ନୂଆଦିଲ୍ଲୀ ୦୧/୦୧: ବିଦାୟ ନେଇଛି ୨୦୨୪ । ଆରମ୍ଭ ହୋଇଛି ୨୦୨୫ । ଚଳିତ ବର୍ଷ ଆରମ୍ଭରୁ କିଛି କ୍ଷେତ୍ରରେ ନୂଆ ନିୟମ ଲାଗୁ ହୋଇଛି। ଏହା ଲୋକଙ୍କ ଜୀବନ ଉପରେ ସିଧାସଳଖ ପ୍ରଭାବ ପକାଇବ । ଏହି ନିୟମ ଗୁଡିକ ମଧ୍ୟରେ ୟୁପିଆଇ, ପେନସନ, କୃଷି ଋଣ, ରିଚାର୍ଜ ପ୍ଲାନ ଭଳି ଅନ୍ୟ କିଛି କ୍ଷେତ୍ର ସାମିଲ ହୋଇଛି । କେଉଁ କ୍ଷେତ୍ରରେ ନିୟମ ସବୁ ପରିବର୍ତ୍ତନ ହୋଇଛି ତାହା ଉପରେ ଏକ ନଜର...
ଫିଚର ଫୋନ୍ରେ ୟୁପିଆଇ ନେଣଦେଣ୧୦ ହଜାରକୁ ବୃଦ୍ଧି
ଫିଚର ଫୋନରେ ୟୁପିଆଇ ସୁବିଧା ବ୍ୟବହାର କରୁଥିବା ୟୁଜରଙ୍କ ପାଇଁ ଖୁସି ଖବର । ନୂଆବର୍ଷରୁ ଏହି ବର୍ଗରୁ ୟୁଜରଙ୍କ ଲାଗି ୟୁପିଆଇ ପେମେଣ୍ଟ ସୀମା ୨ ଗୁଣ କରାଯାଇଛି । ଫିଚର ଫୋନରେ ୟୁପିଆଇ ବ୍ୟବହାର କରୁଥିବା ୟୁଜର ଜାନୁଆରୀ ପହିଲାରୁ ୧୦ ହଜାର ଟଙ୍କାର ଅନ୍ଲାଇନ ପେମେଣ୍ଟ କରିପାରିବେ । ଏବେ ଏହି ବର୍ଗରେ ୟୁପିଆଇରେ ପେମେଣ୍ଟ ସୀମା ୫ ହଜାର ଟଙ୍କା ରହିଛି ।
କଲିଂ ଲାଗି ଭିନ୍ନ ରିଚାର୍ଜ ପ୍ଲାନ ଲାଗୁ
ଏବେ ଟେଲିକମ କମ୍ପାନିଗୁଡିକ କଲିଂ ଲାଗି ଭିନ୍ନ ରିଚାର୍ଜ ପ୍ଲାନ ଆଣୁନାହାନ୍ତି । ତେବେ ପହିଲାରୁ ଏ କ୍ଷେତ୍ରରେ ଲାଗୁ ହେବାକୁ ଯାଉଛି ନୂଆ ନିୟମ । କମ୍ପାନିଗୁଡ଼ିକ କଲିଂ ଏବଂ ଏସ୍ଏମ୍ଏସ୍ ଲାଗି ଭିନ୍ନ ରିଚାର୍ଜ ପ୍ୟାକ୍ର ବିକଳ୍ପ ଦେବେ । ଯେଉଁ ୟୁଜରମାନେ ଡାଟା ଚାହୁଁନାହାନ୍ତି ସେମାନଙ୍କ ଲାଗି ଏଭଳି ପଦକ୍ଷେପ ସହାୟକ ହେବ । ରିଚାର୍ଜ ପ୍ୟାକ୍ଗୁଡିକ ମଧ୍ୟ ଶସ୍ତା ହେବ । ଏବେ ଯେଉଁ ଲୋକମାନେ କଲିଂ ଲାଗି ଫୋନ ବ୍ୟବହାର କରୁଛନ୍ତି ସେମାନଙ୍କୁ ମଧ୍ୟ ଡାଟା ରିଚାର୍ଜ କରିବାକୁ ପଡୁଛି ।
ଯେକୌଣସି ବ୍ୟାଙ୍କରୁ ଉଠାଇପାରିବେ ପେନ୍ଶନ ରାଶି
