ମାଲକାନଗିରି : ରାୟଗଡା ଜିଲ୍ଲାର ସଦର ମହକୁମା ସ୍ଥିତ ଗୋପବନ୍ଧୁ ପୌର ପରିଷଦ ଉଚ୍ଚ ବିଦ୍ୟାଳୟ ଠାରେ, ଶୁକ୍ରବାର ଜୋନାଲ ସ୍ତରୀୟ ବିଜ୍ଞାନ ନାଟକ ପ୍ରତିଯୋଗିତା ଅନୁଷ୍ଠିତ ହୋଇଛି। ଏଥିରେ ମାଲକାନଗିରି, ରାୟଗଡା ,କୋରାପୁଟ , ନବରଙ୍ଗପୁର ,ନୂଆପଡା ,କଳାହାଣ୍ଡି ମୋଟ ଛଅଟି ଜିଲ୍ଲାର ଶ୍ରେଷ୍ଠ ନାଟକ ଦଳମାନଙ୍କ ମଧ୍ୟରେ ନାଟକ ପ୍ରତିଯୋଗୀତା ହୋଇଥିଲା। 

ମାଲକାନଗିରି ଜିଲ୍ଲା ଅନ୍ତର୍ଗତ ଏମଭି ୭ ଜଗନ୍ନାଥ ପଲ୍ଲୀ ଉଚ୍ଚ ବିଦ୍ୟାଳୟ ଛାତ୍ରଛାତ୍ରୀଙ୍କ ଦ୍ଵାରା ବିଶ୍ଵ ଜଳ ସଙ୍କଟ ଉପରେ ଆଧାରିତ ନାଟକ ( ଜଳ ହିଁ ଜୀବନ) ପରିବେଷଣ କରାଯାଇ ଥିଲା। ଏହି ସ୍କୁଲର ଛାତ୍ରଛାତ୍ରୀ ଜୋନାଲ ସ୍ଥରରେ ପ୍ରଥମ ସ୍ଥାନ ଅଧିକାର କରି, ରାଜ୍ୟ ସ୍ତରୀୟ ନାଟକ ପ୍ରତିଯୋଗୀତା ପାଇଁ ମନୋନୀତ ହୋଇଛନ୍ତି। 

ମାଲକାନଗିରି ଜିଲ୍ଲା ଜଗନ୍ନାଥ ପଲ୍ଲୀ ହାଇସ୍କୁଲର ଛାତ୍ରଛାତ୍ରୀଙ୍କ ସଫଳତା ବିଷୟରେ ଜାଣିବା ପରେ ଜିଲ୍ଲା ଶିକ୍ଷା ଅଧିକାରୀ ବିଶ୍ଵନାଥ ସାହୁ , ଡ଼ି.ଏସ. ଏସ ଶରଥ ଚନ୍ଦ୍ର ରାଉତ, ବିଦ୍ୟାଳୟର ପରିଚାଳନା କମିଟିର ସମସ୍ତ ସଭ୍ୟ ଓ ସଭ୍ୟା ଏବଂ ପ୍ରଧାନ ଶିକ୍ଷକ ଏ.ଈଶ୍ଵର ରାଓଙ୍କ ସମେତ , ସମସ୍ତ ଶିକ୍ଷକ ଶିକ୍ଷୟତ୍ରୀ ଅଂଶ ଗ୍ରହଣ କରିଥିବା ଛାତ୍ରଛାତ୍ରୀ ଓ ନାଟକକୁ ରଚନା କରିଥିବା ଓ ନିର୍ଦ୍ଦେଶନା ଦେଇଥିବା ଶିକ୍ଷକ ଜଗଦୀଶ ମଲଣାଙ୍କୁ ଭୂରି ଭୂରି ପ୍ରସଂଶା କରିଛନ୍ତି। ଏହାସହ ସେମାନଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଇ ଥିଲେ। ରାଜ୍ୟ ସ୍ତରୀୟ ପ୍ରତିଯୋଗିତାରେ ଆହୁରି ଭଲ ପ୍ରଦର୍ଶନ କରି ଜିଲ୍ଲା ପାଇଁ କିପରି ଗୌରବ ଆଣିବେ, ସେଥିପାଇଁ ଛାତ୍ରଛାତ୍ରୀ ମାନଙ୍କୁ ଉତ୍ସାହିତ କରିଛନ୍ତି।