ନୂଆଦିଲ୍ଲୀ ୨୫/୧୨: ଗତି କିଛି ମାସ ମାଧ୍ୟରେ କୃତ୍ରିମ ବୁଦ୍ଧିମତା ବା ଏଆଇ (ଆର୍ଟିଫିସିଆଲ୍ ଇଣ୍ଟେଲିଜେନ୍ସ) ଦ୍ରୁତ ପ୍ରଗତି ଆଣିଛି । ଛୋଟ ଛୋଟ ପ୍ରୟାସଠୁ ଆରମ୍ଭ କରି ଏହି ଟେକ୍ନୋଲୋଜି ଏବେ ଜଟିଳ କାର୍ଯ୍ୟ ସମ୍ପାଦନ କରୁଛି । ଗାଣିତିକ ସମସ୍ୟା ସମାଧାନଠୁ ଆରମ୍ଭ କରି ରାଜନୈତିକ ଭାଷଣ ଲେଖୁଛି ଏଆଇ । ଏବେ ଅନୁସନ୍ଧାନକାରୀମାନେ ଏକ ଏଆଇ ଉପକରଣ ପ୍ରସ୍ତୁତ କରିଛନ୍ତି, ଯାହା ୩ ବର୍ଷ ପୂର୍ବରୁ ଅଗ୍ନାଶୟ କର୍କଟ ଆଶଙ୍କା ଥିବା ବ୍ୟକ୍ତିଙ୍କୁ ଚିହ୍ନଟ କରିବ । ନେଚର୍ ମେଡିସିନ୍ ପତ୍ରିକାରେ ଏହି ଅନୁସନ୍ଧାନ ପ୍ରକାଶ ପାଇଛି ।
ଅଗ୍ନାଶୟ କର୍କଟ ଏକ ଆକ୍ରାମକ ରୋଗ । ଏହାର ଚିହ୍ନଟ ମଧ୍ୟ କଷ୍ଟକର । ଏଥିରେ ପୀଡ଼ିତ ବ୍ୟକ୍ତିଙ୍କ ବଞ୍ଚିବା ସମ୍ଭାବନା କମ୍ । ତେଣୁ ଆରମ୍ଭରୁ ଏହାର ଚିହ୍ନଟ ପାଇଁ ଅପେକ୍ଷାକୃତ ଭଲ ଉପକରଣ ଆବଶ୍ୟକ । ଏହି ସ୍ଥିତିରେ ସଦ୍ୟ ଅନୁସନ୍ଧାନ ପ୍ରାରମ୍ଭିକ ଅବସ୍ଥାରେ ରୋଗ ଚିହ୍ନଟ ଏବଂ ବଞ୍ଚିବା ସମ୍ଭାବନା ବୃଦ୍ଧିକୁ ନେଇ ଆଶା ବ୍ୟକ୍ତ କରିଛି । ଏ କ୍ଷେତ୍ରରେ ଫଳପ୍ରଦ ପରିଣାମ ପାଇବା ଲାଗି ବୈଜ୍ଞାନିକ ଟିମ୍ ଡେନ୍ମାର୍କର ୬୦ ଲକ୍ଷ ଓ ଆମେରିକାର ୩୦ ଲକ୍ଷ ରୋଗୀଙ୍କ ଉପରେ ଏଆଇ ଆଲ୍ଗୋରିଦମ୍ ପ୍ରୟୋଗ କରିଥିଲେ । ଭବିଷ୍ୟତରେ କେଉଁ ରୋଗୀଙ୍କୁ ଅଗ୍ନାଶୟ କର୍କଟ ଆଶଙ୍କା ଅଧିକ ରହିଛି, ତା’ର ପୂର୍ବାନୁମାନ ଲାଗି ଏହି ମଡେଲ ରୋଗ କୋଡ୍ ଓ ସେଗୁଡ଼ିକ ଘଟିବାର ସମୟକୁ ପ୍ରୟୋଗ କରିଥିଲା ।
ଅନୁସନ୍ଧାନକାରୀ ଟିମ୍ରେ ସାମିଲ ଅନ୍ୟତମ ସଦସ୍ୟ ଓ ହାର୍ଭାର୍ଡ୍ ମେଡିକାଲ ସ୍କୁଲର ସିଷ୍ଟମ୍ସ ବାୟୋଲୋଜି ବିଭାଗର ଫାକଲ୍ଟି କ୍ରିସ୍ ସାନ୍ଡର୍ସ ଅଧ୍ୟୟନରେ ଉଲ୍ଲେଖ କରିଛନ୍ତି, ଏହି ରୋଗର ଅଧିକ ଆଶଙ୍କା ଥିବା ଲୋକଙ୍କୁ ଚିହ୍ନଟ କରିବା ହେଉଛି ଚିକିତ୍ସକମାନେ ସାମ୍ନା କରୁଥିବା ସବୁଠୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି । ସାନ୍ଡର୍ସ କହିଛନ୍ତି, ଏହି ଏଆଇ ଉପକରଣ ଚିକିତ୍ସକଙ୍କ ନିଷ୍ପତ୍ତିକୁ ବଳ ଦେବ, ଆରମ୍ଭରୁ ରୋଗ ଚିହ୍ନଟ କରିବ, ଚିକିତ୍ସାରେ ସହାୟକ ହେବ ଏବଂ ଅପେକ୍ଷାକୃତ ଭଲ ପରିଣାମ ପ୍ରଦାନ କରିବ । ବର୍ତ୍ତମାନର ଜେନେଟିକ୍ ସିକ୍ୱେନ୍ସିଂ ପରୀକ୍ଷା ଭଳି ଏଆଇ ଉପକରଣ ସଠିକ୍ ଫଳ ପ୍ରଦାନ କରିଛି ବୋଲି ଅଧ୍ୟୟନ ସ୍ପଷ୍ଟ କରିଛି । ବିଶ୍ୱରେ କର୍କଟ ଜନିତ ମୃତ୍ୟୁର ଏକ ଗୁରୁତ୍ୱପୂର୍ଣ୍ଣ କାରଣ ହେଉଛି ଅଗ୍ନାଶୟ କର୍କଟ । ୮୦ ପ୍ରତିଶତ ରୋଗୀ ବିଳମ୍ବରେ ଅଗ୍ନାଶୟ କର୍କଟ ବିଷୟରେ ଜାଣିବାକୁ ପାଆନ୍ତି । ଏହି ସ୍ଥିତିରେ ବଞ୍ଚିବା ଆଶା ଅତି କ୍ଷୀଣ ହୋଇଯାଏ । ତେଣୁ ସଦ୍ୟ ବିକଶିତ ଏଆଇ ଉପକରଣ ଅପେକ୍ଷାକୃତ ଭଲ ସ୍କ୍ରିନିଂ, ଅଧିକ ପରୀକ୍ଷା ଓ ପ୍ରାରମ୍ଭିକ ରୋଗ ଚିହ୍ନଟରେ ସହାୟକ ହେବ ବୋଲି ସାନ୍ଡର୍ସ କହିଛନ୍ତି ।