ଦେଶର ପେନସନଭାଗୀଙ୍କ ଲାଗି ଖୁସି ଖବର । ଏଣିକି ପେନଶନ ରାଶି ଉଠାଣ ଲାଗି ନିର୍ଦ୍ଧିଷ୍ଟ ବ୍ୟାଙ୍କ ଉପରେ ନିର୍ଭର କରିବାକୁ ପଡ଼ିବନି । ଯେକୌଣସି ବ୍ୟାଙ୍କରୁ ଉଠାଇ ହେବ ପେନଶନ ରାଶି । ନୂଆ ବର୍ଷରୁ ଲାଗୁ ହେବାକୁ ଯାଉଛି ଏହି ନିୟମ । ପେନସନଭୋଗୀଙ୍କୁ ଏଥିଲାଗି ଅତିରିକ୍ତ ଭେରିଫିକେସନ ମଧ୍ୟ କରାଇବାକୁ ପଡ଼ିବନି । ଏବେ ପେନସନଭାଗୀ ମାନେ ଯେଉଁ ବ୍ୟାଙ୍କ ଏବଂ ଶାଖାରେ ସେମାନଙ୍କ ଆକାଉଣ୍ଟ ରହିଛି ସେଠାରୁ ହିଁ ପେନସନ ରାଶି ଉଠାଇ ପାରୁଛନ୍ତି ।
ବିନା ଗ୍ୟାରେଣ୍ଟିରେ କୃଷକଙ୍କୁ ୨ ଲକ୍ଷ ଟଙ୍କାର ଋଣ
କୃଷକ ଭାଇ ଭଉଣୀଙ୍କ ପାଇଁ ଖୁସି ଖବର । ଜାନୁଆରୀରୁ କୃଷି ଋଣ କ୍ଷେତ୍ରରେ ବଡ଼ ପରିବର୍ତ୍ତନ ଲାଗୁ ହେବାକୁ ଯାଉଛି । ଏହା କୃଷକଙ୍କ ଋଣ ଚିନ୍ତାର ସମାଧାନ କରିବ ବୋଲି ଅଶା କରାଯାଉଛି । ଜାନୁଆରୀରୁ କୃଷକମାନେ ୨ ଲକ୍ଷ ଟଙ୍କା ଯାଏ ଋଣ ବିନା ଗ୍ୟାରେଣ୍ଟିରେ ନେଇପାରିବେ । ଏବେ କୃଷକଙ୍କ ଲାଗି ବିନା ଗ୍ୟାରେଣ୍ଟିରେ ଋଣ ସୀମା ୧.୬ ଲକ୍ଷ ଟଙ୍କା ରହିଛି ।
ମହଙ୍ଗା ହେବ କାର୍-ବାଣିଜ୍ୟିକ ଯାନ
ଜାନୁଆରୀରୁ ମହଙ୍ଗା ହେବାକୁ ଯାଉଛି କାର ଏବଂ ବାଣିଜ୍ୟିକ ଯାନ । ମାରୁତି, ହ୍ୟୁଣ୍ଡାଇ, ଟାଟା, କିଆ ଏବଂ ଏମ୍ଜି ଭଳି ଅନ୍ୟ କିଛି କମ୍ପାନିର ଗାଡ଼ିଗୁଡିକ ଜାନୁଆରୀ ପହିଲାରୁ ମହଙ୍ଗା ହୋଇଯିବ । ସେହିଭଳି ବାଇକ୍ ଏବଂ ବାଣିଜ୍ୟିକ ଯାନ ଦର ୨ରୁ ୩% ବଢ଼ିବ । ଏବେ କଞ୍ଚାମାଲ ଦର ବଢ଼ିଛି । ଫଳରେ କମ୍ପାନିଗୁଡିକ ଯାନ ଦରରେ ବୃଦ୍ଧି କରିବା ଲାଗି ଏଭଳି ନିଷ୍ପତ୍ତି ନେଇଛନ୍ତି ।
ପୁରୁଣା ଫୋନରେ କାମ କରିବନି ହ୍ୱାଟ୍ସଆପ୍
