ପୁଣେ,୩୦।୭: ମହାରାଷ୍ଟ୍ରର ପୁଣେରୁ ସାମନାକୁ ଆସିଛି ଲଜ୍ଜାଜନକ ଘଟଣା। କାର୍ଗିଲ ଯୁଦ୍ଧରେ ଦେଶ ପାଇଁ ଲଢି ସାରିଥିବା ପୂର୍ବତନ ସୈନିକ ହକିମୁଦ୍ଧିନ୍ ଶେଖ୍ଙ୍କ ପରିବାରକୁ ‘ବାଂଲାଦେଶୀ’ କହି ଟାର୍ଗେଟ କରାଯାଇଥିବା ଅଭିଯୋଗ ଆସିଛି। ପୁଣେର ଚନ୍ଦନନଗର ଅଞ୍ଚଳରେ ଗତ ଶନିବାର ଅଧା ରାତିରେ ପ୍ରାୟ ୮୦ ଜଣ ଲୋକ ତାଙ୍କ ଘର ଭିତରକୁ ହଠାତ ପଶି ଆସିଥିଲେ। ଏହା ସହ ତାଙ୍କ ନାଗରିକତା ପ୍ରମାଣ କରିବାକୁ କହିଥିଲେ। ସେମାନେ ପୀଡିତ ପରିବାରର ଆଧାର କାର୍ଡ ମଧ୍ୟ ଯାଞ୍ଚ କରିଥିବା ଅଭିଯୋଗ ହୋଇଛି। ପରିବାର ଲୋକ ଅଭିଯୋଗ କରିଛନ୍ତି ହିନ୍ଦୁବାଦୀ ସଂଗଠନର କିଛି ଲୋକ ଘରେ ପଶି ସେମାନଙ୍କୁ ବାଂଲାଦେଶୀ ବୋଲି କହିଥିଲେ।
ହାକିମୁଦ୍ଦିନ ଶେଖ ଭାରତୀୟ ସେନାରେ କାର୍ଯ୍ୟ କରିସାରିଛନ୍ତି। ଏପରିକି କାରଗିଲ ଯୁଦ୍ଧରେ ମଧ୍ୟ ଲଢିଛନ୍ତି। ହାକିମୁଦ୍ଦିନ ବର୍ତ୍ତମାନ ତାଙ୍କ ପରିବାର ସହିତ ଉତ୍ତର ପ୍ରଦେଶର ପ୍ରତାପଗଡ଼ରେ ରୁହନ୍ତି। ହାକିମୁଦ୍ଦିନଙ୍କ ଦୁଇ ଭାଇ ସେମାନଙ୍କ ପରିବାର ସହିତ ପୁଣେରେ ରୁହନ୍ତି। ପୁଣେରେ ରହୁଥିବା ଭାଇ ଇରଶାଦ ଶେଖ କହିଛନ୍ତି, 'ଯେତେବେଳେ ସେ ଘରେ ଥିଲେ ଶନିବାର ମଧ୍ୟ ରାତ୍ରୀରେ ତାଙ୍କ ଘରର ଦ୍ୱାର କିଛି ଲୋକ ବାଡ଼େଇଥିଲେ। ଯେତେବେଳେ ଦ୍ୱାର ଖୋଲିଥିଲେ, ବହୁ ଲୋକ ତାଙ୍କ ଘର ଭିତରକୁ ପଶି ଯାଇଥିଲେ। ସେହି ଲୋକମାନେ ଆମକୁ ଆମର ଆଧାର କାର୍ଡ ଦେଖାଇବାକୁ କହିଲେ। ଯେତେବେଳେ ଆମେ ଆମର ଆଧାର କାର୍ଡ ଦେଖାଇଲୁ, ସେମାନେ କହିଲେ ଯେ ଆଧାର କାର୍ଡଗୁଡ଼ିକ ନକଲି।'
ଇରଶାଦ ଶେଖ କହିଛନ୍ତି ଯେ ଆମେ ସେମାନଙ୍କୁ ବୁଝାଇବାକୁ ଚେଷ୍ଟା କରିଥିଲୁ ଯେ ଆମେ ଗତ କିଛି ଦଶନ୍ଧି ଧରି ପୁଣେରେ ରହୁଛୁ। ତାଙ୍କ ବଡ଼ ଭାଇ ସେନାରେ ଚାକିରି କରିଛନ୍ତି ଏବଂ ତାଙ୍କ ଦୁଇ କାକା ମଧ୍ୟ ସେନାରେ ଚାକିରି କରିଛନ୍ତି। ଇରଶାଦ ଦାବି କରିଛନ୍ତି ଯେ ସେହି ଲୋକମାନେ ତାଙ୍କ କଥା ଶୁଣି ନଥିଲେ ଏବଂ ତାଙ୍କୁ ବାଂଲାଦେଶୀ ବୋଲି କହିବା ଆରମ୍ଭ କରିଥିଲେ। ସେମାନେ ଜୟ ଶ୍ରୀ ରାମର ସ୍ଲୋଗାନ ଦେଇଥିଲେ ଏବଂ ତାଙ୍କୁ ଏବଂ ତାଙ୍କ ପରିବାରକୁ ପୋଲିସ ଷ୍ଟେସନ ଯିବାକୁ କହିଥିଲେ। ତାଙ୍କ ସହିତ ଉପସ୍ଥିତ ଦୁଇ ଜଣ ବ୍ୟକ୍ତି ନିଜକୁ ପୋଲିସ ବୋଲି ପରିଚୟ ଦେଇଥିଲେ। ଉଭୟେ ସାଦା ପୋଷାକ ପିନ୍ଧିଥିଲେ।ଶେଖ୍ କହିଛନ୍ତି, ଆମେ ଚନ୍ଦନ ନଗର ପୋଲିସ ଷ୍ଟେସନ୍ ଯାଇଥିଲୁ। ସେଠାରେ ମହିଳା ଇନ୍ସପେକ୍ଟର ଆମର ଦସ୍ତାବିଜର ଯାଞ୍ଚ କରିଥିଲେ ଓ ଆମକୁ ଅପେକ୍ଷା କରିବାକୁ କୁହାଯାଇଥିଲା। ଦୁଇ ଘଣ୍ଟା ଅପେକ୍ଷା କରିବା ପରେ ଆମକୁ ଘରକୁ ପଠାଇ ଦିଆଯାଇଥିଲା। ତା ପର ଦିନ ପୁଣିଥରେ ଆସିବାକୁ କୁହାଯାଇଥିଲା। ଏହା ସହ ପୋଲିସ କହିଥିଲା ଯଦି କାଲି ଆସିବନି ତେବେ ତୁମକୁ ବାଂଲାଦେଶୀ ନାଗରିକ ଘୋଷିତ କରି ଦିଆଯିବ। ଇରଶାଦ ଶେଖ୍ ତା ପରଦିନ ଥାନାକୁ ଆସିବା ପରେ ତାଙ୍କୁ ଏହି ପ୍ରସଙ୍ଗରେ ଚୁପ୍ ରହିବାକୁ ପରାମର୍ଶ ଦିଆଯାଇଥିଲା। ଏପରିକି ପୋଲିସ ଏହି ମାମଲାକୁ ରଫା ଦଫା କରିବାକୁ ଚାପ ପକାଇଥିଲା।
