ନୂଆଦିଲ୍ଲୀ: ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) ସହ ବଡ଼ ଚୁକ୍ତି କରିଛି ପ୍ରତିରକ୍ଷା ମନ୍ତ୍ରାଳୟ । ଏହି ଚୁକ୍ତି ପରେ ଉଭୟ କମ୍ପାନି ଏବଂ ନିବେଶକଙ୍କୁ ଭଲ ଫାଇଦା ମିଳିବ । ଏବେ ହାଲ୍ ବାୟୁସେନା ଲାଗି ଫାଇଟର ଜେଟ୍ ସୁଖୋଇ-୩୦ଏମକେଆଇ ଏୟାରକ୍ରାଫ୍ଟ ପାଇଁ ୨୪୦ ଏରୋ ଇଞ୍ଜିନ ତିଆରି କରିବ । ଏଥିପାଇଁ ପ୍ରତିରକ୍ଷା ମନ୍ତ୍ରାଳୟ ହାଲ୍ ସହ ୨୬ ହଜାର କୋଟି ଟଙ୍କାର ଡିଲ୍ କରିଛି ।
ଏହା ଦ୍ବାରା କେନ୍ଦ୍ର ସରକାର ‘ଆତ୍ମନିର୍ଭର ଭାରତ’କୁ ପ୍ରୋତ୍ସାହନ ଦେବାକୁ ଚେଷ୍ଟା କରିଛନ୍ତି ବୋଲି କୁହାଯାଉଛି । ହାଲ୍କୁ ଏରୋ-ଇଞ୍ଜିନ ତିଆରି ପାଇଁ ବଡ଼ ଅଫର ମିଳିଥିବାରୁ ବାୟୁସେନାର ଫାଇଟର ଜେଟ୍ ସୁଖୋଇ ସଂଖ୍ୟାରେ ବୃଦ୍ଧି ଘଟିବ । ଆଜି (ସୋମବାର) ପ୍ରତିରକ୍ଷା ସଚିବ ଗିରିଧର ଅରମାନେ ଏବଂ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶଲ ବିଆର ଚୌଧୁରୀଙ୍କ ଉପସ୍ଥିତିରେ ପ୍ରତିରକ୍ଷା ମନ୍ତ୍ରାଳୟ ଏବଂ ଏଚଏଏଲ୍ ମଧ୍ୟରେ ଚୁକ୍ତି ସ୍ବାକ୍ଷର ହୋଇଛି ।
ଚୁକ୍ତି ଅନୁଯାୟୀ ହାଲ୍ ଏହି ୨୪୦ଟି ଏରୋ ଇଞ୍ଜିନ୍ ଆଗାମୀ ୮ ବର୍ଷ ମଧ୍ୟରେ ବାୟୁସେନାକୁ ଦେବ । ହାଲ୍ର କୋରାପୁଟ ଡିଭିଜନ୍ ଦ୍ବାରା ଏହି ଇଞ୍ଜିନ୍ ତିଆରି କରାଯିବ । ସୁଖୋଇ-୩୦ର ପରିଚାଳନାଗତ କ୍ଷମତା ଜାରି ରଖିବା ସହ ଭାରତୀୟ ବାୟୁସେନାର ଚାହିଦା ପୂରଣ ଦିଗରେ ଏହି ଚୁକ୍ତି ବେଶ ସହାୟକ ହେବ ବୋଲି କୁହାଯାଉଛି। ସେପଟେ ଡିକେ ସୁନୀଲ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡର ନୂଆ ଅଧ୍ୟକ୍ଷ ନିଯୁକ୍ତ ହୋଇଛନ୍ତି । ଏହା ପୂର୍ବରୁ ଡିକେ ସୁନୀଲ କମ୍ପାନିର ଅତିରିକ୍ତ ଚେୟରମ୍ୟାନ୍ ଏବଂ ଏମଡି ଦାୟିତ୍ବରେ ଥିଲେ ।