ରାମପୁର,୧୦/୧୦: କଳାହାଣ୍ଡି ଜିଲ୍ଲା ଉତ୍ତର ବନ ଖଣ୍ଡ ଅଧିନସ୍ଥ ନର୍ଲା ରେଞ୍ଜ ଅନ୍ତର୍ଗତ ଜାମ ପଡ଼ା ନିକଟରେ ବୁଧବାର ରାତିରେ ଏକ ପରିତ୍ୟକ୍ତ କୂଅରେ ପଡ଼ିଲା ଦନ୍ତା ହାତୀ । ସେଠାରେ ପଡ଼ି ଜୀବନ ବଞ୍ଚାଇବାକୁ ଉଦ୍ୟମ କରିଥିଲା । ପାଞ୍ଚ ଫୁଟ୍ ଗୋଲେଇ କୂଅ ମଧ୍ୟରେ ହାତୀଟି ପଡ଼ି ଥିବାରୁ ବାହାରିବା ସମ୍ଭବ ହୋଇପାରିନଥିଲା । ଏହା ଦେଖି ସ୍ଥାନୀୟଲୋକେ ନର୍ଲା ରେଞ୍ଜ ଅଧିକାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ନର୍ଲା ରେଞ୍ଜ ଅଧିକାରୀ ଭରତ ବନ୍ଧୁ ଶବର ଅନ୍ୟ କର୍ମଚାରୀଙ୍କ ସହ ପହଞ୍ଚିଥିଲେ । ସେଠାରେ ପହଞ୍ଚି ହାତୀଟିକୁ ସୁରକ୍ଷିତ ଭାବରେ ଉଦ୍ଧାର କରିଥିଲେ । ଉଦ୍ଧାର ହେବା ପରେ ହାତୀଟି ଜଙ୍ଗଲ ମୁହାଁ ହେଇଥିବା କହିଛନ୍ତି ନର୍ଲା ରେଞ୍ଜ ଅଧିକାରୀ । 

ତେବେ ଗତ ବର୍ଷ ଡିସେମ୍ବର ମାସ ଦଶ ତାରିଖରେ ଏହି ଅଞ୍ଚଳରେ ହାତୀ ଆକ୍ରମଣରେ ନର୍ଲା ରେଞ୍ଜ ଅଧିକାରୀ ପ୍ରଶାନ୍ତ ପାଲ୍‌ଙ୍କ ମୃତ୍ୟୁ ହେଇଥିଲା । ବର୍ଷର ସବୁ ସମୟରେ ଏଇ ଅଞ୍ଚଳରେ ହାତୀଙ୍କ ଉପସ୍ଥିତି ରହୁଥିବାରୁ ବନ ବିଭାଗ ଆହୁରି ତତ୍ପର ହେବା ଆବଶ୍ୟକ ବୋଲି ଜନ ସାଧାରଣ ଆଲୋଚନା କରୁଛନ୍ତି ।