ମୁମ୍ବାଇ: ବାହୁବଳୀ-୨ ଫେମ୍ ସୁବାରାଜୁ ୪୭ ବର୍ଷ ବୟସରେ ବିବାହ କରିଛନ୍ତି । ହିନ୍ଦୁ ରୀତିନୀତିରେ ସେ ବିବାହ କରିଥିବା ଜଣାପଡ଼ିଛି । ସେ ନିଜ ପତ୍ନୀଙ୍କ ସହିତ ଏକ ସୁନ୍ଦର ଫଟୋ ସୋସିଆଲ ମିଡିଆରେ ସେୟାର କରିଛନ୍ତି । ଅଭିନେତା ସୁବାରାଜୁ ଏବଂ ତାଙ୍କ ପତ୍ନୀ ପାରମ୍ପରିକ ବିବାହ ପୋଷାକରେ ନଜର ଆସିଛନ୍ତି । ଆକ୍ଟର ଧୋତି ଏବଂ କୁର୍ତ୍ତା ପିନ୍ଧିଥିବା ବେଳେ ତାଙ୍କ ପତ୍ନୀ ଲାଲ ରଙ୍ଗର ସିଲ୍କ ଶାଢ଼ି ପିନ୍ଧିଥିବା ଦେଖିବାକୁ ମିଳିଛି । ଏହା ସହ ଗହଣା ଓ ରଜନୀଗନ୍ଧା ଫୁଲରେ ନିଜକୁ ସଜେଇଛନ୍ତି ସୁବାରାଜୁଙ୍କ ପତ୍ନୀ ।
ସୁବାରାଜୁ ଫଟୋ ପୋଷ୍ଟ କରି କ୍ୟାପ୍ସନରେ ଲେଖିଛନ୍ତି, ‘ଶେଷରେ ବିବାହ ହୋଇଗଲା !’ ତାଙ୍କର ଏହି ପୋଷ୍ଟ ପରେ ଫିଲ୍ମ ଜଗତର ତମାମ ବ୍ୟକ୍ତିତ୍ବ ଏବଂ ଫ୍ୟାନ୍ସ ଅଭିନେତାଙ୍କୁ ଶୁଭେଚ୍ଛା ଜଣାଇଛନ୍ତି । ନିର୍ଦ୍ଦେଶକ ହରୀଶ ଶଙ୍କର ସୁବାରାଜୁଙ୍କୁ ବୈବାହିକ ଜୀବନ ଲାଗି ଶୁଭେଚ୍ଛା ଜଣାଇଛନ୍ତି । ଆକ୍ଟର ଅଭିନୟ କୃଷ୍ଣା ଲେଖିଛନ୍ତି, ଶେଷରେ !!! ଶୁଭେଚ୍ଛା ଆନ୍ନା ।’ ସୁବାରାଜୁଙ୍କ ଫ୍ୟାନମାନେ ଖୁସି ଜାହିର କରିଛନ୍ତି । ଶେଷ ବ୍ୟକ୍ତି ଏବେ ଆନୁଷ୍ଠାନିକ ଭାବରେ ମୈଦାନ ଛାଡ଼ିଛନ୍ତି ବୋଲି ତାଙ୍କର ଜଣେ ଫ୍ୟାନ୍ କମେଣ୍ଟ କରିଛନ୍ତି ।
ସୁବାରାଜୁ ନିଜ ବିବାହ ସଂପର୍କରେ ଖୁବ କମ୍ ଲୋକଙ୍କୁ ଜଣାଇଥିଲେ । ଗଣମାଧ୍ୟମ ରିପୋର୍ଟ ଅନୁସାରେ, ସୁବାରାଜୁ ନଭେମ୍ବର ୨୬ରେ କେବଳ ସଂପର୍କୀୟଙ୍କ ଉପସ୍ଥିତିରେ ହିନ୍ଦୁ ରୀତିନୀତିରେ ବିବାହ କରିଛନ୍ତି । ତେବେ ନିଜ ପତ୍ନୀଙ୍କ ସଂପର୍କରେ ବିଶେଷ କିଛି କହିନାହାନ୍ତି ଅଭିନେତା । ସୁବାରାଜୁଙ୍କ ପତ୍ନୀଙ୍କ ବିଷୟରେ ଜାଣିବାକୁ ଫ୍ୟାନ୍ସଙ୍କ ଉତ୍ସାହ ବୃଦ୍ଧି ପାଇଛି । ସୁବାରାଜୁ ଜଣେ ଲୋକପ୍ରିୟ ଅଭିନେତା । ତେଲୁଗୁ ଫିଲ୍ମରେ ସେ ନିଜର ବଳିଷ୍ଠ ଅଭିନୟ ପାଇଁ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । ତେଲୁଗୁ ବ୍ୟତୀତ, ତାମିଲ, ମାଲାୟାଲମ, ହିନ୍ଦୀ ସିନେମାରେ ଅଭିନୟ କରିଛନ୍ତି ସୁବାରାଜୁ । ସେ ଅନେକ ସିନେମାରେ ଅଭିନୟ କରିଥିଲେ ସୁଦ୍ଧା ଏସଏସ୍ ରାଜାମୌଲିଙ୍କ ଫିଲ୍ମ ‘ବାହୁବଳୀ-୨’ ତାଙ୍କୁ ଅଧିକ ଲୋକପ୍ରିୟତା ଆଣି ଦେଇଥିଲା ।
