ପୁରୀ,୧।୧୦ : ପୁଣି ନରେନ୍ଦ୍ର ପୁଷ୍କରିଣୀ ଦଶତୁଠରେ ଘଟିଛି ଅଘଟଣ। ଦଶାହ କର୍ମ ଚାଲିଥିବାବେଳେ ୨ ଭାଇ ପାଣିରେ ବୁଡ଼ି ପ୍ରାଣ ହରାଇଛନ୍ତି। ଉଭୟ ହେଲେ ଗଞ୍ଜାମ ଜିଲ୍ଲା କୁକୁଡ଼ାଖଣ୍ଡିର ରାଜ କିରଣ ଶତପଥି (୨୩) ଓ ତାଙ୍କ ପିଉସୀ ପୁଅ ଭାଇ ନଳିନୀକାନ୍ତ ଶତପଥୀ (୨୭)।
ରାଜ କିରଣଙ୍କ ବୁଢ଼ୀମା' ତଥା ନଳୀନିକାନ୍ତଙ୍କ ଆଈଙ୍କ ଦେହାନ୍ତ ହୋଇଥିଲା। ନରେନ୍ଦ୍ରରେ ଦଶାହ କର୍ମ କରିବା ପାଇଁ ୪ ଦିନ ତଳୁ ରାଜ କିରଣ ଓ ନଳିନୀକାନ୍ତ ଏବଂ ଉଭୟଙ୍କ ପରିବାର ଲୋକେ ପୁରୀ ଆସିଥିଲେ। ଚୁଡ଼ାପଟି ଗଳି ସ୍ଥିତ ଶ୍ରୀକୃଷ୍ଣ ଚୈତନ୍ୟ ଆଶ୍ରମରେ ସେମାନେ ରହିଥିଲେ। ମଙ୍ଗଳବାର ପୂର୍ବାହ୍ନରେ ସେମାନେ ନରେନ୍ଦ୍ର ପୁଷ୍କରିଣୀ ଯାଇଥିଲେ। ଦଶତୁଠରେ କର୍ମ ଚାଲିଥିବାବେଳେ ଦୁଇ ଭାଇ ପାଣିରେ ସ୍ନାନ କରୁଥିଲେ। ପରିବାର ଲୋକଙ୍କ ନଜର ଆଢୁଆଳରେ ୨ ଭାଇ ପାଣିରେ ବୁଡ଼ି ଯାଇଥିଲେ। ସେମାନଙ୍କୁ ନପାଇ ପରିବାର ଲୋକେ କୁମ୍ଭାରପଡ଼ା ଥାନାରେ ଜଣାଇଥିଲେ। ସନ୍ଦେହରେ ଅଗ୍ନିଶମ ବାହିନୀ ନରେନ୍ଦ୍ର ପୁଷ୍କରିଣୀରେ ଖୋଜାଖୋଜି କରିଥିଲା। ପାଣିରେ ବୁଡ଼ିଥିବା ଅବସ୍ଥାରେ ଦୁହିଁଙ୍କୁ ପାଇଥିଲେ ଆଗ୍ନିକ। ନିସ୍ତେଜ ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବାବେଳେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। କୁମ୍ଭାରପଡ଼ା ଥାନା ପୁଲିସ ଶବ ଜବତ କରିଛି। ବ୍ୟବଚ୍ଛେଦ ପାଇଁ ମୃତ ଦେହକୁ ଶବ ସଂରକ୍ଷଣ ଗୃହରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ ଯେ, ଭଉଁରୀ ଯାତ୍ରା ଦିନ ଦଶତୁଠରେ ବାଣ ବିସ୍ଫୋରଣ ଘଟି ୩୦ରୁ ଅଧିକ ଶ୍ରଦ୍ଧାଳୁ ପୋଡ଼ି ଯାଇଥିଲେ। ସେମାନଙ୍କ ମଧ୍ୟରୁ ୧୭ ଜଣଙ୍କ ମୃତ୍ୟୁ ଘଟିଥିଲା। ଏହି ଅଘଟଣ ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଥିଲା।
