ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ଇଣ୍ଡି ମେଣ୍ଟରେ ଅସନ୍ତୋଷ ଲାଗି ରହିଛି । ଆପ୍ ଏବଂ କଂଗ୍ରେସ ଏକାକୀ ନିର୍ବାଚନ ଲଢ଼ୁଥିବା ବେଳେ ଇଣ୍ଡି ମେଣ୍ଟର ଅନ୍ୟ ସଦସ୍ୟ ଦଳ କେଜ୍ରିଓ୍ବାଲଙ୍କୁ ସମର୍ଥନ ଦେଇଛନ୍ତି । ମମତା ବାନାର୍ଜୀ ଟିଏମସି ଏବଂ ଅଖିଳେଶ ଯାଦବଙ୍କ ଏସପି ଆମ ଆଦମୀ ପାର୍ଟି ପାଇଁ ନିଜର ସମର୍ଥନ ଘୋଷଣା କରିସାରିଛନ୍ତି । ଏହାକୁ ନେଇ କଂଗ୍ରେସ ଚିନ୍ତାରେ ପଡ଼ିଯାଇଛି । ଏହାକୁ ବିରୋଧ କରିବା ସହ ଦଳୀୟ ନେତା କହିଛନ୍ତି, ଇଣ୍ଡି ମେଣ୍ଟ ପାଇଁ କଂଗ୍ରେସ ବହୁତ କିଛି ହରାଉଛି ।
ନିକଟରେ ଅଖିଳେଶ ଯାଦବ ଦିଲ୍ଲୀରେ ଆପ୍ ଶକ୍ତିଶାଳୀ ଥିବାରୁ ତାକୁ ସମର୍ଥନ ଦେଉଛି ବୋଲି କହିଥିଲେ । ଏହା ଉପରେ କଂଗ୍ରେସର ସାଧାରଣ ସଂପାଦକ କେସି ବେଣୁଗୋପାଳ କହିଛନ୍ତି, ‘ଇଣ୍ଡି ମେଣ୍ଟରେ ଥିବା ସବୁ ଦଳର ଭାବନାକୁ ଆମେ ସମର୍ଥନ ଦେଉଛୁ । ସେମାନେ ବୁଝିବା ଦରକାର ଯେ, ଇଣ୍ଡି ମେଣ୍ଟ ପାଇଁ କଂଗ୍ରେସ ବହୁତ କିଛି ତ୍ୟାଗ କରୁଛି ।’
ସେ କହିଛନ୍ତି, ‘ଆମ ଦଳ କଂଗ୍ରେସ ମଧ୍ୟ ଦିଲ୍ଲୀରେ ନିର୍ବାଚନ ଲଢ଼ୁଛି । ଆମ ଏହି ଲଢ଼େଇର ଲକ୍ଷ୍ୟ ସ୍ପଷ୍ଟ ।’ ଏହା ପୂର୍ବରୁ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଥିଲେ, କଂଗ୍ରେସକୁ ଛାଡ଼ି ଆମେ ଆପ୍କୁ ସମର୍ଥନ ଦେବାର କାରଣ ହେଉଛି, ଆପ ଦିଲ୍ଲୀରେ ଶକ୍ତିଶାଳୀ ଏବଂ ବିଜେପିକୁ ହରାଇବା ଏହାର ପ୍ରାଥମିକ ଉଦ୍ଦେଶ୍ୟ ।
ଏହା ସହ ଅଖିଳେଶ ଯାଦବ କହିଥିଲେ, ‘ଯେଉଁ ଦଳ ଷ୍ଟ୍ରଙ୍ଗ ଥିବ ଏବଂ ବିଜେପିକୁ ଟକ୍କର ଦେଉଥିବ ସେହି ଦଳକୁ ସମର୍ଥନ ଦେବା ଦରକାର । ଆମର ମୁଖ୍ୟ ଉଦ୍ଦେଶ୍ୟ ବିଜେପିକୁ ହରାଇବା ହୋଇଥିବାରୁ ଯେଉଁ ପାର୍ଟି ଏହାକୁ ଟକ୍କର ଦେଇପାରିବ ତାକୁ ସମର୍ଥନ ଦେବାର ଆବଶ୍ୟକତା ରହିଛି । କଂଗ୍ରେସ, ଆପ୍ କିମ୍ବା ଏସପି ହେଉ ଯିଏ ଅଧିକ ଦାବିଦାର ସେହି ଦଳକୁ ସମର୍ଥନ ଦେବାକୁ ସେ ଇଣ୍ଡି ମେଣ୍ଟର ଅନ୍ୟ ସହଯୋଗୀ ଦଳଙ୍କୁ ପରାମର୍ଶ ମଧ୍ୟ ଦେଇଛନ୍ତି । ଅଖିଳେଶଙ୍କ ପରେ ପରେ ଟିଏମସି କେଜ୍ରିଓ୍ବାଲଙ୍କୁ ନିଜର ସମର୍ଥନ ଜଣାଇଥିଲା । ଟିଏମସି ସାଧାରଣ ସଂପାଦକ ଏବଂ ସାଂସଦ ଅଭିଷେଖ ବାନାର୍ଜୀ ପ୍ରଶ୍ନ କରିଥିଲେ ଯେ, ଆପ୍କୁ ସମର୍ଥନ ନକରି ଆମେ କାହିଁକି ବିଜେପିକୁ ସାହାଯ୍ୟ କରିବୁ ?
