ନୂଆଦିଲ୍ଲୀ,୨୮/୧୦ : ମଧ୍ୟମ ଏବଂ ଦୀର୍ଘ ମିଆଦି ଭିତ୍ତିରେ ରୁପା ଦର ବୃଦ୍ଧି ହେବାର ଢ଼େର ସମ୍ଭାବନା ରହିଛି । ଦର ବୃଦ୍ଧିରେ ଏହା ସୁନାକୁ ତାଳଦେଇପାରେ କିମ୍ବା ପଛରେ ପକାଇପାରେ । ଆଗାମୀ ୧୨ରୁ ୧୫ ମାସରେ ମଲ୍ଟି କମୋଡିଟି ଏକ୍ସଚେଞ୍ଜରେ କିଲୋ ପିଛା ରୁପା ଦର ୧.୨୫ ଲକ୍ଷ ଟଙ୍କା ଟଙ୍କା ଛୁଇଁପାରେ । ସେହିଭଳି କୋମେକ୍ସରେ ଆଉନ୍ସ ପିଛା ୪୦ ଡଲାର ଛୁଇଁପାରେ । ଆର୍ଥିକ ସେବା ଯୋଗାଣକାରୀ କମ୍ପାନି ମୋତିଲାଲ ଓସୱାଲ ଫାଇନାନ୍ସିଆଲ ସର୍ଭିସେସ ଲିମିଟେଡ ପକ୍ଷରୁ ଏଭଳି ଆକଳନ କରାଯାଇଛି । ୨୦୨୪ରେ ରୁପାର ଅଭିବୃଦ୍ଧି ବେଶ ଆଖିଦୃଶିଆ ରହିଛି । ଚଳିତ ବର୍ଷ ଅଦ୍ୟାବଧି ଏହାର ଦର ୪୦% ଯାଏ ବଢ଼ିଛି । ଫଳରେ ଘରୋଇ ବଜାରରେ ଏହାର ଦର ଏବେ ୧ ଲକ୍ଷ ଟଙ୍କା ସ୍ତର ପାର୍ କରିଛି ।
ଲୋକେ ରୁପା କ୍ରୟ ବଢ଼ାଇଥିବାରୁ ଏବେ ଏହାର ଚାହିଦା ଉପର ମୁହାଁ । ସେହିଭଳି ଶିଳ୍ପ କ୍ଷେତ୍ରରେ ଏହାର ବ୍ୟବହାର ବଢ଼ିଛି । ତେବେ କେବଳ ରୁପା ନୁହେଁ ଏହି ଅବଧିରେ ସୁନା ଦର ମଧ୍ୟ ବୃଦ୍ଧି ହେବାର ଢ଼େର ସମ୍ଭାବନା ରହିଛି । ମଧ୍ୟମ ମିଆଦି ଭିତ୍ତିରେ ସୁନା ଦର ୧୦ ଗ୍ରାମ ପିଛା ୮୧ ହଜାର ଏବଂ ଦୀର୍ଘ ମିଆଦୀ ଭିତ୍ତିରେ ୮୬ ହଜାର ଟଙ୍କା ଛୁଇଁପାରେ । କୋମେକ୍ସରେ ମଧ୍ୟମ ମିଆଦି ଭତ୍ତିରେ ଏହା ୨୮୩୦ ଡଲାର ଏବଂ ଦୀର୍ଘମିଆଦି ଭିତ୍ତିରେ ୩ ଡଲାର ଯାଏ ଯାଇପାରେ । ୨୦୨୧କୁ ବାଦ ଦେଲେ ସୁନା ସର୍ବୋତ୍ତମ ପରଫରର୍ମିଂ ଆସେଟ କ୍ଲାସ ଭାବେ ଉଭା ହୋଇଛି । ୨୦୧୬ ପରଠୁ ଏହା ସବୁ ବେଳେ ଉନ୍ନତ ସ୍ଥିତିରେ ରହି ବନ୍ଦ ହେଉଛି । ଚଳିତ ବର୍ଷ ଉଭୟ କୋମେକ୍ସ ଏବଂ ଘରୋଇ ବଜାରରେ ସୁନା ରେକର୍ଡ ଉଚ୍ଚ ସ୍ତରରେ ରହିଛି । ଚଳିତ ବର୍ଷ ଅଦ୍ୟାବଧି ଏ କ୍ଷେତ୍ରରେ ୩୦% ବୃଦ୍ଧି ପରିଲକ୍ଷିତ ହୋଇଛି ।
