ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ଅନନ୍ତନାଗ ଜିଲ୍ଲାର ପହଲଗାମର ବୈସରନ ଉପତ୍ୟକାରେ ମଙ୍ଗଳବାର ଦିନ ଏକ ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଛି। ଯେଉଁଥିରେ ଦୁଇ ଜଣ ବିଦେଶୀ ଏବଂ ଦୁଇ ଜଣ ସ୍ଥାନୀୟ ଲୋକ ସାମିଲ ଅଛନ୍ତି। ଏହି ଆକ୍ରମଣର ସମ୍ପୂର୍ଣ୍ଣ ଦାୟିତ୍ୱ ଦ ରେସିଷ୍ଟାନ୍ସ ଫ୍ରଣ୍ଟ (ଟିଆରଏଫ)ନିଜ ମୁଣ୍ଡ ଉପରେ ନେଇଛି। ଯାହା ପାକିସ୍ତାନର ଆତଙ୍କୀ ସଂଗଠନର ଲସ୍କର-ଏ-ତୋଇବା (ଏଲଇଟି) ର ଏକ ଛାୟା ସଂଗଠନ ବୋଲି ଜଣାପଡୁଛି। ଏହା ୨୦୧୯ ପୁଲୱାମା ଆକ୍ରମଣ ପରେ କାଶ୍ମୀର ଉପତ୍ୟକାରେ ହୋଇଥିବା ସବୁଠାରୁ ଭୟଙ୍କର ଆତଙ୍କୀ ଆକ୍ରମଣ ମଧ୍ୟରୁ ଗୋଟିଏ ବୋଲି କୁହାଯାଇଛି।
ପୁଲିସ ଦେଇଥିବା ସୂଚନା ଅନୁଯାୟୀ, ମଙ୍ଗଳବାର ଅପରାହ୍ନ ପ୍ରାୟ ୨:୩୦ରେ ଦୁଇରୁ ତିନି ଜଣ ଆତଙ୍କବାଦୀ ସୈନ୍ୟ ପୋଷାକ ପିନ୍ଧି ବୈସରନ ମେଡୋରେ ପହଞ୍ଚି ପର୍ଯ୍ୟଟକଙ୍କ ଉପରେ ଅତର୍କିତ ଭାବେ ଗୁଳି ଚଳାଇଥିଲେ। ଏହି ଯାଗାକୁ କାଶ୍ମୀରର ‘ମିନି ସ୍ୱିଟ୍ଜରଲ୍ୟାଣ୍ଡ’ ଭାବେ ପରିଗଣିତ କରାଯାଇଥାଏ। ଆକ୍ରମଣ ସମୟରେ ଉକ୍ତ ଅଞ୍ଚଳ ପର୍ଯ୍ୟଟକମାନଙ୍କରେ ପରିପୂର୍ଣ୍ଣ ଥିଲା। ପର୍ଯ୍ୟଟକମାନେ ଘୋଡା ଚଢ଼ିବା ଏବଂ ପିକନିକର ମଜା ନେଉଥିଲେ। ଆକ୍ରମଣକାରୀମାନେ ପର୍ଯ୍ୟଟକଙ୍କ ପରିଚୟ ପତ୍ର ଯାଞ୍ଚ କରି ଏବଂ କେତେକ କ୍ଷେତ୍ରରେ ଧର୍ମ ପଚାରି ଗୁଳି ଚଳାଇଥିବା ଜଣାପଡିଛି। ଏହି ଆକ୍ରମଣରେ ଅତି କମରେ ୨୦ ଜଣ ଆହତ ହୋଇଛନ୍ତି।
ଏହି ଘଟଣାକୁ ନେଇ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାର କଡା ନିନ୍ଦା କରିଛନ୍ତି। ମୋଦୀ ଏକ୍ସରେ ପୋଷ୍ଟ କରି ଲେଖିଛନ୍ତି ଯେ, “ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ମୁଁ କଡା ନିନ୍ଦା କରୁଛି। ଯେଉଁମାନେ ଏହା ପଛରେ ଅଛନ୍ତି, ସେମାନଙ୍କୁ ଛଡ଼ାଯିବ ନାହିଁ।” ସେ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରିବା ସହ ପୀଡ଼ିତମାନଙ୍କୁ ସମସ୍ତ ସମ୍ଭାବ୍ୟ ସାହାଯ୍ୟ ଯୋଗାଇ ଦିଆଯାଉଥିବା କହିଛନ୍ତି।
