ମାନେଶ୍ବର/ପିଆବାହାଲ, ୧୮/୫ : ପିଆବାହାଲ ରେଞ୍ଜ ହିରୋ ମୌଜା ମଜୁରିଆପଡ଼ା ନିକଟରେ ଆଜି ରାତି ପ୍ରାୟ ୮ଟାରେ ଜଣେ ସାଇକଲ ଆରୋହୀ ବୃଦ୍ଧଙ୍କୁ ହାତୀ ଦଳି ଦେଇଛି। ମୃତକ ଜଣକ ନିକଟସ୍ଥ ଡଙ୍ଗରପଡ଼ା ଚିଲିକାମ ଗାଁର ଶ୍ୟାମସୁନ୍ଦର ପ୍ରଧାନ(୬୫)। ଖବର ଲେଖାଯିବା ପର୍ଯ୍ୟନ୍ତ ତାଙ୍କ ମୃତ ଦେହ ଘଟଣାସ୍ଥଳରେ ପଡ଼ି ରହିଛି। ଘଟଣାସ୍ଥଳରେ ବନ କର୍ମଚାରୀ ଓ ଯୁଯୁମୁରା ପୋଲିସ୍ ପହଞ୍ଚି ତଦନ୍ତ କରୁଛନ୍ତି।
ସୂଚନା ଅନୁସାରେ ଶ୍ୟାମସୁନ୍ଦର ସାଇକଲ ଯୋଗେ କୌଣସି କାମରେ ନିକଟସ୍ଥ ଜଙ୍ଗଲ ଦେଇ ଏକ କିଲୋମିଟର ଦୂର ନୂଆଁମୁଣ୍ଡା ଗାଁକୁ ଯାଇଥିଲେ। ସେଠାରୁ ରାତିରେ ଘରକୁ ଫେରୁଥିବା ସମୟରେ ଏହି ଅଘଟଣ ଘଟିଛି। ବାଟରେ ମଜୁରିଆପଡ଼ାଠାରେ ଶ୍ୟାମସୁନ୍ଦର ଏକ ଛଅ ଘରିଆ ହାତୀପଲଙ୍କ ହାବୁଡ଼ ପଡ଼ିଯାଇଥିଲେ। ହାତୀ ତାଙ୍କୁ ଦଳି ଦେଇଥିବା ସନ୍ଦେହ କରାଯାଉଛି। ଦୀର୍ଘ ସମୟ ଧରି ଘରକୁ ନ ଫେରିବାରୁ ପରିବାର ଲୋକ ତାଙ୍କୁ ଖୋଜିବାକୁ ଯାଇଥିଲେ। ପଡ଼ୋଶୀ ଓ ସ୍ଥାନୀୟ ଲୋକଙ୍କ ସହ ଖୋଜାଖୋଜି କରିବା ପରେ ମଜୁରିଆପଡ଼ା ନିକଟରେ ତାଙ୍କର ମୃତଦେହ ମିଳିଥିଲା। ପ୍ରାଥମିକ ତଦନ୍ତରୁ ଏହା ହାତୀ ଆକ୍ରମଣରେ ମୃତ୍ୟୁ ହୋଇଥିବା ବନ ବିଭାଗ କହିଛି। କିନ୍ତୁ ଶବ ବ୍ୟବଚ୍ଛେଦ ପରେ ଘଟଣା ସତ ଜଣାପଡ଼ିବ ବୋଲି ସମ୍ବଲପୁର ଏସିଏଫ୍ କହିଛନ୍ତି।
