ଟୋକିଓ, ୨୬।୧୨: ଜାପାନ ଏୟାରଲାଇନ୍ସ ଉପରେ ସାଇବର ଆଟାକ୍ । ଏଭଳି ହମଲା ପରେ ଟିକେଟ୍ ବିକ୍ରି ଉପରେ ସମ୍ପୂର୍ଣ୍ଣ ରୋକ୍ ଲଗାଇଛି ଜାପାନ ଏୟାରଲାଇନ୍ସ । ସାଇବର ଆଟାକ ଯୋଗୁଁ କିଛି ଘରୋଇ ଓ ଅନ୍ତରାଷ୍ଟ୍ରୀୟ ଫ୍ଲାଇଟ୍ରେ ବିଳମ୍ୱ ହେବା ନେଇ ଗୁରୁବାର ଜାପାନ ଏୟାରଲାଇନ୍ସ ସୂଚନା ଦେଇଛି । ଏହି ସାଇବର ଆଟାକ ଗୁରୁବାର ସକାଳ ୭ଟା ପରେ ହୋଇଥିବା ବେଳେ ଏହା ପ୍ରଭାବରେ ଜାପାନ ଏୟାରଲାଇନ୍ସ ସମ୍ପୂର୍ଣ୍ଣ ପ୍ରଭାବିତ ହୋଇଛି ।
କହିରଖୁ କି, ଏୟାରଲାଇନ୍ସ ଉପରେ ସାଇବର ଆଟାକ ପରେ ଘରୋଇ ଏବଂ ଅନ୍ତର୍ଜାତିକ ବିମାନ ଯାତ୍ରା ଟିକେଟ୍ ବୁକିଂକୁ ବନ୍ଦ କରିଦିଆଯାଇଛି । ବିମାନ ବାତିଲ୍ କିମ୍ବା ସମୟ ସାରଣୀ ପରିବର୍ତ୍ତନ ନେଇ ଏପର୍ଯ୍ୟନ୍ତ କୌଣସି ଅପଡେଟ୍ ମିଳିନାହିଁ । ତେବେ ଜାପାନ ଏୟାରଲାଇନ୍ସ ଉପରେ ସାଇବର ଆଟାକ ପରେ ଆଗୁଆ ସତର୍କ ହୋଇ ଆମେରିକାନ୍ ଏୟାରଲାଇନ୍ସ ୧ ଘଣ୍ଟା ପାଇଁ ସମସ୍ତ ଉଡ଼ାଣକୁ ବନ୍ଦ କରିଦେଇଥିଲା । ଯାହା ଫଳରେ ହଜାର ହଜାର ଯାତ୍ରୀ ପ୍ରଭାବିତ ହୋଇଥିଲେ । ଜାପାନ ଏୟାରଲାଇନ୍ସ ଉପରେ ଏଭଳି ସାଇବର ଆଟାକ ପ୍ରଥମ ଥର ନୁହଁ । ଏହା ପୂର୍ବରୁ ୨୦୨୨ରେ ରେନସମୱେର ଅପରେଟର ଡାଇକ୍ସିନ ଟିମ୍ ଏୟାର ଏସିଆ ଉପରେ ୫୦ ଲକ୍ଷ ଯାତ୍ରୀଙ୍କ ତଥ୍ୟ ଚୋରି କରିଥିବା ଦାବି କରିଥିଲା ।
