ବୌଦ୍ଧ,୧୮/୫ : ବୌଦ୍ଧଗଡ଼ ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ଦାବିପତ୍ରରେ ବୌଦ୍ଧଗଡ଼ ବିଜ୍ଞାପିତ ଅଞ୍ଚଳ ପରିଷଦ ୧୯୬୧ମସିହାରେ ସ୍ଥାପିତ ହୋଇ ୧୯୯୪ ମସିହାଠାରୁ ଜିଲ୍ଲାର ସଦର ମହକୁମା ମାନ୍ୟତା ପାଇଥିଲେ ମଧ୍ୟ ଆଜି ପର୍ଯ୍ୟନ୍ତ ଏହାକୁ ପୌରପରିଷଦର ମାନ୍ୟତା ମିଳିନାହିଁ । ବର୍ତ୍ତମାନ ବୌଦ୍ଧ ପଞ୍ଚାୟତ ସମିତିର ମୃଷୁଣ୍ଡି ପଞ୍ଚାୟତର ଟୁଟୁସିଙ୍ଗା, ଯୋଗୀବେରୁଣୀ, ପଲାସ, ତେତେଲେଙ୍ଗା ଓ ହରଭଙ୍ଗା ପଞ୍ଚାୟତ ସମିତିର ସରସରା ପଞ୍ଚାୟତର କାଲେଶ୍ବର, ସାନବାଗବର, ମାଉଲସିଙ୍ଗା, ସାନବୁଟୁପାଲି, ରଇଠାଣି ରାଜସ୍ବ ଗ୍ରାମକୁ ମିଶାଇ ପୌରପରିଷଦ ଘୋଷଣା କରାଯାଉ ।
ବୌଦ୍ଧ ସହର ପାର୍ଶ୍ଵ ଦେଇ ମହାନଦୀ ପ୍ରବାହିତ ହେଉଥିଲେ ସୁଦ୍ଧା ବର୍ଷାଋତୁ ବ୍ୟତୀତ ଅନ୍ୟ ସମୟରେ ଅଞ୍ଚଳବାସୀ ଉତ୍କଟ ପାନୀୟ ଜଳ ସମସ୍ୟାର ସମ୍ମୁଖୀନ ହୋଇ ଆସୁଛନ୍ତି । ମହାନଦୀ ଗର୍ଭରେ ଏକ ଆଡି ବନ୍ଧ ନିର୍ମାଣ ପାନୀୟଜଳ ସମସ୍ୟାକୁ ସମାଧନ କରିବା ଦିଗରେ ସହାୟକ ହେବା ସହ ସହର ତାପମାତ୍ରାକୁ ନିୟନ୍ତ୍ରଣ କରାଯାଇପାରିବ । କଳା ଓ ସ୍ଥାପତ୍ୟର ଐତିହ୍ୟ, ମଣ୍ଡନ କରୁଥିବା ରାମେଶ୍ବର ମନ୍ଦିର ଓ ଗନ୍ଧରାଡି ମନ୍ଦିର ପ୍ରତ୍ନତତ୍ତ୍ୱ ବିଭାଗ ଅଧିନରେ ଥିଲେ ମଧ୍ୟ ଏହାର ରକ୍ଷଣାବେକ୍ଷଣ । ପାରିପାର୍ଶ୍ଵକ ଉନ୍ନତି କରଣରେ କୌଣସି ବିଶେଷ ପଦକ୍ଷେପ ନିଆଯାଉ ନଥିବାରୁ ଏହାର କଳେବର ଦିନକୁ ଦିନ ହ୍ରାସ ଘଟୁଛି ।
ଏହାର ପାରିପାର୍ଶ୍ବିକ ଉନ୍ନତିକରଣ ସହିତ ରାଜ୍ୟ ପର୍ଯ୍ୟଟନ ମାନଚିତ୍ରରେ ଐତିହାସିକ କୀର୍ତ୍ତୀରାଜିକୁ ମାନ୍ୟତା କରାଯିବା, ବୌଦ୍ଧ ଶ୍ରୀ ଶ୍ରୀରାମଲୀଳା ଯାତ୍ରା ଏକ ଗଣପର୍ବର ଆଖ୍ୟା ପାଇଥିଲେ ମଧ୍ୟ ରାଜ୍ୟ ସରକାରଙ୍କ ମାନ୍ୟତା ପାଇ ନାହିଁ । ଏଣୁ ଏ ଦିଗରେ ବିହିତ ପଦକ୍ଷେପ ଗ୍ରହଣ ପୂର୍ବକ ରାଜ୍ୟ ସରକାର ମାନ୍ୟତା ପ୍ରଦାନ କରିବାକୁ ଏନଏସି ପକ୍ଷରୁ ଦାବି କରାଯାଇଥିଲା । ବୌଦ୍ଧ ଗଡ଼ ବିଜ୍ଞାପିତ ଅଞ୍ଚଳ ପରିଷଦ ଅଧ୍ୟକ୍ଷ ମୃତ୍ୟୁଞ୍ଜୟ ମିଶ୍ର, ଉପାଧ୍ୟକ୍ଷ ସୁଭାଷିନୀ ସେଠୀଙ୍କ ସମେତ ପରିଷଦର କାଉନସିଲରମାନେ ଦାବିପତ୍ର ପ୍ରଦାନ ଥିଲେ।
