କଳାହାଣ୍ଡି,୦୭/୧୨: ୧୧ କେଭି ବିଦ୍ୟୁତ ତାର ସଂସ୍ପର୍ଷରେ ଆସି ଚାଲିଗଲା ଶ୍ରମିକଙ୍କ ଜୀବନ । ମୃତ ଶ୍ରମିକ ଜଣକ ଜୟପାଟଣା ବ୍ଲକ ଉଚ୍ଛୁଲା ପଞ୍ଚାୟତ କୁଣ୍ଡୀଗୁଡା ଗ୍ରାମର ପରମାନନ୍ଦ ରାଉତ (୨୦) ବୋଲି ଜଣା ପଡ଼ିଛି । କଳାହାଣ୍ଡି ଜିଲ୍ଲାରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ପରମାନନ୍ଦ ରାଉତ ନାମକ ଯୁବକ ଦିଗାମ୍ବର ରାଉତଙ୍କ ଚାଷଜମିକୁ ଧାନ କଟିବାକୁ ଯାଇଥିଲେ । ଧାନ କାଟିବା ସମୟରେ ବିଲ ଭିତର ଦେଇ ଯାଇଥିବା ୧୧ କେଭି ବିଦ୍ୟୁତ୍ ଖୁଣ୍ଟରେ ଥିବା ଆର୍ଥିଙ୍ଗ ତାର ସଂସ୍ପର୍ଷରେ ଆସିଥିଲେ । ଫଳରେ ଘଟଣାସ୍ଥଳରେ ହିଁ ଶ୍ରମିକଙ୍କ ମୃତ୍ୟୁ ହୋଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ବିଦ୍ୟୁତ ବିଭାଗୀୟ ଅଧିକାରୀ ଏବଂ ପୋଲିସକୁ ଖବର ଦେଇଥିଲେ । ହେଲେ ଦୀର୍ଘ ୧୫ ଘଣ୍ଟା ପରେ ବି ଘଟଣା ସ୍ଥଳରେ ବିଦ୍ୟୁତ ବିଭାଗୀୟ ଅଧିକାରୀ ପହଞ୍ଚି ନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ଏହି କାରଣରୁ ପରିବାର ଲୋକେ କ୍ଷତି ପୂରଣ ନଦେବା ଯାଏ ଶବ ଉଠାଇବାକୁ ମନା କରିଛନ୍ତି । ଅନ୍ୟ ପକ୍ଷେ ଜୟପାଟଣା ପୋଲିସ ରାତିରେ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି ।
