ନୂଆଦିଲ୍ଲୀ, ୧୫।୧: ବର୍ତ୍ତମାନ ସୋସିଆଲ ମିଡିଆରେ ରିଲ୍ସ-ସର୍ଟ୍ସ ଭିଡିଓ ଦେଖିବା ନିଶା ଏକ ଟ୍ରେଣ୍ଡ ପାଲଟିଲାଣି । କେବଳ ଘରେ ନୁହେଁ ବରଂ ଅଫିସ୍, ବଜାରରେ ମଧ୍ୟ ଅନେକ ଲୋକ ବସି ବସି ରିଲ୍ ଦେଖୁଥିବାର ନଜର ଆସୁଛନ୍ତି । କିଛି ସମୟ ପାଇଲେ, କାହା ସହ କଥା ହେବା କିମ୍ବା ପଢ଼ିବା ଲାଗି ଚିନ୍ତା କରିବା ପରିବର୍ତ୍ତେ ପ୍ରଥମେ ମୋବାଇଲ ଖେଳାନ୍ତି । ଆଉ ମୋବାଇଲରେ ରିଲ୍ ଦେଖିବାରେ ବ୍ୟସ୍ତ ହୋଇଯାଆନ୍ତି । ରିଲ୍ସ ଦେଖୁ ଦେଖୁ କେତେବେଳେ ଯେ, ଘଣ୍ଟାଏ-ଦୁଇ ଘଣ୍ଟା ବିତିଯାଏ ତାହା ଜଣାପଡ଼େନି । କିନ୍ତୁ, କେବେ ଭାବିଛନ୍ତି କି ଆପଣ ଘଣ୍ଟା ଘଣ୍ଟା ଧରି ଦେଖୁଥିବା ଏହି ରିଲ୍ସ ଆଉ ସର୍ଟ୍ସ ଶରୀର ପାଇଁ କେତେ ବିପଦ ? 

ନିକଟରେ ଏକ ଅଧ୍ୟୟନରୁ ଚାଞ୍ଚଲ୍ୟକର ରିପୋର୍ଟ ସାମାକୁ ଆସିଛି । ଯାହା ଶୁଣିଲେ ଆପଣ ତାଜୁବ୍ ହୋଇଯିବେ । ବାୟୋମେଡ୍ ସେଣ୍ଟାଲ (BMC) ପତ୍ରିକାରେ ପ୍ରକାଶିତ ତଥ୍ୟ ଅନୁଯାୟୀ, ରିଲ୍ ଦେଖିବା କିମ୍ବା ସ୍କ୍ରିନ୍ ସମୟ ବଢ଼ାଇବା ଆପଣଙ୍କ ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇପାରେ । ଯଦି ଯୁବପିଢ଼ି ଶୋଇବା ସମୟରେ ସ୍କ୍ରିନରେ ଅଧିକ ସମୟ ବିତାଉଛନ୍ତି, ତେବେ ଅନ୍ୟମାନଙ୍କ ତୁଳନାରେ ସେମାନଙ୍କର ହାଇ ବିପି ହେବାର ଆଶଙ୍କା ବଢ଼ିଯାଏ । ଚୀନର ହେବେଇ ମେଡିକାଲ ୟୁନିଭର୍ସିଟି ଚୀନ୍‌ର ୪ ହଜାର ୩୧୮ ଜଣ ଯୁବା ଏବଂ ମଧ୍ୟବୟସ୍କଙ୍କ ଉପରେ ଏକ ଅଧ୍ୟୟନ କରିଥିଲା । ଏଥିରୁ ଜଣାପଡ଼ିଥିଲା ଯେ, ଯିଏ ଯେତେ ଅଧିକ ସମୟ ‘ରିଲ୍‌’ ଦେଖୁଛି, ସିଏ ସେତେ ଅଧିକ ଉଚ୍ଚ ରକ୍ତଚାପର ଶିକାର ହେଉଛି । ପାରମ୍ପରିକ ଭାବେ ଟିଭି ଦେଖିବା ବା କମ୍ପ୍ୟୁଟର ବ୍ୟବହାର କରିବା ଅଥବା ଭିଡିଓ ଗେମ୍‌ ଖେଳିବା ଅପେକ୍ଷା ଶୋଇବା ସମୟରେ ମୋବାଇଲ୍‌ରେ ‘ରିଲ୍‌’ ଦେଖିବାର ନକାରାତ୍ମକ ପ୍ରଭାବ ଅଧିକ ବୋଲି ଜଣାପଡ଼ିଛି । କାରଣ ଶୋଇବା ପୂର୍ବରୁ ମୋବାଇଲ୍‌ ପରଦାରେ ଦୃଷ୍ଟି ନିକ୍ଷେପ କରିବା ଦ୍ୱାରା ଶରୀରରେ ‘ସିମ୍ପାଥେଟିକ୍‌’ ଉତ୍ତେଜନା ସୃଷ୍ଟି ହୋଇଥାଏ । ଅର୍ଥାତ୍‌ ତାହା ‘ସିମ୍ପାଥେଟିକ୍‌’ ସ୍ନାୟବିକ କ୍ରିୟାକୁ ସକ୍ରିୟ କରିଥାଏ, ଯାହା ଶରୀରର ‘ଫାଇଟ୍‌-ଅର୍‌-ଫ୍ଲାଇଟ୍‌’ ପ୍ରତିକ୍ରିୟାକୁ ସଜାଗ କରିଥାଏ । 

ନିରନ୍ତର ରିଲ୍ ଦେଖିବା ଦ୍ୱାରା ଶରୀର ଏବଂ ମନ ସକ୍ରିୟ ରହିଥାଏ । ଯେଉଁ କାରଣରୁ ବିଶ୍ରାମ ମିଳେନାହିଁ । ଯାହା ଉଚ୍ଚ ରକ୍ତଚାପର କାରଣ ହୋଇପାରେ । ସ୍କ୍ରିନରେ ଅଧିକ ସମୟ ବିତାଇବା ଦ୍ୱାରା ନିଦର ଗୁଣବତ୍ତା ମଧ୍ୟ ଖରାପ ହୋଇଥାଏ । ଏପରିକି ଏହା ହୃଦ୍‌ପିଣ୍ଡ ଏବଂ ମସ୍ତିଷ୍କ ଉପରେ ଖରାପ ପ୍ରଭାବ ପକାଇଥାଏ । ଶରୀରର ବର୍ଦ୍ଧିତ ରକ୍ତଚାପ କମାଇବା ପାଇଁ କିମ୍ବା ରକ୍ତଚାପକୁ ସ୍ୱାଭାବିକ କରିବାକୁ ସୁସ୍ଥ ଜୀବନଶୈଳୀ ଆପଣେଇବା ସହ ଶୋଇବା ସମୟରେ ‘ରିଲ୍‌’ ଦେଖୁଥିଲେ, ଏବେଠୁ ସଜାଗ ହୋଇଯାନ୍ତୁ, ନଚେତ୍ ଆପଣ ବି ଏଭଳି ମାରାତ୍ମକ ରୋଗର ଶିକାର ହୋଇପାରନ୍ତି ।