ନୂଆଦିଲ୍ଲୀ,୨୭।୧୧: ଅଚଳାଚଳ ସମ୍ପତ୍ତିର ଲୋଭ ବାନ୍ଧି ରଖିପାରିଲାନି। ସବୁକିଛି ତୁଛ କରି ମାତ୍ର ୧୮ ବର୍ଷରେ ବୌଦ୍ଧ ସନ୍ୟାସୀ ହେଲେ ଏୟାରସେଲର ପୂର୍ବତନ ମାଲିକ ଆନନ୍ଦକ୍ରିଷ୍ଣାନଙ୍କ ପୁଅ। ୪୦ ହଜାର କୋଟି ଟଙ୍କାର ମୋହ ତୁଟାଇ ଆଧ୍ୟାତ୍ମିକ ମାର୍ଗରେ ଆପଣେଇଲେ ଭେନ୍ ଅଜାନ ସିରିପାନୟୋ।
ସମୃଦ୍ଧ ଓ ବିଳାସମୟ ଜୀବନକୁ ତ୍ୟାଗକରି ଆଧ୍ୟାତ୍ମିକ ମାର୍ଗକୁ ଅନୁସରଣ। ୪୦ ହଜାର କୋଟି ଟଙ୍କାରୁ ଅଧିକ ସମ୍ପତ୍ତିର ତୁଟାଇଲେ ମୋହ। ହୋଇଗଲେ ବୌଦ୍ଧ ସନ୍ୟାସୀ। ମାଲେସିଆ ଟେଲିକମ୍ ଟାଇକୁନ୍ ଆନନ୍ଦକ୍ରିଷ୍ଣନଙ୍କ ପୁଅ ଏବେ ଚର୍ଚ୍ଚାରେ। ମାତ୍ର ୧୮ ବର୍ଷ ବୟସରେ ବୌଦ୍ଧ ସନ୍ୟାସୀ ହୋଇ ସମସ୍ତଙ୍କୁ ଚକିତ କରିଛନ୍ତି ଭେନ୍ ଅଜାନ ସିରିପାନୟୋ। ଆନନ୍ଦକ୍ରିଷ୍ଣନ ମାଲେସିଆର ତୃତୀୟ ଧନୀ ବ୍ୟକ୍ତି। ହେଲେ ତାଙ୍କ ପୁଅ ଏସବୁକୁ ଛାଡି ବୌଦ୍ଧ ସନ୍ୟାସୀ ହୋବାର ଘୋଷଣା କରିଛନ୍ତି। ଦୂରସଞ୍ଚାର, ମିଡିଆ, ସାଟେଲାଇଟ୍, ତୈଳ,ଗ୍ୟାସ୍ ଓ ରିଏଲ ଇଷ୍ଟେଟ୍ ପର୍ଯ୍ୟନ୍ତ ଆନନ୍ଦକ୍ରିଷ୍ଣନଙ୍କ ବିଜନେସ୍ ଲମ୍ବିଛି। ତା ଛଡା ସେ ଏୟାରସେଲ୍ର ପୂର୍ବତନ ମାଲିକ ମଧ୍ୟ ଥିଲେ। ଅତୀତରେ ଆଇପିଏଲ ଟିମ୍ ଚେନ୍ନାଇ ସୁପରକିଙ୍ଗ୍ସକୁ ସ୍ପନ୍ସର କରିଥିଲେ।
ପିଲାବେଳୁ ରାଜକୀୟ ଢଙ୍ଗରେ ବଢିଥିଲେ ସିରିପନୟୋ। ତଥାପି ସେ ନିଜର ଆାରାମଦାୟକ ଓ ଐଶ୍ବର୍ଯ୍ୟପୂର୍ଣ୍ଣ ଜୀବନଶୈଳିକୁ ଛାଡି ବୌଦ୍ଧ ସନ୍ୟାସୀ ହୋଇଛନ୍ତି। ତାଙ୍କ ବାପା ଆନନ୍ଦକ୍ରିଷ୍ଣନ୍ ମଧ୍ୟ ନିଜକୁ ଜଣେ ସମର୍ପିତ ବୌଦ୍ଧ ଅନୁଯାୟୀ ବୋଲି କୁହନ୍ତି। ସେ ନିଜ ପୁଅର ଏହି ନିଷ୍ପତ୍ତିକୁ ସମ୍ମାନ ଜଣାଇଛନ୍ତି। ସିରିପନୟୋଙ୍କ। ସନ୍ୟାସ ଯାତ୍ରା ୧୮ ବର୍ଷ ବୟସରେ ଥାଇଲାଣ୍ଡରୁ ଆରମ୍ଭ ହୋଇଥିଲା। ସେ ନିଜ ମା’ଙ୍କ ପରିବାକୁ ଭେଟିବାକୁ ଯାଇଥିବା ବେଳେ ଅସ୍ଥାୟୀ ଭାବରେ ଏକ ଆଶ୍ରମରେ ସନ୍ୟାସ ନେବାର ନିଷ୍ପତ୍ତି ନେଇଥିଲେ। ଏବେ ସେ ଥାଇଲାଣ୍ଡ-ମିଆଁମାର ସୀମାରେ ଥିବା ଦତ୍ତାଓ ଡମ୍ ମଠର ମୁଖ୍ୟ ରୂପରେ ଜୀବନ ଯାପନ କରୁଛନ୍ତି। ସେ ଲଣ୍ଡନରେ ନିଜର ଦୁଇ ଭଉଣୀଙ୍କ ସହ ପାଠପଢିଥିଲେ। ଭିନ୍ନ ଭିନ୍ନ ସଂସ୍କୃତି ଭିତରେ ବଢିବା ପରେ ଏବେ ବୌଦ୍ଧ ଧର୍ମର ସିଦ୍ଧାନ୍ତକୁ ଗ୍ରହଣ କରିଛନ୍ତି। ଠିକ୍ ଯେପରି ଗୌମତ ବୁଦ୍ଧ ନିଜ ରାଜକୀୟ ଭୋଗବିଳାସ ପରିତ୍ୟାଗ କରି ସଂସାର ବୈରାଗୀ ହୋଇଥିଲେ ସେଭଳି ବାଟ ଗ୍ରହଣ କରିଛନ୍ତି।।
