ନୂଆଦିଲ୍ଲୀ,୧୪/୧: ଟିମ୍ ଇଣ୍ଡିଆର ଷ୍ଟାର ବ୍ୟାଟର ଶ୍ରେୟାସ ଆୟର । ସେ ଆଇପିଏଲରେ ପଞ୍ଜାବ କିଙ୍ଗସର ନୂଆ ଅଧିନାୟକ ନିଯୁକ୍ତ ହୋଇଛନ୍ତି । ଏହା ସହିତ ଇଣ୍ଡିଆନ ପ୍ରିମିୟର ଲିଗରେ ନୂଆ ଇତିହାସ ରଚିଛନ୍ତି । ପ୍ରଥମ ଭାରତୀୟ ଖେଳାଳି ଭାବେ ୩ ଆଇପିଏଲ ଦଳରେ ଅଧିନାୟକତ୍ବ କରିଥିବା ଖେଳାଳି ହେବାର ଗୌରବ ଅର୍ଜନ କରିଛନ୍ତି ଶ୍ରେୟାସ ଆୟର । ଗତ ୧୨ ତାରିଖରେ ଲୋକପ୍ରିୟ ଟିଭି ସୋ’ ବିଗ୍ ବସ୍-୧୮ର ଏକ ସ୍ୱତନ୍ତ୍ର ଏପିସୋଡ୍ରେ ହୋଷ୍ଟ ଅଭିନେତା ସଲମାନ୍ ଖାନ୍ ଶ୍ରେୟାସ ଆୟର ପଞ୍ଜାବ କିଙ୍ଗସରେ କ୍ୟାପ୍ଟେନ ହୋଇଥିବା ନେଇ ଆନୁଷ୍ଠାନିକ ଭାବେ ଘୋଷଣା କରିଥିଲେ ।
ଶ୍ରେୟସ ଆୟର ୨୦୧୫ରେ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଆଇପିଏଲ୍ରେ ପଦାର୍ପଣ କରିଥିଲେ । ୨୦୧୮ରେ ସେ କ୍ୟାପିଟାଲ୍ସ ଦଳର ଅଧିନାୟକ ନିଯୁକ୍ତ ହୋଇଥିଲେ । ଆୟରଙ୍କ ନେତୃତ୍ୱରେ ଦିଲ୍ଲୀ କ୍ୟାପିଟାଲ୍ସ ୨୦୨୦ ସିଜନରେ ଫାଇନାଲ୍ ଖେଳି ରନର୍ସ ଅପ୍ ହୋଇଥିଲା । ସେ ୩ଟି ସଂସ୍କରଣରେ ଦଳକୁ ପ୍ଲେ-ଅଫ୍ରେ ପହଞ୍ଚାଇବାରେ ସଫଳ ହୋଇଥିଲେ । ଆଇପିଏଲ ୨୦୨୪ରେ ତାଙ୍କ ନେତୃତ୍ବରେ କୋଲକାତା ନାଇଟ ରାଇଡର୍ସ ଚମ୍ପିଅନ ହୋଇଥିଲା । ଏକମାତ୍ର ଖେଳାଳି ଭାବେ ଶ୍ରେୟାସ ଆୟର ଭିନ୍ନ ଦଳର ଅଧିନାୟକ ଭାବେ ଫାଇନାଲ ଖେଳିଛନ୍ତି । ଆୟରଙ୍କ ପୂର୍ବରୁ ମାତ୍ର ୨ ଜଣ ଖେଳାଳି ୩ଟି ଭିନ୍ନ ଦଳର ନେତୃତ୍ବ ନେଇଛନ୍ତି । ମାତ୍ର ଭାରତୀୟ ନୁହଁନ୍ତି । ସେମାନେ ହେଲେ ଶ୍ରୀଲଙ୍କାର ଜୟବର୍ଦ୍ଧନ ଓ ଅଷ୍ଟ୍ରେଲିଆର ଷ୍ଟିଭେନ ସ୍ମିଥ । ୧୭ତମ ଖେଳାଳି ଭାବେ ପଞ୍ଚାବ କିଙ୍ଗସରେ ନେତୃତ୍ବ ନେଇଛନ୍ତି ଶ୍ରେୟାସ ଆୟର । ସେ ୧୨ତମ ଫୁଲ ଟାଇମ ଅଧିନାୟକ ହୋଇଛନ୍ତି । ଘରୋଇ କ୍ରିକେଟ୍ ସିଜନରେ ଆୟରଙ୍କ ନେତୃତ୍ୱରେ ମୁମ୍ବାଇ ସୟଦ ମୁସ୍ତାକ ଅଲି ଟ୍ରଫି ଚାମ୍ପିଅନ୍ ହୋଇଥିଲା । ସେ ଗୋଟିଏ ଶତକ ସହ ମୋଟ ୩୪୫ରନ୍ ସଂଗ୍ରହ କରିଥିଲେ ।
ଏହା ବି ପଢନ୍ତୁ...ଆୟର ପଞ୍ଜାବ କିଙ୍ଗ୍ସର ନୂଆ ଅଧିନାୟକ, ବିଗ୍ ବସ୍ରେ ଘୋଷଣା କଲେ ଭାଇଜାନ୍
https://www.prameya.com/punjab-kings-new-captain-shreyas--say-salman-khan
ଆଇପିଏଲ୍ ମେଗା ନିଲାମରେ ପଞ୍ଜାବ କିଙ୍ଗ୍ସ ୨୬.୭୫ କୋଟି ଟଙ୍କାରେ ଆୟରଙ୍କୁ କିଣିଥିଲା । ସେ ଆଇପିଏଲ ଇତିହାସର ଦ୍ବିତୀୟ ଦାମୀ ଖେଳାଳି ସାବ୍ୟସ୍ତ ହୋଇଛନ୍ତି । ଲକ୍ଷ୍ନୌ ସୁପରଜାଏଣ୍ଟ୍ସ ୨୭କୋଟି ଟଙ୍କାରେ ରିଷଭ ପନ୍ତଙ୍କୁ କିଣିଥିଲା । ପନ୍ତ ଆଇପିଏଲ୍ର ସବୁଠୁ ମହଙ୍ଗା ଖେଳାଳି ଭାବେ ରେକର୍ଡ଼ ସ୍ଥାପନ କରିଛନ୍ତି । ନିଲାମରେ ପଞ୍ଜାବ କିଙ୍ଗ୍ସ ଆୟରଙ୍କୁ କିଣିବା ପରେ ସେ ଦଳର ନେତୃତ୍ୱ ନେବା ଏକପ୍ରକାର ସ୍ପଷ୍ଟ ହୋଇଯାଇଥିଲା । କେବଳ ଆନୁଷ୍ଠାନିକ ଭାବେ ଘୋଷଣା ବାକି ରହିଥିଲା ।
