କେସିଙ୍ଗା, ୧୯।୫: କଳାହାଣ୍ଡି ଜିଲ୍ଲା କେସିଙ୍ଗା ଏନ୍ଏସିକୁ ପୌର ପରିଷଦ କରିବା ପାଇଁ ଦାବି ହୋଇଆସୁଥିଲା । ଏବେ ସରକାରଙ୍କ ପକ୍ଷରୁ ଏନେଇ ଆରମ୍ଭ ହୋଇଛି ପ୍ରକ୍ରିୟା । କେସିଙ୍ଗା ଏନ୍ଏସିକୁ ପୌର ପରିଷଦ କରାଗଲେ କନ୍ତେଶିର, ସିରୋଲ ଓ ଲଇତରା ପଞ୍ଚାୟତ ଅଞ୍ଚଳକୁ ସାମିଲ କରାଯିବ । ଏନେଇ ସମ୍ପୃକ୍ତ ପଞ୍ଚାୟତ ଅଞ୍ଚଳରେ ସ୍ବତନ୍ତ୍ର ପଲ୍ଲୀସଭା ଆୟୋଜନ କରାଯାଇ ଲୋକଙ୍କଠାରୁ ସହମତି ନିଆଯାଉଛି । ହେଲେ ସରକାରଙ୍କ ପ୍ରସ୍ତାବକୁ ସ୍ବତନ୍ତ୍ର ପଲ୍ଲୀସଭା ବୈଠକରେ ବିରୋଧ କରାଯାଉଥିବା ଦେଖିବାକୁ ମିଳିଛି । ପ୍ରସ୍ତାବିତ କେସିଙ୍ଗା ପୌର ପରିଷଦ ପାଇଁ କନ୍ତେଶିର ପଞ୍ଚାୟତ ଓ୍ବାର୍ଡ ନମ୍ବର ୧୨ ଓ ୧୩ ଅଧିନସ୍ଥ କୁର୍ଲୁପଡ଼ା ଏବଂ ନୂଆପଡ଼ା ମୌଜା ଅଞ୍ଚଳକୁ ଏଥିରେ ଅନ୍ତର୍ଭୁକ୍ତ କରିବା ପାଇଁ ପ୍ରସ୍ତାବ ରହିଛି ।
ସରକାରଙ୍କ ଚିଠି ଅନୁଯାୟୀ, ଏକ ସ୍ବତନ୍ତ୍ର ପଲ୍ଲୀସଭା କରିବା ପାଇଁ କନ୍ତେଶିର ପଞ୍ଚାୟତକୁ ଚିଠି ହୋଇଥିଲା । ଚିଠି ଅନୁସାରେ ସରକାରୀ ପ୍ରାଥମିକ ବିଦ୍ୟାଳୟ, କୁର୍ଲୁପଡ଼ା ପରିସରରେ ପଞ୍ଚାୟତ ପକ୍ଷରୁ ଆଜି ଏକ ସ୍ଵତନ୍ତ୍ର ପଲ୍ଲୀସଭା ଅନୁଷ୍ଠିତ ହୋଇଯାଇଛି । ସରପଞ୍ଚ ମମତା ରାଣୀ ନାଏକଙ୍କ ଉପସ୍ଥିତିରେ କୁର୍ଲୁପଡ଼ା ଓ ନୂଆପଡ଼ା ମୌଜା ଅଞ୍ଚଳର ଜନସାଧାରଣ ଯୋଗଦାନ କରିଥିଲେ । ଅନ୍ୟମାନଙ୍କ ମଧ୍ୟରେ ସମିତି ସଭ୍ୟ ପିଙ୍କି ମାଝୀ, ନାଏବ ସରପଞ୍ଚ ଯୋଗେନ୍ଦ୍ର ସାହୁ, ସ୍ଥାନୀୟ ଓ୍ବାର୍ଡ ସଭ୍ୟ ଭକ୍ତ ଚରଣ ସାହୁ ଓ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଆକାଶ କୁମାର ଭୋଇ ପ୍ରମୁଖ ଉପସ୍ଥିତ ରହିଥିଲେ । ପ୍ରସ୍ତାବିତ ପୌର ପରିଷଦରେ କୁର୍ଲୁପଡ଼ା ଓ ନୂଆପଡ଼ାକୁ ସାମିଲ କରିବା ବିଷୟ ଉପରେ ଆଜି ଅନୁଷ୍ଠିତ ସ୍ବତନ୍ତ୍ର ପଲ୍ଲିସଭା ବୈଠକରେ ଆଲୋଚନା କରାଯାଇଥିଲା । ବୈଠକରେ ଉପସ୍ଥିତ ଜନସାଧାରଣ ତାହାକୁ ବିରୋଧ କରି ପ୍ରସ୍ତାବିତ କେସିଙ୍ଗା ପୌର ପରିଷଦରେ ସାମିଲ ନହେବା ପାଇଁ ସର୍ବସମ୍ମତିକ୍ରମେ ପ୍ରସ୍ତାବ ଆଗତ କରାଯାଇଛି । ଯଦି ସରକାରଙ୍କ ପକ୍ଷରୁ ଜୋର ଜବରଦସ୍ତ କରାଯାଏ ତେବେ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି ।