ହ୍ୱାଟ୍ସ ଆପ୍ ବ୍ୟବହାରକାରୀଙ୍କ ଲାଗି ବଡ଼ ଅପ୍ଡେଟ । ପୁରୁଣା ଫୋନଗୁଡିକରେ କାମ କରିବନି ହ୍ୱାଟ୍ସଆପ୍ । ଆଣ୍ଡ୍ରଏଡ୍ ୪.୪ (କିଟ୍କ୍ୟାଟ୍) ଏବଂ ଏହାର ପୂର୍ବ ଭର୍ସନ ଗୁଡିକରେ ଏହି ଲୋକପ୍ରିୟ ମେସେଜିଂ ଆପ୍ କାମ କରିବନି । ଏହି ଆପ୍ ମେଟା'ର ଏଆଇ ଫିଚର ଆଣ୍ଡ୍ରଏଡ ୪.୪ କିମ୍ବା ଅପ୍ଡେଟ ହୋଇଥିବା ଭର୍ସନରେ କାମ କରେ ।
ଏପ୍ରିଲରୁ ଲାଗୁ ହେବ ବିଏସ୍୭ ନିୟମ
ଏବେ ଚିନ୍ତା ବଢ଼ାଉଛି ପ୍ରଦୂଷଣ । ପ୍ରଦୂଷଣକୁ କମ୍ କରିବା ଲାଗି ସରକାର ବିଭିନ୍ନ କାର୍ଯ୍ୟକ୍ରମ ଗ୍ରହଣ କରୁଛନ୍ତି । ଏଭଳି ସ୍ଥିତିକୁ ନଜରରେ ରଖି ସରକାର ନୂଆ ବର୍ଷରୁ ନିୟମ କଡ଼ାକଡ଼ି କରିବେ । ଏପ୍ରିଲ ପହିଲାରୁ ଭାରତ ଷ୍ଟେଜ୍ ୭ ବା ବିଏସ୍୭ ନିୟମ ଲାଗୁ କରିବେ । କେନ୍ଦ୍ର ସରକାର ଏପ୍ରିଲ ୨୦୧୯ରୁ ଭାରତ ଷ୍ଟେଜ ୬ ବା ବିଏସ୍୬ ନିୟମ ଲାଗୁ କରିଥିଲେ ।
କୋଚିଂରେ ୧୬ ବର୍ଷରେ ଏଣ୍ଟ୍ରି କୋଚିଂ
ସେଣ୍ଟର ଗୁଡିକ ଲାଗି ଲାଗୁ ହେବାକୁ ଯାଉଛି ନୂଆ ନିୟମ । କୋଚିଂ ସେଣ୍ଟର ଗୁଡିକ ୧୬ ବର୍ଷରୁ କମ୍ ବୟସର ଶିଶୁଙ୍କୁ ଆଡ୍ମିଶନ ଦେଇ ପାରିବେ ନାହିଁ । ଏ କ୍ଷେତ୍ରରେ ଭ୍ରମାତ୍ମକ ବିଜ୍ଞାପନ ଉପରେ ମଧ୍ୟ ଲାଗିବ ରୋକ । ପୂର୍ବରୁ ଏ କ୍ଷେତ୍ରରେ ବୟସ ଏବଂ ବିଜ୍ଞାପନକୁ ନେଇ କୌଣସି ନିୟମ ଧାର୍ଯ୍ୟ ହୋଇ ନ ଥିଲା । ଏ ନେଇ ସରକାର ନୂଆ ଗାଇଡ୍ଲାଇନ ଜାରି କରିଛନ୍ତି ।
ଦେଶରେ ବିଦେଶୀ ବିଶ୍ୱବିଦ୍ୟାଳୟ ଡିଗ୍ରୀ
ଭାରତରେ ଶିକ୍ଷା ଲାଭ କରି ବିଦେଶୀ ବିଶ୍ୱବିଦ୍ୟାଳୟର ଡିଗ୍ରୀ ହାସଲ କରିହେବ । ଭାରତୀୟ ବିଶ୍ୱବିଦ୍ୟାଳୟ ଏବଂ ବିଦେଶୀ ବିଶ୍ୱବିଦ୍ୟାଳୟଗୁଡିକ ମିଳିତ ହୋଇ ଏ ନେଇ ପାଠ୍ୟକ୍ରମ ଆରମ୍ଭ କରିପାରନ୍ତି । ଏଥିଲାଗି ପାଠ ପଢ଼ା କ୍ଲାସ୍ରୁମରେ ହିଁ ହେବ । ଏବେ ବିଦେଶ ୟୁନିଭର୍ସିଟି ଲାଗି ବିଦେଶ ଯିବାକୁ ପଡୁଛି ।
