ନୂଆଦିଲ୍ଲୀ: ସିରିଆ ଗୃହଯୁଦ୍ଧରେ ଲାଗିଛି ବିରାମ। ୨୪ ବର୍ଷର ବଶର ଅଲ-ଅସଦଙ୍କ ଶାସନର ଅନ୍ତ ହୋଇଛି। ବିଦ୍ରୋହୀ ମାନେ ସିରିଆର ରାଜଧାନୀ ଡମାସକସ୍ କୁ ଅଧିଗ୍ରହଣ କରିବା ପରେ ଆରମ୍ଭ ହୋଇଛି ଏକ ନୂଆ ଅଧ୍ୟାୟ। ରାଷ୍ଟ୍ରପତି ବଶରଙ୍କୁ କ୍ଷମତାଚ୍ୟୁତ କରିବା ପରେ ବିଦ୍ରୋହୀମାନେ ସୀମିତ ସମୟ ପାଇଁ ଜଣେ ନୂଆ କାର୍ଯ୍ୟନିର୍ବାହୀ ପ୍ରଧାନମନ୍ତ୍ରୀଙ୍କୁ ନିଯୁକ୍ତ କରିଛନ୍ତି। ମହମ୍ମଦ ଅଲ-ବଶିରଙ୍କୁ ଆସନ୍ତା ୨୦୨୫ ମାର୍ଚ୍ଚ ୧ ତାରିଖ ଯାଏ କାର୍ଯ୍ୟନିର୍ବାହୀ ପ୍ରଧାନମନ୍ତ୍ରୀ ଭାବେ ଦାୟିତ୍ୱ ମିଳିଛି।
ବିଦ୍ରୋହୀ ଗୋଷ୍ଠୀ ତହରୀର ଅଲ-ଶାମ(ଏଚଟିଏସ)ର ମୁଖ୍ୟ ଅବୁ ମହମ୍ମଦ ଅଲ-ଜୋଲାନି ସିରିଆର ପୂର୍ବତନ ମୁଖ୍ୟମନ୍ତ୍ରୀଙ୍କ ସହ ଭେଟି କ୍ଷମତା ପରିବର୍ତ୍ତନ ନେଇ କଥାବର୍ତ୍ତା ହୋଇଥିଲେ। ମହମ୍ମଦ ଏହା ପୂର୍ବରୁ ବିଦ୍ରୋହୀ ଗୋଷ୍ଠୀର ସାଲଭେଶନ ସରକାରର ପରିଚାଳନା ଦାୟିତ୍ତ୍ୱରେ ରହିଥିଲେ।
ମହମ୍ମଦ ଅଲ-ବଶିର କିଏ ?
ମହମ୍ମଦ ଅଲ-ବଶିର ସିରିଆର ଜଣେ ରାଜନେତା ତଥା ଇଞ୍ଜିନିୟର ଭାବେ ଜଣାଶୁଣା ଡେହେରା। ଏଚଟିଏସ ସହ ଜଡିତ ବିଦ୍ରୋହି ଗୋଷ୍ଠୀର ସାଲଭେଶନ ସରକାରରେ ସେ ପ୍ରଧାନମନ୍ତ୍ରୀ ଭାବେ ନିଜ ପଞ୍ଚମପାଳିର କାର୍ଯ୍ୟକାଳ ପୁରା କରିବାକୁ ଯାଉଛନ୍ତି। ବଶିର ୧୯୮୬ ମସିହାରେ ଜବଲ ଯାୱିୟା ଅଞ୍ଚଳର ଇଡଲିବଠାରେ ଜନ୍ମଗ୍ରହଣ କରିଥିଲେ।
ବଶିର ଇଞ୍ଜିନିୟରିଂ, ଆଇନ ଓ ପ୍ରଶାସନ ପରିଚାଳନା କ୍ଷେତ୍ରରେ ଶିକ୍ଷା ଗ୍ରହଣ କରିଛନ୍ତି। ସେ ଇଲେକ୍ଟ୍ରିକାଲ ଓ ଇଲେକ୍ଟ୍ରୋନିକ ଇଞ୍ଜିନିୟରିଂ କ୍ଷେତ୍ରରେ ଡିଗ୍ରି ପାଇଥିବା ବେଳେ ୨୦୦୭ ମସିହାରେ ଆଲେପ୍ପୋ ବିଶ୍ୱବିଦ୍ୟାଳୟରୁ ଯୋଗାଯୋଗ କ୍ଷେତ୍ରରେ ବିଶେଷ ପାଠ୍ୟକ୍ରମ ଶେଷ କରିଛନ୍ତି। ସେ ୨୦୨୧ ମସିହାରେ ଇଡଲିବ ୟୁନିଭରସିଟିରୁ ଶରିଆ ଆଇନରେ ସ୍ନାତକ ପୂରା କରିଛନ୍ତି।
ବଶିର ସିରିଆର ଏକ ସରକାରୀ ଗ୍ୟାସ କମ୍ପାନିର ଗ୍ୟାସ ପ୍ଲାଣ୍ଟରେ ଚାକିରି କରୁଥିଲେ। ଅସଦଙ୍କ ସରକାର ପାଇଁ ବଢୁଥିବା ଅସନ୍ତୋଷ ଦେଖି ସେ ୨୦୨୧ ମସିହାରେ ଇସ୍ତଫା ପ୍ରଦାନ କରିଥିଲେ। ପରେ ସେ ବିଦ୍ରୋହି ଗୋଷ୍ଠୀରେ ଯୋଗ ଦେଇଥିଲେ। ସେ ୨୦୨୨ରୁ ୨୦୨୩ ଯାଏ ବିଦ୍ରୋହୀ ଗୋଷ୍ଠୀ ଅଧିନରେ ଥିବା ସାଲଭେଶନ ସରକାରର ମାନବବିକାଶ ବିଭାଗର ମନ୍ତ୍ରୀ ଭାବେ ନିଜ ଦାୟିତ୍ତ୍ୱ ତୁଲାଇ ଥିଲେ। ସାଲଭେଶନ ସରକାରର ଶୁରା କାଉନସିଲ ଦ୍ୱାରା ତାଙ୍କୁ ୨୦୨୪ ଜାନୁଆରି ମାସରେ ପ୍ରଧାନମନ୍ତ୍ରୀ ରୁପେ ବଛିଥିଲା।
ନଭେମ୍ବର ମାସ ଶେଷରେ ଏଚଟିଏସ ଓ ସିରିଆର ଅନ୍ୟ ବିଦ୍ରୋହି ଗୋଷ୍ଠୀ ମାନେ ଉତ୍ତରପଶ୍ଚିମ ସିରିଆରେ ଆକ୍ରମଣ କରି ଆଲେପ୍ପୋ ସହରକୁ ନିଜ ଦଖଲକୁ ଆଣିଥିଲେ। ଏହି ଘଟଣା ପରେ ବଶିର ଏକ ସାମ୍ବାଦିକ ସମ୍ମିଳନୀ ଡାକି ଅସଦ ସରକାରଙ୍କ ଦ୍ୱାରା ହୋଇଥିବା ଆକ୍ରମଣର ଏହା ପ୍ରତିଉତ୍ତର ବୋଲି ଘୋଷଣା କରିଥିଲେ। ଏହି ଆକ୍ରମଣରେ ପ୍ରୟ ୧୦,୦୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ଅନେକ ଲୋକ ନିଜ ଘରଦ୍ୱାର ହରେଇଥିଲେ।
