ନୂଆଦିଲ୍ଲୀ,୧।୫: ଦକ୍ଷିଣ କୋରିଆର କାର୍ଯ୍ୟନିର୍ବାହୀ ରାଷ୍ଟ୍ରପତି ହାନ ଡକ-ସୁ ନିଜ ପଦରୁ ଦେଇଛନ୍ତି ଇସ୍ତଫା । ସେ ଗୁରୁବାର ଦିନ ଇସ୍ତଫା ଦେବାର ଘୋଷଣା କରିଥିଲେ। ଆସନ୍ତା ମାସରେ ଅନୁଷ୍ଠିତ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ଭାଗ ନେବାର ଖବର ଭିତରେ ଏହି ପଦକ୍ଷେପ ନେଇଛନ୍ତି। ହାନ୍ ଏକ ଟେଲିଭିଜନ ବ୍ରିଫିଂରେ କହିଛନ୍ତି, ସେ ଦେଶ ପାଇଁ ଏକ ବଡ଼ ଦାୟିତ୍ୱ ଗ୍ରହଣ କରିବା ପାଇଁ ପଦ ଛାଡିବାକୁ ନିଷ୍ପତ୍ତି ନେଇଛନ୍ତି।
ଦକ୍ଷିଣ କୋରିଆ ଗଣମାଧ୍ୟମ ଅନୁଯାୟୀ, ହାନ ଶୁକ୍ରବାର ଦିନ ଆନୁଷ୍ଠାନିକ ଭାବରେ ରାଷ୍ଟ୍ରପତି ନିର୍ବାଚନ ପାଇଁ ନିଜର ଅଭିଯାନ ଆରମ୍ଭ କରିବେ। ହାନଙ୍କୁ ତତ୍କାଳୀନ ରାଷ୍ଟ୍ରପତି ୟୁନ୍ ସୁକ୍ ୟେଓଲ୍ ଦେଶର ପ୍ରଧାନମନ୍ତ୍ରୀ ନିଯୁକ୍ତ କରିଥିଲେ। ଏହା ଦେଶର ଦ୍ବିତୀୟ ସବୁଠାରୁ ଗୁରୁତ୍ବପୂର୍ଣ୍ଣ ପଦବୀ। ତେବେ ୟେଓଲଙ୍କୁ ପରେ ମାର୍ଶଲ ଲ’ ଲଗାଇବା ଷଡଯନ୍ତ୍ର ଅଭିଯୋଗରେ ପଦରୁ ହଟାଯାଇଥିଲା। ଏହି କାରଣରୁ ନିର୍ବାଚନ ହେଉଛି।
ହାନ୍ ଜଣେ ସମ୍ଭାବ୍ୟ ରୁଢିବାଦୀ ନେତା ଭାବରେ ଉଭା ହେଉଛନ୍ତି। ଗତ ବର୍ଷ ଡିସେମ୍ବର ୩ ତାରିଖରେ ୟୁନ୍ ସାମରିକ ଆଇନ ଲାଗୁ କରିବା ପରଠାରୁ ମୁଖ୍ୟ ରକ୍ଷଣଶୀଳ ପିପୁଲ୍ସ ପାୱାର ପାର୍ଟି ଅବ୍ୟବସ୍ଥିତ ହୋଇପଡ଼ିଛି। ପର୍ଯ୍ୟବେକ୍ଷକଙ୍କ କହିବା ଅନୁସାରେ, ହାନ୍ ଉଦାରବାଦୀ ନେତା ଲି ଜାଏ-ମ୍ୟୁଙ୍ଗଙ୍କ ବିରୋଧରେ ଅଭିଯାନ ଆରମ୍ଭ କରିବା ପାଇଁ ପିପୁଲ୍ସ ପାୱାର ପାର୍ଟି ସହିତ ଏକ ମେଣ୍ଟ ଗଠନ କରିପାରନ୍ତି।
୭୫ ବର୍ଷୀୟ ହାନ ଜଣେ ପ୍ରଶାସନିକ ଅଧିକାରୀ। ଯାହାଙ୍କର ପ୍ରାୟ ୪୦ ବର୍ଷର ସାର୍ବଜନୀନ ସେବା ଅଭିଜ୍ଞତା ଅଛି। ସେ ଅର୍ଥନୀତିରେ ହାଭାର୍ଡରେ ଡକ୍ଟରେଟ୍ ହାସଲ କରିଛନ୍ତି। ରୁଢିବାଦୀ ଏବଂ ଉଦାରବାଦୀ ଉଭୟ ସରକାରରେ ଉଚ୍ଚ ପଦବୀରେ ସେ କାର୍ଯ୍ୟ କରିଛନ୍ତି। ଏପରିକି ବାଣିଜ୍ୟ ମନ୍ତ୍ରୀ, ଅର୍ଥମନ୍ତ୍ରୀ ଏବଂ ଆମେରିକାରେ ରାଷ୍ଟ୍ରଦୂତ ଭାବରେ ମଧ୍ୟ କାର୍ଯ୍ୟ କରି ସାରିଛନ୍ତି। ସେ ଦୁଇଥର ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି। ହାନ୍ ଦେଶର ଦ୍ୱିତୀୟ ସବୁଠାରୁ ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ, ପ୍ରଥମେ ଉଦାରବାଦୀ ରାଷ୍ଟ୍ରପତି ରୋହ ମୁ-ହୁନ୍ଙ୍କ ଅଧୀନରେ ୨୦୦୭-୨୦୦୮ ପର୍ଯ୍ୟନ୍ତ ଓ ପରେ ୟୁନ୍ଙ୍କ କାର୍ଯ୍ୟକାଳ ମଧ୍ୟରେ ସେ ଦେଶର ଦ୍ବିତୀୟ ସବୁଠାରୁ ଗୁରୁତ୍ବପୂର୍ଣ୍ଣ ପଦ ସମ୍ଭାଳିଛନ୍ତି। ହାନ୍ଙ୍କ ଇସ୍ତଫା ପରେ ଉପ-ପ୍ରଧାନମନ୍ତ୍ରୀ ଚୋଇ ସାଙ୍ଗ-ମୋକ୍ ୩ ଜୁନ୍ରେ ଏକ ନୂଆ ନେତା ଚୟନ ନହେବା ପର୍ଯ୍ୟନ୍ତ କାର୍ଯ୍ୟନିର୍ବାହୀ ରାଷ୍ଟ୍ରପତି ହୋଇ ରହିବେ।
