ହାଇଦ୍ରାବାଦ,୧୪/୧୨: ହାଇଦ୍ରାବାଦ ସେଣ୍ଟ୍ରାଲ୍ ଜେଲ୍ରୁ ବାହାରିଲେ ଅଲ୍ଲୁ ଅର୍ଜ୍ଜୁନ। ତେଲଙ୍ଗାନା ହାଇକୋର୍ଟରୁ ଜାମିନ୍ ମିଳିଥିଲେ ସୁଦ୍ଧାଜେଲ୍ରେ ଗୋଟିଏ ରାତି କାଟି ଥିଲେ ଅଲ୍ଲୁ। ଦଳାଚକଟାରେ ମହିଳାଙ୍କ ମୃତ୍ୟୁ ମାମଲାରେ ଗିରଫ ହୋଇଥିଲେ।
ହାଇଦ୍ରାବାଦ ସନ୍ଧ୍ୟା ଥିଏଟରରେ ପୁଷ୍ପା -୨ ଫିଲ୍ମ ସ୍କ୍ରିନିଂ ବେଳେ ହୋଇଥିବା ଦଳାଚକଟା ମାମଲାରେ ଶୁକ୍ରବାର ତେଲଙ୍ଗାନା ପୁଲିସ ସାଉଥ୍ ସୁପରଷ୍ଟାର ଅଲ୍ଲୁ ଅର୍ଜୁନଙ୍କୁ ହଠାତ୍ ଗିରଫ କରିବା କରିବା ଘଟଣାକୁ ନେଇ କଳାକାର ଓ ପ୍ରଶଂସକମାନେ ସ୍ତବ୍ଧ ହୋଇଯାଇଥିଲେ । ଗିରଫ ପରେ ତାଙ୍କୁ ନାମପାଲ୍ଲୀ କୋର୍ଟରେ ହାଜର କରାଯାଇଥିଲା । ତଳକୋର୍ଟ ତାଙ୍କୁ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ତେବେ ଏହାର ଠିକ୍ ଘଣ୍ଟାକ ପରେ ହାଇକୋର୍ଟ ତାଙ୍କୁ ଜାମିନ ପ୍ରଦାନ କରିଥିଲେ । ଯାହାଫଳରେ ତାଙ୍କ ପ୍ରଶଂସକ ଓ ଶୁଭେଚ୍ଛୁ ଆଶ୍ୱସ୍ତ ହୋଇଥିଲେ । ତେବେ ହାଇକୋର୍ଟଙ୍କ ରାୟ ଜେଲ୍ରେ ପହଞ୍ଚିବା ବେଳକୁ ରାତି ହୋଇଯାଇଥିଲା । ଯାହାଫଳରେ ସେ ଜେଲ୍ରୁ ବାହାରି ପାରିନାହାନ୍ତି । ଶନିବାର ସକାଳେ ଜେଲ୍ରୁ ମୁକ୍ତ ହୋଇଛନ୍ତି।
ଅଲ୍ଲୁ ଅର୍ଜୁନଙ୍କୁ ଗିରଫ କରିବାକୁ ନେଇ ଶୁକ୍ରବାର ବେଶ୍ ନାଟକୀୟ ପରିସ୍ଥିତି ଦେଖିବାକୁ ମିଳିଥିଲା । ତେଲଙ୍ଗାନାର ଏକ ପୁଲିସ ଟିମ୍ ଶୁକ୍ରାବର ସକାଳେ ତାଙ୍କ ଘରେ ପହଞ୍ଚିଥିଲା । ସେଠାରୁ ତାଙ୍କୁ ଉଠାଇ ଆଣି ଚିକଡପଲ୍ଲୀ ଥାନାରେ ରଖିଥିଲା । ଥାନାରେ ପଚରାଉଚୁରା ପରେ ମଧ୍ୟାହ୍ନ ୧୨ଟାରେ ତାଙ୍କୁ ଗିରଫ କରାଯାଇଥିଲା । ପରେ ଗାନ୍ଧୀ ହସ୍ପିଟାଲକୁ ନେଇ ତାଙ୍କର ମେଡିକାଲ ଚେକ୍ କରାଯିବା ସହ ଅପରାହ୍ନ ୪ଟାରେ ନାମପଲ୍ଲୀ କୋର୍ଟରେ ହାଜର କରାଇଥିଲା ପୁଲିସ । କୋର୍ଟ ଅଲ୍ଲୁ ଅର୍ଜୁନଙ୍କୁ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇବାକୁ ନିର୍ଦ୍ଦେଶ ଦେଇଥିଲେ ।
