ସମ୍ବଲପୁର,୧୩/୦୩: ପର୍ଯ୍ୟଟନ କେନ୍ଦ୍ର ପାଲଟିବ ହୀରାକୁଦ । ନୀଳ ଜଳରାଶି ଭିତରେ ଭ୍ରମଣ ସୁବିଧା ମିଳିବ । ଗୋଆ, କେରଳ ଭଳି ପର୍ଯ୍ୟଟକ ବୋଟ୍ ହାଉସ୍ର ମଜା ନେବେ । ଏଥିରେ ହୋଟେଲ୍ ଭଳି ସୁବିଧା ରହିବ । ଚକାଚକ୍ କୋଠରୀ ସହ ସୁସ୍ୱାଦୁ ଖାଦ୍ୟ ଉପଲବ୍ଧ ହେବ । ପର୍ଯ୍ୟଟକ ହୀରାକୁଦ ଜଳଭଣ୍ଡାରରେ ଦିନ ସହ ରାତିର ମଜା ଉଠାଇବେ । ପର୍ଯ୍ୟଟନର ବିକାଶ ପାଇଁ ହୀରାକୁଦ ମାଷ୍ଟରପ୍ଲାନରେ ଖୁବ ଶୀଘ୍ର ହୀରାକୁଦକୁ ଆସିବ ବୋଟ୍ ହାଉସ୍ । ଏ ନେଇ ସୂଚନା ଦେଇଛନ୍ତି ଜିଲ୍ଲାପାଳ ସିଦେ୍ଧଶ୍ୱର ବଳିରାମ ବୋନ୍ଦର ।
ବନ୍ୟପ୍ରାଣୀ, ଆର୍ଦ୍ରଭୂମି ଏବଂ ଜଳସମ୍ପଦରେ ପରିପୂର୍ଣ୍ଣ ସମ୍ବଲପୁର ପାଇଁ ପ୍ରସ୍ତୁତ ହେଉଥିବା ମାଷ୍ଟରପ୍ଲାନ୍କୁ ଏବେ ବଳ ମିଳିଛି । ବୁଧବାର ପର୍ଯ୍ୟଟନ ବିଭାଗ ଆୟୁକ୍ତ ଓ ସଚିବ ବଲବନ୍ତ ସିଂହ ସମ୍ବଲପୁରରେ ପହଞ୍ଚି ଜିଲ୍ଲାପାଳ, ଆରଡିସିଙ୍କ ସହ ଆଲୋଚନା କରିଛନ୍ତି । ଅଧିକାରୀ ଓ ସ୍ଥପତି କ୍ଷେତ୍ର ପରିଦର୍ଶନ କରିବେ । ୫ ହଜାର କୋଟି ଟଙ୍କାର ଏହି ପ୍ରକଳ୍ପରେ ପ୍ରାଥମିକ ପର୍ଯ୍ୟାୟରେ ଏବେ ବୋଟ୍ ହାଉସ୍ ଆସିବ । ଏଥିରେ ପର୍ଯ୍ୟଟକ ନୀଳ ଜଳରାଶିରେ ହୋଟେଲ୍ ଭଳି ମଜା ନେଇପାରିବେ । ସେହିଭଳି ହୀରାକୁଦରେ ଲେଜର୍ ସୋ ମଧ୍ୟ ହେବ । ସମଲେଶ୍ୱରୀ ମନ୍ଦିର ଭଳି ଏଠାରେ ହୀରାକୁଦ ସ୍ଥାପନର କାହାଣୀ ଓ ବିସ୍ଥାପିତଙ୍କ ତ୍ୟାଗର କାହାଣୀ ବର୍ଣ୍ଣିତ ହେବ । ଯାହାକି ଦେଶ, ବିଦେଶରୁ ଆସୁଥିବା ପର୍ଯ୍ୟଟକ ହୀରାକୁଦ ଉପରେ ଅଧିକ ଜାଣିପାରିବେ । ଏହାସହ ହୀରାକୁଦର ଗାଥାକୁ ନେଇ ଏକ ମ୍ୟୁଜିୟମ ତିଆରି କରାଯିବ ବୋଲି ପର୍ଯ୍ୟଟନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ।
ପ୍ରାଥମିକ ପର୍ଯ୍ୟାୟରେ ଏହାକୁ ୫ ହଜାର କୋଟି ଟଙ୍କାର ପ୍ରକଳ୍ପ ଭାବେ ରଖାଯାଇଛି । ହେଲେ ଆବଶ୍ୟକ ଅନୁସାରେ ଅର୍ଥ ଯୋଗାଇ ଦିଆଯିବ । ପୂର୍ବରୁ ହୀରାକୁଦ, ସମ୍ବଲପୁର ଏବଂ ଡେବ୍ରିଗଡ଼କୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ କେନ୍ଦ୍ର ଓ ରାଜ୍ୟ ପର୍ଯ୍ୟଟନ ବିଭାଗର ବିଭିନ୍ନ ଅଧିକାରୀ ଏବଂ ଗୁଜରାଟ ସରକାରଙ୍କ ଅତିରିକ୍ତ ମୁଖ୍ୟ ସଚିବ ତଥା ଷ୍ଟାଚ୍ୟୁ ଅଫ୍ ୟୁନିଟର ମୁଖ୍ୟ ପୁରୋଧା ମୁକେଶ ପୁରୀଙ୍କୁ ନେଇ ଆଲୋଚନା ହୋଇଥିଲା । ଏଥିରେ ହୀରାକୁଦରେ ବୀର ସୁରେନ୍ଦ୍ର ସାଏଙ୍କ ବିଶାଳ ପ୍ରତିମୂର୍ତ୍ତି ନିର୍ମାଣ ଉପରେ କର୍ମଶାଳା କରାଯାଥିଲା । ଯାହାକୁ ନେଇ ପର୍ଯ୍ୟଟନ ବିଭାଗ ଆୟୁକ୍ତ ଓ ସଚିବ ବଲବନ୍ତ ସିଂହ ଜିଲ୍ଲା ଅଧିକାରୀଙ୍କ ସହ ଆଲୋଚନା କରିଥିଲେ । ଏ ଦିଗରେ ଅଗ୍ରସର ହେବାକୁ କହିଥିଲେ । ହୀରାକୁଦ ଆଖପାଖରେ ଥିବା ଆକର୍ଷଣୀୟ ଜଳଭିତ୍ତିକ ପର୍ଯ୍ୟଟନକୁ ବିଶ୍ୱବିଦିତ କରିବା ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅଣ୍ଟା ଭିଡ଼ିଛନ୍ତି । ଫଳରେ ସ୍ଥାନୀୟ ଅର୍ଥନୀତି ସୁଦୃଢ଼ ହେବା ସହ ପରିବେଶ ଓ ବନ୍ୟପ୍ରାଣୀ ପର୍ଯ୍ୟଟନରେ ହୀରାକୁଦକୁ ବିଶ୍ୱସ୍ତରୀୟ ମାନ୍ୟତା ମିଳିବ ।
