ପୁରୀ,୨୯/୦୬: ଶରଧାବାଲିରେ ଅଘଟଣ । ମହାପ୍ରଭୁଙ୍କ ତିନି ରଥ ସାମ୍ନାରେ ବଡ଼ ଧରଣର ଠେଲାପେଲା । ଦଳାଚକଟାରେ ୩ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଅଭିଯୋଗ । ରବିବାର ଭୋର ୪ଟା ୫୦ରେ ଠେଲାପେଲା ହୋଇଥିବା ଅନୁମାନ କରାଯାଉଛି । ସମସ୍ତ ମୃତକ ଖୋର୍ଦ୍ଧା ଜିଲ୍ଲାର ବୋଲି ଜଣାପଡ଼ିଛି । ସେମାନଙ୍କ ମଧ୍ୟରୁ ଦୁଇ ଜଣ ମହିଳା, ପ୍ରଭାତୀ ଦାସ ଏବଂ ବାସନ୍ତୀ ସାହୁ ରଥ ସାମ୍ନାରେ ପ୍ରାଣ ହରାଇଛନ୍ତି । ଆଉ ଜଣେ ୭୦ ବର୍ଷୀୟ ବୃଦ୍ଧ ପ୍ରେମାକାନ୍ତ ମହାନ୍ତି ହସ୍ପିଟାଲରେ ପ୍ରାଣ ହରାଇଥିବା ସୂଚନା ରହିଛି । ଏନେଇ ଜିଲ୍ଲା ସ୍ୱାସ୍ଥ୍ୟ ଅଧିକାରୀ ପବିତ୍ର ମୋହନ ମଲ୍ଲିକ ସୂଚନା ଦେଇଛନ୍ତି ।
ଶ୍ରୀଗୁଣ୍ଡିଚା ମନ୍ଦିର ନିକଟରେ ଶ୍ରୀଜିଉଙ୍କୁ ଦର୍ଶନ ବେଳେ ଦଳାଚକଟା ଯୋଗୁଁ ୩ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟଣାକୁ ନେଇ ଟ୍ବିଟ୍ କରି ଦୁଃଖ ପ୍ରକାଶ କରିଛନ୍ତି ଆଇନ ମନ୍ତ୍ରୀ ପୃଥ୍ବୀବରାଜ ହରିଚନ୍ଦନ । ମହାପ୍ରଭୁଙ୍କ ନିକଟରେ ପରଲୋକଗତ ଆତ୍ମାର ସଦଗତି କାମନା କରିବା ସହିତ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି । ଏଥିସହ ସମସ୍ତ ଆହତ ବ୍ୟକ୍ତିମାନଙ୍କ ଆଶୁଆରୋଗ୍ୟ କାମନା କରିଛନ୍ତି ଆଇନ ମନ୍ତ୍ରୀ ।
ଏହି ଅଘଟଣ ପରେ ପୁଲିସ ଡିଜି ୱାଇ ବି ଖୁରାନିଆ ମଧ୍ୟ ନିଜର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଯେ, ରଥଯାତ୍ରାରେ ପ୍ରବଳ ଭିଡ଼ ହୋଇଛି । ଲୋକମାନେ କିପରି ସୁରକ୍ଷା ସହିତ ଦର୍ଶନ କରିପାରିବେ, ସେନେଇ ଆମର ପ୍ରାୟସ ରହିଛି । ମୁଁ ସମସ୍ତଙ୍କୁ ଅନୁରୋଧ କରୁଛି, ଆପଣମାନେ ବିଭିନ୍ନ ସ୍ଥାନରେ ପୁଲିସର ନିର୍ଦ୍ଦେଶ ପାଳନ କରନ୍ତୁ । ଅନେକ ସ୍ଥାନରେ ଲୋକମାନେ ଠିଆ ହୋଇ ସେମାନଙ୍କ ଫୋନ୍ରୁ ଫଟୋ ଫଠାଉଛନ୍ତି । ସେଥିପାଇଁ ଅସୁବିଧା ହେଉଛି । ତେଣୁ ଆପଣମାନେ ସହଯୋଗ କରନ୍ତୁ । ଆଜି ସକାଳେ ଯେଉଁ ଘଟଣା ହୋଇଛି, ତାହାର ଯାଞ୍ଚ ଚାଲିଛି । ଆବଶ୍ୟକୀୟ ପଦକ୍ଷେପ ନିଆଯାଉଛି ।