ଯାହାଫଳରେ ତାଙ୍କୁ ଚଞ୍ଚଲଗୁଡା ସେଣ୍ଟ୍ରାଲ ଜେଲ୍କୁ ନିଆଯାଇଥିଲା । ସେପଟେ ଅଲ୍ଲୁ ଅର୍ଜୁନଙ୍କ ଓକିଲ ତେଲଙ୍ଗାନା ହାଇକୋର୍ଟରେ ପିଟିସନ ଫାଇଲ କରି ତୁରନ୍ତ ଶୁଣାଣି ଲାଗି ଅନୁରୋଧ କରିଥିଲେ । ହାଇକୋର୍ଟ ଅପରାହ୍ନ ୫ଟାରେ ମାମଲାର ଶୁଣାଣି କରିଥିଲେ । ହାଇକୋର୍ଟରେ ଶୁଣାଣି ସମୟରେ ତାଙ୍କ ଓକିଲ ୨୦୧୭ରେ ଅଭିନେତା ଶାହରୁଖ ଖାନଙ୍କ ରଇସ୍ ଫିଲ୍ମ ସମୟର ଉଦାହରଣ ଦେଇଥିଲେ। ସେ କହିଥିଲେ ଫିଲ୍ମ ପ୍ରସାର ପାଇଁ ଗୁଜରାଟ ଯାଇଥିଲା ବେଳେ ଶହରୁଖ ନିଜର ଟି-ସାର୍ଟ ଫିଙ୍ଗି ଥିଲେ । ଯାହାଫଳରେ ସେଠାରେ ଦଳାଚକଟା ଘଟିଥିଲା । ହେଲେ ଗୁଜରାଟ ହାଇକୋର୍ଟ ଓ ପରେ ସୁପ୍ରିମକୋର୍ଟ ଶାହରୁଖଙ୍କୁ ଆଶ୍ୱସ୍ତି ଦେଇଥିଲେ । ହାଇକୋର୍ଟ ଉଭୟ ପକ୍ଷର ଯୁକ୍ତି ଶୁଣିବା ପରେ ୪ ସପ୍ତାହ ପାଇଁ ଅଲ୍ଲୁ ଅର୍ଜୁନଙ୍କୁ ଜାମିନ ପ୍ରଦାନ କରିଥିଲେ । ଶୁଣାଣି ସମୟରେ ବିଚାରପତି ଜୁଭାଡି ଶ୍ରୀଦେବୀ କହିଥିଲେ ଅଭିନେତାଙ୍କର ମଧ୍ୟ ଜୀବନଧାରଣ କରିବାର ଅଧିକାର ରହିଛି । ନିଜ ଫିଲ୍ମର ପ୍ରିମିୟର ପାଇଁ ସେ ସେଠାକୁ ଯାଇଥିଲେ । ସେଥିପାଇଁ ଦଳାଚକଟା ଲାଗି ତାଙ୍କୁ ଦାୟୀ କରାଯାଇପାରିବ ନାହିଁ । ସେ ଜଣେ ଅଭିନେତା । ତାଙ୍କୁ ତାଙ୍କ ଅଧିକାରରୁ ବଞ୍ଚିତ କରାଯାଇପାରିବ ନାହିଁ । ପୃଥିବୀର ଜଣେ ନାଗରିକ ଭାବେ ତାଙ୍କର ମଧ୍ୟ ଜୀବନ ଧାରଣ ଓ ସ୍ୱାଧୀନତାର ଅଧିକାର ରହିଛି ।
ତେଲଙ୍ଗାନା ସରକାରଙ୍କ ଓକିଲ ଯୁକ୍ତି ବାଢ଼ିଥିଲା ଯେ ଏଭଳି ଏକ ଘଟଣା ଘଟିବ ବୋଲି ଅଲ୍ଲୁ ଅର୍ଜୁନ ଭଲ ଭାବେ ଜାଣି ମଧ୍ୟ ସେଠାକୁ ଯାଇଥିଲେ । ତେଣୁ ଯେଉଁ ଦୁର୍ଘଟଣା ଘଟିଲା ସେଥିପାଇଁ ସେ ଦାୟୀ । ତା’ଛଡା ପୁଲିସ ମଧ୍ୟ ଭିଡ ଆଶଙ୍କା ପ୍ରକାଶ କରିବା ସହ ଅଭିନେତାଙ୍କୁ ନ ଆଣିବା ଲାଗି ଥିଏଟର ମାଲିକଙ୍କୁ ପରାମର୍ଶ ଦେଇଥିଲା । କିନ୍ତୁ ସେ ପୁଲିସର ପରାମର୍ଶ ମାନି ନଥିଲେ । ତେବେ ହାଇକୋର୍ଟ ସରକାରଙ୍କ ଏଭଳି ଯୁକ୍ତିକୁ ଖାରଜ କରିଦେଇଥିଲେ । କହିଥିଲେ ପୁଲିସ ଠାରୁ ସେ ଅନୁମତି ନେଇଥିଲେ । ତେବେ ତାଙ୍କ ବିରୋଧରେ ରୁଜୁ ଏଫଆଇଆରକୁ ରଦ୍ଦ କରିବା ଲାଗି ଅଲ୍ଲୁ ଅର୍ଜୁନଙ୍କ ଓକିଲ ଯୁକ୍ତି ବାଢ଼ିଥିଲେ । କିନ୍ତୁ ସରକାରୀ ଓକିଲ କହିଥିଲେ ଯେହେତୁ ସେ ଗିରଫ ହୋଇସାରିଛନ୍ତି ତେଣୁ ବର୍ତ୍ତମାନ ପରିସ୍ଥିତିରେ ତାହା ସମ୍ଭବ ନୁହେଁ । ଉଭୟ ପକ୍ଷର ଯୁକ୍ତି ଶୁଣିବା ପରେ ବିଚାରପତି ୫୦ ହଜାର ଟଙ୍କାର ବ୍ୟକ୍ତିଗତ ବେଲ୍ବଣ୍ଡରେ ଜାମିନ ପ୍ରଦାନ କରିଥିଲେ । ଏଥିସହ ତଦନ୍ତରେ ସହଯୋଗ କରିବେ ଏବଂ ସାକ୍ଷୀମାନଙ୍କୁ ପ୍ରଭାବିତ କରିବେ ନାହିଁ ବୋଲି ବିଚାରପତି ସର୍ତ୍ତ ରଖିଥିଲେ । କିନ୍ତୁ ଜାମିନି ମିଳିବା ସତ୍ତେ୍ୱ ମଧ୍ୟ ଅଲ୍ଲୁ ଅର୍ଜୁନ ଜେଲ୍ରୁ ବାହାରିପାରିନାହାନ୍ତି । ଜେଲ୍ର ଜଣେ ଅଧିକାରୀ କହିଛନ୍ତି ହାଇକୋର୍ଟଙ୍କ ଜାମିନ ରାୟ ମିଳିବା ବେଳକୁ ରାତି ହୋଇଯାଇଥିଲା । ଜେଲ୍ ମାନୁଆଲ ଅନୁସାରେ ରାତିରେ କାହାକୁ ଛଡାଯାଇ ନଥାଏ । ତେଣୁ ଶନିବାର ସକାଳେ ଅଲ୍ଲୁ ଅର୍ଜୁନଙ୍କୁ ଜେଲ୍ରୁ ଛଡ଼ାଯାଇଛି।
ଅନ୍ୟପକ୍ଷରେ ଅଲ୍ଲୁ ଅର୍ଜୁନ ହାଇଦ୍ରାବାଦ ପୁଲିସ ଉପରେ ଜୋର୍ଦାର ବର୍ଷିଛନ୍ତି । ତାଙ୍କ ଗିରଫଦାରୀ ପ୍ରକ୍ରିୟା ଉପରେ ସେ ଆପତ୍ତି ଉଠାଇଛନ୍ତି । କହିଛନ୍ତି ପୁଲିସ ତାଙ୍କୁ ବେଡ୍ରୁମ୍ ଭିତରୁ ଗିରଫ କରିବାକୁ ଯାଇଥିଲା । ଏପରିକି ତାଙ୍କୁ ଜଳଖିଆ ଖାଇବାକୁ ଦେଇ ନଥିଲା କିମ୍ବା ପୋଷାକ ବଦଳାଇବାକୁ ମଧ୍ୟ ସୁଯୋଗ ଦେଇନଥିଲା । ସୋସିଆଲ ମିଡିଆରେ ଏକ ଭିଡିଓ ମଧ୍ୟ ଦେଖିବାକୁ ମିଳିଛି । ଯେଉଁଥିରେ ଦେଖାଯାଇଛି କି ଅଲ୍ଲୁ ଅର୍ଜୁନ ତାଙ୍କ ଘରର ଉପର ମହଲାରୁ ଓହ୍ଲାଇ ପାର୍କିଂକୁ ଆସୁଛନ୍ତି । ସେଠାରେ ପୁଲିସ ଉପସ୍ଥିତ ଅଛନ୍ତି । ଏହି ସମୟରେ ତାଙ୍କ ଘରୋଇ ସହାୟକ ଦୌଡି ଆସି ଚା ଓ ପାଣି ଦେଉଛି। ସେଠାରେ ତାଙ୍କ ପତ୍ନୀ ସ୍ନେହା ରେଡ୍ଡୀଙ୍କୁ ମଧ୍ୟ ଦେଖାଯାଇଛି । ଅଲ୍ଲୁ ଅର୍ଜୁନ ପତ୍ନୀଙ୍କୁ ବୁଝାଉଛନ୍ତି । ଏହ ପରେ ପୁଲିସ ସହିତ ଯାଉଛନ୍ତି ।
