ବଲାଙ୍ଗୀର ୧୮/୦୫ : ବଲାଙ୍ଗିର ଜିଲ୍ଲା ବେଲପଡାର ଠିକାଦାର ପ୍ରଶାନ୍ତ ନିଆଲଙ୍କୁ ହତ୍ୟା ହୋଇଥିବା ନେଇ ଅଭିଯୋଗ ଆଣିଛନ୍ତି ପରିବାର ଏବଂ ଗ୍ରାମବାସୀ। ଏନେଇ ବେଲପଡା ପୋଲିସ ପୋତା ଯାଇଥିବା ଶବକୁ ମାଟି ଭିତରୁ ବାହାର କରି ପୁଣିଥରେ ଶବ ବ୍ୟବଚ୍ଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି । ପରିବାର ଲୋକ ମୃତଦେହକୁ ଘରକୁ ଆଣି ଦାହ କରିଥିବା ଜଣାପଡିଛି।
ସୂଚନା ଅନୁଯାୟୀ, ୮ ତାରିଖ ଦିନ ଠିକାଦାର ପ୍ରଶାନ୍ତ ନିଆଲ ଏବଂ ଅନ୍ୟ ୩ ଜଣ ରାୟପୁର ଯାଇଥିଲେ। ରାୟପୁରରୁ ୩ ଜଣ ବେଲପଡ଼ା ଫେରି ଆସିଥିବା ବେଳେ ପ୍ରଶାନ୍ତଙ୍କ କୌଣସି ଖୋଜ ଖବର ନଥିଲା। ପରେ ଛତିଶଗଡର ରାୟପୁର ଜିଲ୍ଲା ଆରଙ୍ଗ ରେଳ ଟ୍ରାକ ଉପରେ ତାହ୍କ ମୃତଦେହକୁ ଉଦ୍ଧାର କରିଥିଲା ଆରଙ୍ଗ ପୋଲିସ । ପୋଲିସ ମୃତଦେହକୁ ଜବତ କରି ୟୁ ଡି କେସ ନଂ ୫୨/୨୦୨୫ରେ ଏକ ମାମଲା ଋଜୁ କରିଥିଲା । ତେବେ ମୃତଦେହର ପରିଚୟ ନପାଇ ପୋଲିସ ୭୨ ଘଣ୍ଟା ପରେ ମାଟିରେ ପୋତି ଦେଇଥିବା ଖବର ପାଇଥିଲେ ପରିବାର । ଏହା ଦେଖି ପରିବାର ଲୋକେ ପ୍ରଶାନ୍ତଙ୍କ ହତ୍ୟା ହୋଇଥିବା ଅଭିଯୋଗ କରିବା ସଙ୍ଗେସଙ୍ଗେ ବେଲପଡା ଥାନା ଘେରାଉ ଏବଂ ରାସ୍ତାରୋକ କରିଥିଲେ । ଅନ୍ୟପଟେ ଘଟଣାଟି ଛତିଶଗଡ ରାଜ୍ୟ ରାୟପୁର ଜିଲ୍ଲା ଆରଙ୍ଗ ଅଞ୍ଚଳରେ ହୋଇଥିବାରୁ ଆରଙ୍ଗ ପୋଲିସ ଘଟଣାର ତଦନ୍ତ କରୁଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି ।
