ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପହଲଗାମରେ ଏପ୍ରିଲ ୨୨, ୨୦୨୫ରେ ହୋଇଥିବା ଏକ ଆତଙ୍କୀ ଆକ୍ରମଣରେ ଅତି କମରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି। ଯେଉଁଥିରେ ଦୁଇ ଜଣ ବିଦେଶୀ ନାଗରିକଙ୍କ ସହ ଦୁଇଜଣ ସ୍ଥାନିୟ ଲୋକ ମଧ୍ୟ ରହିଛନ୍ତି। ଅନେକ ପର୍ଯ୍ୟଟକ ଏହି ଆକ୍ରମଣରେ ଆହତ ହୋଇଛନ୍ତି। ଏହା ସାମ୍ପ୍ରତିକ ବର୍ଷଗୁଡ଼ିକରେ କାଶ୍ମୀରରେ ହୋଇଥିବା ସବୁଠାରୁ ମର୍ମନ୍ତୁଦ ଆକ୍ରମଣମାନଙ୍କ ମଧ୍ୟରୁ ଗୋଟିଏ।

ଘଟଣାର ବିବରଣୀ

ମଧ୍ୟାହ୍ନ ୨:୩୦ ସମୟରେ, ପହଲଗାମର ବୈସାରଣ ମେଡୋରେ 5ରୁ 6 ଜଣ ଆତଙ୍କୀ ସୈନ୍ୟ ପୋଷାକରେ ସଜ୍ଜିତ ହୋଇ ପର୍ଯ୍ୟଟକମାନଙ୍କ ଉପରେ ଅତର୍କିତ ଗୁଳିଚାଳନା କରିଥିଲେ। ବର୍ତ୍ତମାନ ସାମାଜିକ ଗଣମାଧ୍ୟମରେ ଭାଇରାଲ ହେଉଥିବା ଭିଡିଓରେ ଦେଖାଯାଇଛି ଯେ ଗୁଳିମାଡ ପରେ ପର୍ଯ୍ୟଟକଙ୍କ ମୃତ ଶରୀର ଚାରିଆଡ଼େ ଇତସ୍ତତ ଭାବେ ପଡ଼ିରହିଥିଲା। ସେମାନଙ୍କ ସମ୍ପର୍କୀୟମାନେ ଖୁବ୍ ଜୋରରେ ଚିତ୍କାର କରୁଥିବା ମଧ୍ୟ ଦେଖା ଯାଇଛ। ସେଠାରେ ଉପସ୍ଥିତ ଥିବା ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ, "ଗୁଳିର ଶବ୍ଦ ଶୁଣି ଆମେ ଦୌଡ଼ିଥିଲୁ। କିନ୍ତୁ ଲୁଚିବାର ସ୍ଥାନ ସେଠାରେ ଉପସ୍ଥିତ ନଥିଲା।"

ଆତଙ୍କୀ ସଂଗଠନର ସମ୍ପୃକ୍ତି

ଏହି ଆକ୍ରମଣ ପାଇଁ ଟିଆରଏଫ ଦ ରେସିଷ୍ଟାନ୍ସ ଫ୍ରଣ୍ଟ (ଟିଆରଏଫ), ଯାହା ଲସ୍କର-ଏ-ତୋଇବାର ଏକ ଛାୟା ଦଳ ଭାବେ ଜଣାଶୁଣା ନିଜକୁ ଦାୟି କରିଛି। ଗୁଇନ୍ଦା ସୂତ୍ର ଅନୁଯାୟୀ, ୫-୬ ଜଣ ପାକିସ୍ତାନୀ ଆତଙ୍କୀ ଏହି ଯୋଜନାବଦ୍ଧ ଆକ୍ରମଣ କରିଥିଲେ। ଯାହାର ମୁଖ୍ୟ ଲକ୍ଷ୍ୟ କାଶ୍ମୀରର ଶାନ୍ତି ଓ ପର୍ଯ୍ୟଟନ ଶିଳ୍ପକୁ କ୍ଷତି ପହଞ୍ଚାଇବା ଥିଲା ବୋଲି ଜଣାପଡିଛି।

