ନୂଆଦିଲ୍ଲୀ: କିଏ ହେବ ମହାରାଷ୍ଟ୍ରର ପରବର୍ତ୍ତୀ ସିଏମ୍ ? ଏହି ସମ୍ବନ୍ଧରେ ସୃଷ୍ଟି ହୋଇଥିବା ସସପେନ୍ସକୁ ଏବେ ସ୍ପଷ୍ଟ କରିଛନ୍ତି ବର୍ତ୍ତମାନର କାର୍ଯ୍ୟନିର୍ବାହୀ ସିଏମ୍ ଏକନାଥ ସିନ୍ଦେ । ଏକ ସାମ୍ବାଦିକ ସମ୍ମିଳନୀରେ ଏକନାଥ ସିନ୍ଦେ କହିଛନ୍ତି ଯେ, ମୁଁ ଜଣେ ଖୋଲା ହୃଦୟର ମଣିଷ । ମୁଁ ଛୋଟ ଭାବନା ମନରେ ରଖେନାହିଁ । ମୁଁ ଲୋକଙ୍କ ପାଇଁ କାମ କରୁଥିବା ଜଣେ ନେତା । ବିଜେପିର ନିଷ୍ପତ୍ତିକୁ ସମର୍ଥନ କରିବି, ଯିଏ ତାଙ୍କର ସିଏମ୍ ହେବେ ମୁଁ ତାଙ୍କୁ ଗ୍ରହଣ କରିବି। 

ଏକନାଥ ସିନ୍ଦେ ଆହୁରି ମଧ୍ୟ କହିଛନ୍ତି କି, ଗତକାଲି ପିଏମ ମୋଦୀ ମୋତେ ଡାକିଥିଲେ। ମୁଁ ତାଙ୍କୁ କହିଥିଲି ଯେ ନୂତନ ସରକାର ଗଠନ କରିବାରେ ମୋ ପକ୍ଷରୁ କୌଣସି ଅସୁବିଧା ହେବ ନାହିଁ । ସିଏମ ପଦ ପାଇଁ ମୋର କୌଣସି ଇଚ୍ଛା ନାହିଁ । ଆପଣ ଆପଣଙ୍କର ନିର୍ଣ୍ଣୟ ନିଅନ୍ତୁ । ମହାୟୁତି ଏବଂ ଏନଡିଏ ମୁଖ୍ୟମାନେ ଯାହା ନିଷ୍ପତ୍ତି ନେବେ ତାହା ମୋ ପାଇଁ ଗ୍ରହଣୀୟ ହେବ । ମୋ ବିଷୟରେ ଚିନ୍ତା କରିବା ପରିବର୍ତ୍ତେ ମହାରାଷ୍ଟ୍ର ଏବଂ ରାଜ୍ୟବାସୀଙ୍କ ବିଷୟରେ ଚିନ୍ତା କରିବାକୁ ନରେନ୍ଦ୍ର ମୋଦୀ ଜୀ ଙ୍କୁ ମୁଁ କହିଥିଲି । ମୁଁ ଅମିତ ଶାହାଙ୍କୁ ସମାନ କଥା କହିଛି ଯେ ମୋ ପକ୍ଷରୁ କୌଣସି ଅସୁବିଧା ହେବ ନାହିଁ। ଆପଣଙ୍କର ନିଷ୍ପତ୍ତି ଚୂଡାନ୍ତ ହେବ।

ଏକନାଥ ସିନ୍ଦେ କହିଛନ୍ତି ଯେ ସରକାରରେ ଥିବାବେଳେ ମହାରାଷ୍ଟ୍ରବାସୀଙ୍କ ସ୍ୱାର୍ଥରେ ଆମେ କଣ କରିପାରିବା ତାହା ଚିନ୍ତା କରି କାର୍ଯ୍ୟ କରିଛୁ। ଆମେ ଲୋକଙ୍କ ପାଇଁ ଛିଡା ହୋଇ ପୁଣି ରାଜ୍ୟକୁ ଆଗକୁ ନେବାକୁ ପଡିବ। ରାଜ୍ୟ କେନ୍ଦ୍ର ସରକାରଙ୍କ ସାହାଯ୍ୟ ଆବଶ୍ୟକ ଏବଂ ଏହାର ସହାୟତା ପାଇବ । ଆମେ କେନ୍ଦ୍ରରୁ ଲକ୍ଷ ଲକ୍ଷ କୋଟି ଟଙ୍କା ପାଣ୍ଠି ନେଇଛୁ, ତେଣୁ ମୁଁ ନରେନ୍ଦ୍ର ମୋଦୀ ସରକାରଙ୍କୁ କୃତଜ୍ଞତା ଜଣାଉଛି।