ଆଠଗଡ଼,୫/୧୨ : ବଡମ୍ବା ଅଂଚଳରେ ଦାଦାବଟି ମାଗି ଦୁଇ ଗିରଫ । ଗିରଫ ଯୁବକ ହେଲେ ବଡମ୍ବା ଥାନା କୋଟପଲା ଗ୍ରାମର ଚିତ୍ରସେନ ସାହୁ ଓ ମୁଜାଫର ଓରଫ (ମୁନା) । ଗତକାଲି ରାତିରେ କଟକ ବିଡାନାସୀ ଅଂଚଳର ଏକ ବୈଦୁତିକ ଗଣମାଧ୍ୟମର କର୍ମଚାରୀ ଗିରିଜା ଶଙ୍କର ପ୍ରଧାନ କୌଣସି କାମରେ ନରସିଂହପୁର ଯାଇଥିଲେ ।
ସେଠାରୁ ନିଜ କାମ ସାରି ଫେରୁଥିବା ସମୟରେ ବଡମ୍ବା ଦମକଳକେନ୍ଦ୍ର ନିକଟରେ ଗାଡ଼ିରୁ ଓଲ୍ହାଇ ଥିବା ସମୟରେ କୋଟପଲା ଗ୍ରାମର ଦୁଇ ଯୁବକ ଚିତ୍ତ୍ରସେନ ଓ ମୁନା ତାଙ୍କୁ ମାଉଜର ଦେଖାଇ ଟଙ୍କା ମାଗିଥିଲେ । ସେ ଟଙ୍କା ନ ଦେବାରୁ ତାଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ । ଏଥିରେ ଗିରିଜା ଭୟଭୀତ ହୋଇ ବଡମ୍ବା ପୋଲିସକୁ ଫୋନ ଯୋଗେ ଜଣାଇଥିଲେ ।
ଖବରପାଇ ବଡମ୍ବା ପୋଲିସ ଘଟଣାସ୍ଥଳରେ ପହଂଚି ଦୁଇ ଅଭିଯୁକ୍ତଙ୍କୁ କାବୁ କରି ଥାନାକୁ ଆଣିଥିଲେ । ଦୁଇ ଯୁବକଙ୍କଠାରୁ ଦୁଇ ଗୋଟି ମୋବାଇଲ, ନଗଦ ୫୦୦୦ ଟଙ୍କା, ଗୋଟିଏ ମାଉଜର ଓ ଦୁଇଟି ଜୀବନ୍ତ ଗୁଳି ସହିତ ଏହି ଲୁଟ୍ ଘଟଣାରେ ବ୍ୟବହୃତ ଏକ ମୋଟର ସାଇକେଲକୁ ମଧ୍ୟ ଜବତ କରିଛି ବଡ଼ମ୍ବା ପୋଲିସ୍। ଏ ସମ୍ପର୍କରେ ବଡମ୍ବା ଥାନାରେ ସଙ୍ଗୀନ ଦଫାରେ ମାମଲା ରୁଜୁ କରାଯାଇ ଅଭିଯୁକ୍ତ ଦୁଇ ଜଣଙ୍କୁ କୋର୍ଟ ଚାଲାଣ କରାଯାଇଛି । ଅଧିକ ତଦନ୍ତ ପାଇଁ ବନ୍ଧୁକ କେଉଁଠୁ କିଣା ହୋଇଛି ଏବଂ ଉଭୟଙ୍କ ଅପରାଧିକ କାର୍ଯ୍ୟ କଳାପର ଖୋଳତାଡ଼ କରିବ ସହ ଦରକାର ପଡ଼ିଲେ ତାଙ୍କୁ ରିମାଣ୍ଡରେ ଅଣାଯିବ ବୋଲି ଆଠଗଡ଼ ଏସଡିପିଓ ରବୀନ୍ଦ୍ର ମଲ୍ଲିକ କହିଛନ୍ତି।
