ନୂଆଦିଲ୍ଲୀ,୨୯।୭: ଭାରତୀୟ ରେଲଓ୍ବେ ଦୁନିଆର ଚତୁର୍ଥ ସବୁଠାରୁ ବଡ଼ ରେଲଓ୍ବେ ନେଟଓ୍ବର୍କ। ଯେଉଁଥିରେ ପ୍ରତିଦିନ ଲକ୍ଷାଧିକ ଲୋକ ଯାତ୍ରା କରନ୍ତି। ଏହାକୁ ସମ୍ଭାଳିବା ପାଇଁ ୧୨ ଲକ୍ଷ କର୍ମଚାରୀ କାମ କରନ୍ତି, ଯାହାକି କୌଣସି ଦେଶର ରେଲଓ୍ବେ ସିଷ୍ଟମଠାରୁ ସବୁଠାରୁ ଅଧିକ ଓ ଏହା ପ୍ରାୟ ଦେଶର କୋଣ-ଅନୁକୋଣରେ ପରସ୍ପର ସହ ଯୋଡିଥାଏ। ଟ୍ରେନ୍ରେ ଏସି କ୍ଲାସରେ ଫାଷ୍ଟ, ସେକେଣ୍ଡ ଓ ଥାର୍ଡ ଏହି କୋଚ୍ ରହିଥାଏ। ସେଥିରେ କମ୍ବଳ, ଚାଦର,ତକିଆ ଓ ଟାଓ୍ବେଲ ମିଳିଥାଏ। ଏହାକୁ ବେଡ୍ ରୋଲ୍ କୁହାଯାଏ। ଏବେ ଯାତ୍ରୀଙ୍କ ପାଇଁ ଏକ ଜରୁରୀ ଖବର। ତାହା ହେଲା ଏହାକୁ ଯଦି ଚୋରି କରନ୍ତି ତେବେ ଲାଗିବ ଜରିମାନା।
ଏହି ବେଡ୍ରୋଲ୍ ଯାତ୍ରୀଙ୍କୁ ତାଙ୍କର ସିଟ୍ରେ ଆଇଆରସିଟିସି ପକ୍ଷରୁ ଯୋଗାଇ ଦିଆଯାଇଥାଏ। ଏହାର ବୁକିଂ ଟିକେଟ ବୁକ୍ କରିବା ସହ ହୋଇଯାଇଥାଏ। ଏହାର ଚାର୍ଜ ମଧ୍ୟ ଟିକେଟ ସହ ଯୋଡା ଯାଇଥାଏ। ଏହି ବେଡ୍ରୋଲ୍କୁ ଯାତ୍ରା ଶେଷ ହେବାପରେ ରେଲଓ୍ବେକୁ ଫେରାଇ ଦିଆଯାଇଥାଏ। ଏହା ହେଉଛି ପ୍ରତ୍ୟେକ ଯାତ୍ରୀଙ୍କ ଦାୟିତ୍ବ। ତାକୁ ସାଙ୍ଗରେ ନେବା ଦଣ୍ଡନୀୟ ଅପରାଧ। କାରଣ ଏସବୁ ରେଲଓ୍ବେର ସମ୍ପତ୍ତି। ଯଦି କୌଣସି ଯାତ୍ରୀ ଟ୍ରେନ୍ରେ ରେଲଓ୍ବେର କମ୍ବଳ, ଚାଦର, ତକିଆ କିମ୍ବା ଟାଓ୍ବେଲ ନେଇ ଯାଆନ୍ତି ତେବେ ତାଙ୍କୁ ୧୦୦୦ ଟଙ୍କାର ଜରିମନା ଦେବାକୁ ହେବ। ଯଦି ଜରିମାନା ଦବୋକୁ ମନା କରନ୍ତି କିମ୍ବା ଅସମର୍ଥ ବୋଲି କୁହନ୍ତି ତେବେ ୧ ବର୍ଷର ଜେଲ ଦଣ୍ଡ କାଟିବାକୁ ପଡିବ।
ଭାରତୀୟ ରେଲଓ୍ବେରେ କମ୍ବଳ, ଚାଦର, ତକିଆ ଆଦି ଜିନିଷ ରେଲଓ୍ବେର ସମ୍ପତ୍ତି ବୋଲି କୁହାଯାଏ। ଏହାକୁ ଚୋରାଇବା ଦ୍ବାରା ରେଲଓ୍ବେ ସମ୍ପତ୍ତି ଅଧିନିୟମ,୧୯୬୬ ଅନୁସାରେ କାର୍ଯ୍ୟାନୁଷ୍ଠାନ ହୋଇପାରେ। ପ୍ରଥମ ଥର ଧରାପଡିଲେ ଏକ ବର୍ଷ ପର୍ଯ୍ୟନ୍ତ ଜେଲ କିମ୍ବା ୧୦୦୦ ଟଙ୍କା ଜରିମାନା। ଗମ୍ଭୀର ମାମଲାରେ ଏକାଧିକଥର ଏହି ଅପରାଧ ଦୋହରାଇଲେ ୫ ବର୍ଷ ପର୍ଯ୍ୟନ୍ତ ଜେଲ୍ ଏବଂ ଜରିମାନା ହୋଇପାରେ।
