ଭୁବନେଶ୍ୱର, ୨୯।୫: ଟ୍ରେଣ୍ଡରେ ଆଦିବାସୀ ଅଳଙ୍କାର । ସୁନା, ରୁପା, ହୀରା ବଦଳରେ ମହିଳାମାନଙ୍କର ପ୍ରଥମ ପସନ୍ଦ ପାଲଟିଛି ଏହି ଅଳଙ୍କାର । ଯୁବପିଢି ଏହାକୁ ଫ୍ୟାସନ୍‌ ପାଇଁ ବ୍ୟବହାର କରୁଛନ୍ତି । ସେଥିପାଇଁ ଏହି ଅଳଙ୍କାର ବିକ୍ରି ହେଉଥିବା ଦୋକାନରେ ଯୁବତୀଙ୍କର ପ୍ରବଳ ଭିଡ଼ ହେଉଛି । ଏହା ଆଦିବାସୀ ସଂସ୍କୃତିକୁ ପ୍ରଦର୍ଶନ କରିବା ସହିତ ମହିଳାଙ୍କ ସୁନ୍ଦରତାକୁ ମଧ୍ୟ ବୃଦ୍ଧି କରୁଛି । ଏହିଭଳି ଅଳଙ୍କାରର ପସରା ଦେଖିବାକୁ ମିଳୁଛି ଏକାମ୍ର ହାଟରେ ଥିବା ୱାର୍ଲ୍ଡ କ୍ରାଫ୍ଟ ମେଳା ପକ୍ଷରୁ ପଡ଼ିଥିବା ଆଦିବାସୀ ଅଳଙ୍କାର ଷ୍ଟଲ୍‌ରେ । ଏହାର କାର୍ଯ୍ୟାଳୟ ନୂଆପଲ୍ଲୀରେ ମଧ୍ୟ ରହିଛି । ପାଦରେ ପାଉଁଜି ଠାରୁ ଆରମ୍ଭ କରି କାନଫୁଲ, ହାର, ଚୁଡ଼ି, ହେୟାର ପିନ୍‌ ଭଳି ବିଭିନ ଆଦିବାସୀ ଅଳଙ୍କାର ବିକ୍ରି ହେଉଛି । ଏହାର ମୂଲ୍ୟ ୧୦୦ ଟଙ୍କାରୁ ଆରମ୍ଭ କରି ୨ହଜାର ଟଙ୍କା ପର୍ଯ୍ୟନ୍ତ ରହିଛି । 

ପୋଷାକର ରଙ୍ଗ ଅନୁଯାୟୀ ଜୋତା, ଘଣ୍ଟା, ନେଲ୍‌ ପଲିସ ପିନ୍ଧୁଥିବା ମହିଳାମାନେ ଏବେ ଆଦିବାସୀ ଅଳଙ୍କାରକୁ ମଧ୍ୟ ମ୍ୟାଚିଙ୍ଗ୍‌ କରି ପିନ୍ଧୁଛନ୍ତି । ମେଳାର ନିର୍ଦ୍ଦେଶକ ଜ୍ୟୋତି ଶଙ୍କର ସାହୁ କହନ୍ତି, ଆଗରୁ ବାଥୁଡ଼ି ଜନଜାତି, ଡଙ୍ଗରିଆ କନ୍ଧ, ବଣ୍ଡା ଏହି ଅଳଙ୍କାର ବ୍ୟବହାର କରୁଥିଲେ । ଏବେ ସେଥିରେ ସାମନ୍ୟ ପରିବର୍ତ୍ତନ କରାଯାଇ ନୂଆ ରୂପ ଦିଆଯାଉଛି । କେଉଁ ଜନଜାତି ମାଳି ପିନ୍ଧୁଥିଲେ ତ ଆଉ କେଉଁ ଜନଜାତି ବ୍ରାସ୍‌ରେ ଅଳଙ୍କାର ପିନ୍ଧୁଥିଲେ କିନ୍ତୁ ଆମେ ତାହାକୁ ମିଶେଇ ଏକ ନୂତନ ଶୈଳୀରେ ଅଳଙ୍କାର ପ୍ରସ୍ତୁତ କରୁଛୁ । ବଜାରର ଚାହିଦା ଏବଂ ଲୋକଙ୍କ ପସନ୍ଦକୁ ଦେଖି ଏହା ପ୍ରସ୍ତୁତ ହେଉଛି । ଆମେ ଏହି ଅଳଙ୍କାର ମୁଖ୍ୟତଃ ଢେଙ୍କାନାଳରୁ ତିଆରି କରି ଆଣୁଛୁ ବୋଲି ସେ କହିଛନ୍ତି ।