ପୁରୀ, ୨୭/୦୬: ଆଜି ଶ୍ରୀଗୁଣ୍ଡିଚା ଯାତ୍ରା । ବଡ଼ଦେଉଳ ଛାଡ଼ି ବଡ଼ଦାଣ୍ଡକୁ ଆସୁଛନ୍ତି କାଳିଆ ସାଆନ୍ତେ । ଯାତ୍ରା ପାଇଁ କାହାରିକୁ ତର ନାହିଁ । ବଡ଼ଦେଉଳରେ ବଡ଼ଠାକୁରଙ୍କ ଯାତ୍ରା ପ୍ରସ୍ତୁତିରେ ବ୍ୟସ୍ତ ସେବକ ଓ ପ୍ରଶାସକ । ବାହାରେ ଉତ୍କଣ୍ଠିତ ରଥ, ପଥ ଓ ଭକ୍ତ । ୫୮ ଦିନ ଧରି ରୂପ ପାଉଥିଲେ ତିନି ରଥ । ୧୧ ମାସରୁ ଉଦ୍ଧ୍ୱର୍ ସମୟ ବିଛେଦ ବେଦନା ଭୋଗୁଛି ବିଜେ ପଥ । ବିଶ୍ୱବାସୀଙ୍କୁ ପ୍ରତିଶ୍ରୁତି ଦେଇଥିଲେ ବ୍ରହ୍ମାଣ୍ଡପତି । ନନ୍ଦିଘୋଷ, ତାଳଧ୍ୱଜ ଓ ଦେବଦଳନରେ ରଥାରୂଢ଼ ହେବେ ଦାରୁବ୍ରହ୍ମ ।
ଶୁକ୍ରବାର ଶ୍ରୀଗୁଣ୍ଡିଚା ଯାତ୍ରା ଆଣିଦେବ ମିଳନର ସେହି ଦିବ୍ୟ ମୁହୂର୍ତ୍ତ । ଏକାକାର ହେବେ ଅଗଣିତ ଭକ୍ତ ଓ ସେମାନଙ୍କ ପ୍ରଭୁ ଶ୍ରୀଜଗନ୍ନାଥ । ଶ୍ରୀମନ୍ଦିର ପ୍ରଶାସନର ଶ୍ରୀଗୁଣ୍ଡିଚା ନୀତି ନିର୍ଘଣ୍ଟ ଅନୁସାରେ ଶ୍ରୀବିଗ୍ରହଙ୍କ ପହଣ୍ଡି ପୂର୍ବାହ୍ନ ସାଢେ ୯ଟାରେ ଅନୁଷ୍ଠିତ ହେବ । ଅପରାହ୍ନ ୪ଟାରେ ଆରମ୍ଭ ହେବ ରଥଟଣା । ଆଜ୍ଞାମାଳ ପାଇ ରଥତ୍ରୟ ସିଂହଦ୍ୱାରରେ ପହଞ୍ଚିଛି । ସକାଳ ୬ଟାରେ ମଙ୍ଗଳାଳତି, ୬ଟା୧୦ରେ ମଇଲମ, ସାଢେ ୬ରେ ତଡ଼ପ ଲାଗି ଓ ରୋଷ ହୋମ, ୭ଟାରେ ଅବକାଶ, ୭ଟା ୧୦ରେ ସୂର୍ଯ୍ୟପୂଜା, ସାଢେ ୭ଟାରେ ଦ୍ୱାରପାଳ ପୂଜା ନୀତି ବଢ଼ି ବେଶ ଶେଷ ହେବ । ଗୋପାଳବଲ୍ଲଭ ଓ ସକାଳଧୂପରେ ଖେଚୁଡ଼ି ଭୋଗ ୮ଟାରୁ ୯ଟା ମଧ୍ୟରେ ସରି ରଥ ପ୍ରତିଷ୍ଠା ହେବ । ୯ଟା ୧୫ମିନିଟ୍ରେ ମଙ୍ଗଳାର୍ପଣ ସରି ଦାରୁଦିଅଁଙ୍କ ପହଣ୍ଡି ଆରମ୍ଭ ହେବ ସାଢେ ୯ଟାରେ । ଅପରାହ୍ନ ସାଢେ ୧୨ଟାରେ ପହଣ୍ଡି ସରିବ । ୧ଟା ମଧ୍ୟରେ ଶ୍ରୀମଦନମୋହନ ଓ ଶ୍ରୀରାମଶ୍ରୀକୃଷ୍ଣ ରଥରେ ବିଜେ ହେବେ ।