ମୋତିଲାଲ ଓସୱାଲ ଫାଇନାନ୍ସିଆଲ ସର୍ଭିସେସ ଲିମିଟେଡର କମୋଡିଟି ରିସର୍ଚ୍ଚ ଆନାଲିଷ୍ଟ, ମାନବ ମୋଦି କହିଛନ୍ତି, ୨୦୨୪ରେ ଦରବୃଦ୍ଧି ଜାରି ରହିଛି । ଦରବୃଦ୍ଧି ଲାଗି ବଜାରରେ ଅନିଶ୍ଚିତତା, ସୁଧ ହାର ହ୍ରାସ ଆଶା, ଚାହିଦା ବୃଦ୍ଧି ଏବଂ ଡଲାର ତୁଳନାରେ ଟଙ୍କା ମୂଲ୍ୟ ହ୍ରାସ ହେବା ଭଳି କାରଣ ଗୁଡିକ ରହିଛି । ଆମେରିକା ରାଷ୍ଟ୍ରପତି ନିର୍ବାଚନ ବଜାର ଉପରେ ମଧ୍ୟ ପ୍ରଭାବ ପକାଇପାରେ । ପାର୍ବଣ ସମୟରେ ସୁନା ଚାହିଦା ଊଦ୍ଧ୍ୱର୍ରେ ରହିଥାଏ । ଚଳିତ ବର୍ଷ ଦୀପାବଳୀ ସମୟରେ ଆମେରିକା ରାଷ୍ଟ୍ରପତି ନିର୍ବାଚନ ଫେଡେରାଲ ରିଜର୍ଭର ପଲିସି ବୈଠକ ରହିଛି । ଏହା ବଜାରର ମନୋଭାବକୁ ଉନ୍ନତ କରିପାରେ ବୋଲି ଆକଳନ କରାଯାଉଛି । ତେବେ ସୁନା ଦର ବୃଦ୍ଧି ଏହାର ଚାହିଦାକୁ କିଛିଟା ପ୍ରଭାବିତ କରିବ ବୋଲି ଆଶଙ୍କା କରାଯାଉଛି । ତେବେ ବିଶ୍ୱ ବଜାରର ଘଟଣା ଗୁଡିକ ଦରବୃଦ୍ଧିର କାରଣ ହୋଇପାରେ ।
ଉଲ୍ଲେଖଯୋଗ୍ୟ ସୁନା ଦର ଏବେ ବଢ଼ିଚାଲିଛି । ୧୦ ଗ୍ରାମ ପିଛା ୨୪ କ୍ୟାରେଟ ସୁନା ୮୧ ହଜାର ଟଙ୍କା ଆଡକୁ ମାଡି ଚାଲିଛି । ଫଳରେ ଏହା ଚାହିଦାକୁ କମାଇପାରେ । ଚାହିଦା ୧୫ରୁ ୨୦% ଖସିପାରେ ବୋଲି ଗହଣା ବ୍ୟବସାୟୀ ମାନେ ଆଶଙ୍କା ପ୍ରକଟ କରିଛନ୍ତି । ଏବେ ଗହଣା ବ୍ୟବସାୟୀ ମାନେ ଗଢ଼ା ମୂଲ୍ୟରେ ରିହାତି ସହ ଅନ୍ୟ ଫ୍ରିବିଜ ଦେବାକୁ ବାଧ୍ୟ ହେଉଛନ୍ତି । ଦୀପାବଳି ଓ ଧନତେରସରେ ସୁନା କିଣିଲେ ଘରକୁ ସମୃଦ୍ଧି ଆସେ ବୋଲି ବିଶ୍ୱାସ ରହିଛି । ବର୍ଷକରେ ଯେତେ ସୁନା ବିକ୍ରି ହୁଏ ତାର ପ୍ରାୟ ୩୦ରୁ ୪୦% ଏହି ସମୟରେ ବିକ୍ରି ହୋଇଥାଏ ।
