିଥିବା ବେଳେ ୫୧ଟି ଡିଜି, ୧୧ ପାଣି ଟ୍ୟାଙ୍କର ରଖାଯାଇଛି । ବାତ୍ୟା ଆଶ୍ରୟସ୍ଥଳୀରେ ପାଇପ୍ ଯୋଗେ ପାଣି ଯୋଗାଇବା ବ୍ୟବସ୍ଥା ହୋଇଛି ।
ଡିଭିଜନ୍-୧ ଅଧିନ ଉପଖଣ୍ଡ କାର୍ଯ୍ୟାଳୟରେ କେଉଁଠି ପାଣି ଯୋଗାଣରେ ସମସ୍ୟା ହେଲେ ଉପଖଣ୍ଡ କାର୍ଯ୍ୟାଳୟର ପ୍ରବନ୍ଧକଙ୍କ ନମ୍ୱରରେ ଯୋଗାଯୋଗ କରିବାକୁ କୁହାଯାଇଛି । ବାତ୍ୟାକୁ ଆଖି ଆଗରେ ରଖି ୨୪-୨୫ ଓ ୨୬ ତାରିଖ ଦିନ ୧୨ଟା ପର୍ଯ୍ୟନ୍ତ ୱାଟକୋ ପକ୍ଷରୁ ଏଭଳି ପଦକ୍ଷେପ ନିଆଯାଇଛି । ଜାଣିନିଅନ୍ତୁ, ଆପଣଙ୍କ ଅଞ୍ଚଳର ପ୍ରବନ୍ଧକଙ୍କ ନଂ । ପଳାଶୁଣି ଓ ନୂଆପଲ୍ଲୀ ପ୍ରବନ୍ଧକଙ୍କ ନଂ- 8456020711, ଘାଟିକିଆ- 9437185954, ଚନ୍ଦ୍ରଶେଖରପୁର- 9348039206, ପୋଖରୀପୁଟ- 9437185139, ସତ୍ୟନଗର- 9861172709, ହାଇଲେବୁଲ- 9437279056 । ଡ୍ରେନେଜ୍ ସମସ୍ୟା ପାଇଁ 7809896621ରେ ଯୋଗାଯୋଗ କରିପାରିବେ ।
