ନୂଆଦିଲ୍ଲୀ: ମହମ୍ମଦ ଅଲ୍-ବଶିରଙ୍କୁ ସିରିଆର ଅନ୍ତରୀଣ ପ୍ରଧାନମନ୍ତ୍ରୀ ନିଯୁକ୍ତ କରିଛନ୍ତି ବିଦ୍ରୋହୀଙ୍କ । ଅଲ-ବଶିର ବିଦ୍ରୋହୀ ସମର୍ଥକ ନେତା ଭବେ ପରିଚିତ । ଦେଶରୁ ରାଷ୍ଟ୍ରପତି ବଶର ଅଲ- ଅସଦ ପଳାୟନ କଲା ପରେ ଦେଶର ମଙ୍ଗ ଧରିଛନ୍ତି ବଶିର । ମଙ୍ଗଳବାର ଘୋଷଣା ଅନୁସାରେ ପୂର୍ବତନ ବିଦ୍ରୋହୀଙ୍କ ସମର୍ଥନରେ କାର୍ଯ୍ୟକାରୀ ପ୍ରଧାନମନ୍ତ୍ରୀ ଭାବେ ବଶିର ଦାୟିତ୍ୱ ସମ୍ଭାଳିବେ ।
ସିରିଆ ରାଷ୍ଟ୍ରପତି ବଶର ଅଲ୍ ଅସଦଙ୍କ ଦେଶ ଛାଡ଼ି ପଳାୟନର ତିନି ଦିନ ପରେ ଏହି ଘୋଷଣା ହୋଇଛି । ମହମ୍ମଦ ଗାଜି ଜଲାଲିଙ୍କ ସ୍ଥାନ ନେବେ ମହମ୍ମଦ ଅଲ-ବଶିର । ଜଲାଲିଙ୍କୁ ବଶର ଅଲ୍-ଅସଦ ନିଯୁକ୍ତି ଦେଇଥିଲେ । ସରକାରୀ ଟିଭି ଚ୍ୟାନେଲରେ ଏକ ସଂକ୍ଷିପ୍ତ ସମ୍ୱୋଧନରେ ମହମ୍ମଦ ଅଲ୍-ବଶିର କହିଛନ୍ତି ଯେ ମାର୍ଚ୍ଚ ୧ ଯାଏ ଅନ୍ତରୀଣ ସରକାର ନେତୃତ୍ୱ କରିବେ ।
ସେ କହିଛନ୍ତି, 'ଆଜି ଆମେ ଏକ କ୍ୟାବିନେଟ୍ ବୈଠକ କରିଛୁ । ଏହି ବୈଠକରେ ଇଦଲିବ ଏବଂ ଏହାର ଆଖପାଖ ଅଞ୍ଚଳରେ କାମ କରୁଥିବା ସାଲଭେଶନ ସରକାରର ଏକ ଟିମ୍ ଏବଂ ବିତାଡ଼ିତ ଶାସନର ସରକାର ସାମିଲ ଥିଲା । ବୈଠକରେ ଫାଇଲ୍ ଏବଂ ସଂସ୍ଥାଗୁଡ଼ିକୁ ଅନ୍ତରୀଣ ସରକାରକୁ ହସ୍ତାନ୍ତର କରିବା ଉପରେ ଚର୍ଚ୍ଚା ହୋଇଛି ।'ସିରିଆର ରାଜଧାନୀରେ ଅସଦଙ୍କ ଶାସନର ପତନ ପରେ ମଙ୍ଗଳବାର ପ୍ରଥମ ଥର ବ୍ୟାଙ୍କ ଖୋଲିଛି । ଦୋକାନ ବଜାର ଖୋଲିବା ସହ ଯାତାୟତ ଆରମ୍ଭ ହୋଇଛି । ନିର୍ମାଣ ଶ୍ରମିକ ଡାମାସକସ୍ ସହରର ବିଭିନ୍ନ ନିର୍ମାଣ କାର୍ଯ୍ୟରେ ସାମିଲ ହୋଇଛନ୍ତି । ରାସ୍ତାରେ ଯୁଦ୍ଧାସ୍ତ୍ର ଧରିଥିବା ଲୋକଙ୍କ ସଂଖ୍ୟା ହ୍ରାସ ପାଇଛି ।