ଗତ ୪ ତାରିଖରେ ହାଇଦ୍ରାବାଦର ସନ୍ଧ୍ୟା ଥିଏଟରରେ ଅଲ୍ଲୁ ଅର୍ଜୁନଙ୍କ ଅଭିନୀତ ପୁଷ୍କା-୨ ସ୍କ୍ରିନିଂ ଚାଲିଥିଲା । ଏହି ସମୟରେ ଅଲ୍ଲୁ ଅର୍ଜୁନ ସେଠାରେ ହଠାତ୍ ପହଞ୍ଚିଥିଲେ । ଗେଟ୍ ପାଖରେ କାର୍ର ସନରୁଫରେ ସେ ଦର୍ଶକଙ୍କୁ ହାତ ହଲାଇ ଅଭିନନ୍ଦନ ଜଣାଇଥିଲେ । ସେଠାରେ ଥିବା ପୁଲିସ ଭିଡ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲା । କିନ୍ତୁ ତାହା ସମ୍ଭବ ହୋଇନଥିଲା । ଫଳରେ ଅଭିନେତାଙ୍କ ସାନ୍ନିଧ୍ୟ ପାଇବା ଲାଗି ଦର୍ଶକଙ୍କ ମଧ୍ୟରେ ଠେଲାପେଲା ହୋଇଥିଲା । ପୁଲିସ ଲାଠିମାଡ଼ ମଧ୍ୟ କରିଥିଲା । ଏହି ସମୟରେ କିଛି ଲୋକ ଅଣନିଶ୍ୱାସୀ ହୋଇ ପଡିଯାଇଥିଲେ । ସେମାନଙ୍କୁ ହସ୍ପିଟାଲକୁ ନିଆଯାଇଥିଲା । ସେଠାରେ ରେବତୀ ନାମକ ଜଣେ ୩୯ ବର୍ଷୀୟ ମହିଳାଙ୍କ ମୃତ୍ୟୁ ହୋଇଥିଲା ବେଳେ ତାଙ୍କର ୯ ବର୍ଷୀୟ ନାବାଳକ ପୁଅ ଶ୍ରୀତେଜା ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଏହି ଘଟଣା ପରେ ପୁଲିସ ରେବତୀଙ୍କ ସ୍ୱାମୀ ଭାସ୍କରଙ୍କ ଅଭିଯୋଗ ଆଧାରରେ ଅଲ୍ଲୁ ଅର୍ଜୁନଙ୍କ ବିରୋଧରେ ବିଏନ୍ଏସ୍ର ୧୦୫ ଓ ୧୧୮ (୧)ରେ ମାମଲା ରୁଜୁ କରିଥିଲା । ଏଥିସହ ସନ୍ଧ୍ୟା ଥିଏଟରର ମାଲିକ ଏମ୍ ସନ୍ଦୀପ, ମ୍ୟାନେଜର ଏମ୍ ନାଗରାଜୁ ଓ ବାଲକୋନି ଇନ୍-ଚାର୍ଜ ଜି. ବିଜୟ ଚନ୍ଦରଙ୍କୁ ଗିରଫକରିଥିଲା । ଅବଶ୍ୟ ପରେ ଅଲ୍ଲୁ ଅର୍ଜୁନ ଏହି ଘଟଣାରେ ଦୁଃଖ ପ୍ରକାଶ କରିବା ସହ ରେବତୀଙ୍କ ପରିବାର ପାଇଁ ୨୫ ଲକ୍ଷ ଟଙ୍କାର ସହାୟତା ଘୋଷଣା କରିଥିଲେ । ଏଥିସହ ତାଙ୍କ ପରିବାରର ସମସ୍ତ ଦାୟିତ୍ୱ ମଧ୍ୟ ବହନ କରିବେ ବୋଲି କହିଥିଲେ ।