ଜମ୍ମୁ ଓ କାଶ୍ମୀରର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏହି ଆକ୍ରମଣକୁ ‘ବିଗତ ବର୍ଷଗୁଡ଼ିକରେ ନାଗରିକଙ୍କ ବିରୁଦ୍ଧରେ ହୋଇଥିବା ସବୁଠାରୁ ବଡ଼ ଆକ୍ରମଣ’ ବୋଲି ବର୍ଣ୍ଣନା କରିଛନ୍ତି। ସୁରକ୍ଷା ବାହିନୀ ଘଟଣାସ୍ଥଳରେ ପହଞ୍ଚି ଅଞ୍ଚଳଟିକୁ ଘେରାବନ୍ଦୀ କରି ତଲାସୀ ଅଭିଯାନ ଆରମ୍ଭ କରିଛନ୍ତି। ଆହତମାନଙ୍କୁ ଉଦ୍ଧାର କରିବା ପାଇଁ ସାମରିକ ହେଲିକପ୍ଟରଗୁଡ଼ିକୁ ନିୟୋଜିତ କରାଯାଇଛି।
ସୂଚନା ଅନୁଯାୟୀ, ଆକ୍ରମଣକାରୀମାନେ ପୂର୍ବରୁ ପହଲଗାମର ହୋଟେଲ ଏବଂ ପର୍ଯ୍ୟଟନ ସ୍ଥଳଗୁଡ଼ିକରେ ରେକି କରିଥିଲେ। ଟିଆରଏଫ, ଯାହାକୁ ୨୦୨୩ରେ ଭାରତ ସରକାର ନିଷିଦ୍ଧ କରିଥିଲେ, ୨୦୧୯ରେ ଆର୍ଟିକଲ ୩୭୦ ରଦ୍ଦ ପରେ ଗଠିତ ହୋଇଥିଲା। ଏହା ଲସ୍କର-ଏ-ତୋଇବା ଏବଂ ହିଜବୁଲ ମୁଜାହିଦ୍ଦୀନର ସଦସ୍ୟମାନଙ୍କୁ ନେଇ ଗଠିତ ହୋଇଛି ବୋଲି ସୂଚନା ମିଳିଛି।
ଏହି ଆକ୍ରମଣକୁ ନେଇ ରାଜନୈତିକ ନେତା ଏବଂ ସେଲିବ୍ରିଟିମାନେ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ବଲିଉଡ ଅଭିନେତା ସଞ୍ଜୟ ଦତ୍ତ ଏକ୍ସରେ ଲେଖିଛନ୍ତି, “ଏମାନେ ଆମ ଲୋକଙ୍କୁ ନିର୍ଦ୍ଦୟଭାବେ ହତ୍ୟା କରିଛନ୍ତି। ଏହାକୁ ଆଦୈ କ୍ଷମା କରାଯାଇ ପାରିବ ନାହିଁ।” ସେ ପ୍ରଧାନମନ୍ତ୍ରୀ ମୋଦୀ, ଗୃହମନ୍ତ୍ରୀ ଅମିତ ଶାହ ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ କଡ଼ା ପଦକ୍ଷେପ ନେବାକୁ ଅନୁରୋଧ କରିଛନ୍ତି।
ଏହି ଘଟଣା ଆଗାମୀ ଅମରନାଥ ଯାତ୍ରା ପୂର୍ବରୁ ସୁରକ୍ଷା ଚିନ୍ତାକୁ ବଢ଼ାଇ ଦେଇଛି। ସୂଚନା ମୁତାବକ ଆସନ୍ତା ଜୁଲାଇ ୩ ତାରିଖରୁ ଆରମ୍ଭ ହେବାକୁ ଯାଉଛି। ଉତ୍ତର ପ୍ରଦେଶ ସମେତ ଅନ୍ୟ ରାଜ୍ୟଗୁଡ଼ିକୁ ମଧ୍ୟ ହାଇ ଆଲର୍ଟ ଜାରି କରାଯାଇଛି। ସାର୍ବଜନିନ ସ୍ଥାନ ଯଥା ରେଳ ଷ୍ଟେସନ ଏବଂ ବସ୍ ଷ୍ଟେସନଗୁଡ଼ିକରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି।
ଏହି ଦୁର୍ଘଟଣା ପରେ ଅନନ୍ତନାଗ ପୁଲିସ ଏକ ପର୍ଯ୍ୟଟକ ସହାୟତା ଡେସ୍କ ଆରମ୍ଭ କରିଛି। ଭାରତ ସରକାର ପୀଡ଼ିତ ପରିବାରଙ୍କୁ ସମସ୍ତ ସମ୍ଭାବ୍ୟ ସାହାଯ୍ୟ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି।