ସରକାରୀ ପ୍ରତିକ୍ରିୟା

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଆକ୍ରମଣକୁ କଡା ନିନ୍ଦା କରି ଏକ୍ସରେ ଲେଖିଛନ୍ତି ଯେ, "ଆତଙ୍କୀମାନଙ୍କୁ କୌଣସି ପରିସ୍ଥିତିରେ ବି ଛାଡ଼ାଯିବ ନାହିଁ। ଆତଙ୍କବାଦ ବିରୁଦ୍ଧରେ ଆମର ଲଢ଼େଇ ଜାରି ରହିବ।" ସେ ଗୃହମନ୍ତ୍ରୀ ଅମିତ ଶାହଙ୍କୁ ସ୍ଥିତି ସମୀକ୍ଷା କରିବାକୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟମନ୍ତ୍ରୀ ଓମର ଅବଦୁଲ୍ଲା ଏହାକୁ "ପଶୁତୁଲ୍ୟ" କାର୍ଯ୍ୟ ବୋଲି କହି ନିନ୍ଦା କରିଛନ୍ତି। ଅନ୍ୟପଟେ ଅମିତ ଶାହ ତୁରନ୍ତ ଶ୍ରୀ ନଗରରେ ପହଞ୍ଚି ଏକ ଜରୁରିକାଳିନ ବୈଠକର ଆୟୋଜନ କରିଛନ୍ତି।

ସୁରକ୍ଷା କାର୍ଯ୍ୟାନୁଷ୍ଠାନ

ସୁରକ୍ଷା ବାହିନୀ ଅଞ୍ଚଳକୁ ଘେରି ଆତଙ୍କୀମାନଙ୍କୁ ଖୋଜିବା ପାଇଁ ବୃହତ ଅଭିଯାନ ଆରମ୍ଭ କରିଦେଇଛି। ଆହତମାନଙ୍କୁ ହେଲିକପ୍ଟର ଓ ସ୍ଥାନୀୟ ଲୋକଙ୍କ ସାହାଯ୍ୟରେ ଉଦ୍ଧାର କରାଯାଇଛି। ଆତଙ୍କୀ ଆକ୍ରମଣ ପରେ ପହଲଗାମ ଏବେ ନିର୍ଜନ ହୋଇପଡ଼ିଛି। କାରଣ ଛୁଟି କାଟିବାକୁ ଆସିଥିବା ପର୍ଯ୍ୟଟକମାନେ ଘଟଣାସ୍ଥଳ ଛାଡି ସୁରକ୍ଷିତ ସ୍ଥାନକୁ ଫେରିବାରେ ଲାଗୁଛନ୍ତି।

ଆନ୍ତର୍ଜାତୀୟ ପ୍ରତିକ୍ରିୟା

ଆମେରିକୀୟ ଉପରାଷ୍ଟ୍ରପତି ଜେଡି ଭାନ୍ସ, ଇସ୍ରାଏଲ ଓ ଆର୍ଜେଣ୍ଟିନାର ରାଷ୍ଟ୍ରଦୂତମାନେ ଏହି ଆକ୍ରମଣର କଡା ନିନ୍ଦା କରିବା ସହ ଭାରତ ସହ ଏହି ଦୁଋଖଦ ସମୟରେ ଠିଆ ହୋଇଛନ୍ତି ବୋଲି ପ୍ରକାଶ କରିଛନ୍ତି।

ଅମରନାଥ ଯାତ୍ରା ନାମାଙ୍କନ ଆରମ୍ଭ ହୋଇଥିବା ବେଳେ ଏହି ଆକ୍ରମଣ ତୀର୍ଥଯାତ୍ରୀଙ୍କ ସୁରକ୍ଷା ଚିନ୍ତା ବଢ଼ାଇଦେଇଛି। ବିଶେଷଜ୍ଞମାନେ ଏହାକୁ କାଶ୍ମୀରର ଶାନ୍ତି ଓ ଅର୍ଥନୀତିକୁ ଅସ୍ଥିର କରିବାର ପାକିସ୍ତାନର ପ୍ରାୟୋଜିତ ଉଦ୍ୟମ ବୋଲି କହିଛନ୍ତି।