ଅପରାହ୍ନ ୨ଟା ସୁଦ୍ଧା ଠାକୁରଙ୍କୁ ଚିତା ଲାଗି କରାଯିବ । ସାଢେ ୨ଟାରେ ଠାକୁରଙ୍କ ବେଶ ଶେଷ ହେବ । ସାଢେ ୨ରୁ ସାଢେ ୩ ମଧ୍ୟରେ ଗଜପତିଙ୍କ ଛେରାପହଁରା ସରିବ । ୪ଟା ମଧ୍ୟରେ ଚାରମାଳ ଫିଟା, ଘୋଡ଼ା ଓ ସାରଥି ଲାଗିବ । ରଥ ଟଣା ଅପରାହ୍ନ ୪ଟାରେ ଆରମ୍ଭ ହେବ ବୋଲି ସୂଚନା ମିଳିଛି । ୧୪ ଦିନର ପ୍ରତୀକ୍ଷା ପରେ ଗୁରୁବାର ଆସିଲା ମିଳନ ମୁହୂର୍ତ୍ତ ।
ବଡ଼ଦେଉଳରେ ମହାପ୍ରଭୁ ଅପରୂପ ନବଯୌବନ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି । ଠାକୁରେ ଅଣସର ପିଣ୍ଡିରୁ ବାହୁ ପ୍ରସାରି ଭକ୍ତଙ୍କୁ କୋଳେଇ ନେଉଥିଲେ । କାଳିଆ ସାଆନ୍ତଙ୍କୁ ସମ୍ମୁଖରେ ପାଇ ଭାବ ବିହ୍ୱଳ ହେଉଥିଲେ ଭକ୍ତ । ନିର୍ଦ୍ଧାରିତ ସମୟ ପୂର୍ବରୁ ସକାଳ ୭ଟା ୪୦ମିନିଟ୍ରେ ଆରମ୍ଭ ହୋଇଥିଲା ଠାକୁରଙ୍କ ନବଯୌବନ ଦର୍ଶନ ।
ପ୍ରଥମେ ପରିମାଣିକ ଟିକଟ ଦର୍ଶନ ହେବା ପରେ ସର୍ବସାଧାରଣ ଦର୍ଶନ ଅନୁଷ୍ଠିତ ହୋଇଥିଲା । ଅପରାହ୍ନରେ କିଛି ସମୟ ଭକ୍ତମାନେ ବାରିକେଡ଼ ଭିତରେ ଯାଇ ବାହାର କାଠ ନିକଟରେ ଠାକୁରଙ୍କୁ ଦର୍ଶନ କରିଥିଲେ । ଗୁରୁବାର ଲକ୍ଷାଧିକ ଭକ୍ତ ମହାପ୍ରଭୁଙ୍କ ନବଯୌବନ ଦର୍ଶନ କରିଥିଲେ । ତେବେ ଠାକୁରଙ୍କ ଯାତ୍ରାକାଳୀନ ନୀତିର ବ୍ୟସ୍ତତା ଦୃଷ୍ଟିରୁ ଅଧିକ ସମୟ ଦର୍ଶନ ସୁଯୋଗ ମିଳି ନଥିଲା । ରଥଯାତ୍ରା ପାଇଁ ଆଜି ଅପରାହ୍ନରୁ ବଡ଼ଦାଣ୍ଡରେ ଭକ୍ତଙ୍କ ଭିଡ଼ ପରିଲକ୍ଷିତ ହେଲାଣି । ମହାପ୍ରଭୁଙ୍କ ଦର୍ଶନ ପାଇଁ ବଡ଼ଦାଣ୍ଡରେ ଆକୁଳ ହେଉଛନ୍ତି ହଜାର ଶ୍ରଦ୍ଧାଳୁ । ଭଜନ କୀର୍ତ୍ତନରେ କମ୍ପୁଛି ବଡ଼ଦାଣ୍ଡ । ସବୁରି ପ୍ରତୀକ୍ଷା ସେହି ଦିବ୍ୟ କ୍ଷଣକୁ । କେତେବେଳେ ସିଂହଦ୍ୱାର ଗୁମୁଟରୁ ଦିଶିବ ମୟୂରପୁଛିଆ ଟାହିଆ । ପହଣ୍ଡି ହୋଇ ଆସି ରଥାରୂଢ଼ ହେବେ ଶ୍ରୀଜିଉ । ବିଶାଳ ଜନସମୁଦ୍ର ମଧ୍ୟରେ ଅନୁଷ୍ଠିତ ହେବ ଠାକୁରଙ୍କ ଘୋଷଯାତ୍ରା । ରଥ ଯାତ୍ରାରେ ସେବା ପ୍ରଦାନ ପାଇଁ ସହସ୍ରାଧିକ ସ୍ୱେଚ୍ଛାସେବୀ ମଧ୍ୟ ପ୍ରସ୍ତୁତି ସାରିଛନ୍ତି ।
