ବଡବିଲ,୨୨।୧୨ : ଚମ୍ପୁଆ ରେଞ୍ଜ ମିରିଗିସିଙ୍ଗା ଗାଁରେ ହାତୀ ଘଉଡାଇବା ପାଇଁ ଯାଇଥିବା ବନ କର୍ମଚାରୀଙ୍କୁ ଅଟକ ରଖିଛନ୍ତି ଗ୍ରାମବାସୀ । କିଛି ଦିନ ହେବ ଏ ଅଞ୍ଚଳରେ ହାତୀ ଉପଦ୍ରବ ଯୋଗୁଁ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।
ରବିବାର ଭୋର୍ ସମୟରେ ଏକ ଗୋଠଛଡ଼ା ଦନ୍ତା ହାତୀ ମିରିଗିସିଙ୍ଗା ଗାଁରେ ଗୋଟିଏ ଘର ଏବଂ କୋଦଗାଡ଼ିଆ ଗାଁ ରେ ଦୁଇ ବଖରା ଘର ଭାଙ୍ଗିବା ପରେ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ତେବେ ସନ୍ଧ୍ୟାରେ ହାତୀ ଗାଁ ମୁହାଁ ହେଉଥିବାରୁ ବନ କର୍ମଚାରୀ ହାତୀ ଘଉଡାଇବା ପାଇଁ ମିରିଗିସିଙ୍ଗା ଗାଁକୁ ଯାଇଥିବାବେଳେ, ବନ କର୍ମଚାରୀଙ୍କୁ ଅଟକ ରଖିଛନ୍ତି ଅସନ୍ତୁଷ୍ଟ ଗ୍ରାମବାସୀ ।
ଗ୍ରାମବାସୀଙ୍କ କହିବା କଥା ହାତୀ ଘଉଡ଼ାଇବା ପାଇଁ ବନ କର୍ମଚାରୀ କିଛି କରୁନାହାନ୍ତି, କେବଳ ଦେଖଣାହାରୀ ସାଜିଛନ୍ତି । ଉପରିସ୍ଥ ବନ ଅଧିକାରୀ, ଡି ଏଫ୍ ଓ କିମ୍ବା ରେଞ୍ଜର ଆସି ଆଲୋଚନା କରିବାପାଇଁ ଦାବି କରିଛନ୍ତି । କିଛି ଦିନ ହେବ ଚମ୍ପୁଆ ରେଞ୍ଜର ବିଭିନ୍ନ ଗାଁ ମାନଙ୍କରେ ହାତୀ ଉପଦ୍ରବ ଲାଗି ରହିଛି । ହାତୀ କେତେବେଳେ ଘର ଭାଙ୍ଗୁଛନ୍ତି ତ ଆଉ କେତେବେଳେ ଫସଲ ଖାଇବା ସହ ଦଳି ଚକଟି ନଷ୍ଟ କରୁଛନ୍ତି। ବନ ବିଭାଗ ହାତୀଙ୍କ ଗତିବିଧି ଉପରେ ନଜର ରଖିବା ସହିତ ଘଉଡାଇବା ପାଇଁ ଉଦ୍ୟମ କରୁଥିଲେ ବି ହାତୀପଲ ଘର ଭାଙ୍ଗିବା ସହିତ ଫସଲ ଉଜାଡ଼ି ଦେଉଛନ୍ତି ।
