ନୂଆଦିଲ୍ଲୀ, ୧୯/୧ : କ୍ରିକେଟ ମୈଦାନରୁ ନେଇ ନିଜ ପର୍ସନାଲ ଲାଇଫ ପର୍ଯ୍ୟନ୍ତ ବହୁ ବିବଦା ଘେରରେ ରହୁଥିବା ବାଂଗଲାଦେଶୀ କ୍ରିକେଟର ଶାକିବ ଅଲ ହସନ ଏବେ ନୂଆ କେଶରେ ଫସି ଯାଇଛନ୍ତି । ପ୍ରକାଶ ଯେ, ଏହି ଅନୁଭବୀ ଅଲରାଉଣ୍ଡରଙ୍କ ବିପକ୍ଷରେ ଢାକାର ଏକ ଅଦାଲତ ଆରେଷ୍ଟ ଓ୍ବାରେଣ୍ଟ ଜାରି କରିଥିଲେ । କ୍ରିକବଜର ଏକ ରିପୋର୍ଟ ଅନୁସାରେ ଚେକ୍ ବାଉନ୍ସ ମାମଲାରେ ତାଙ୍କ ବିପକ୍ଷରେ ଏହି ଲିଗାଲ ଆକ୍ସନ ନିଆଯାଇଛି । ଆସନ୍ତୁ ଜାଣିବା ପୂରା ମାମଲା କ’ଣ ରହିଛି...
କ୍ରିକବଜର ରିପୋର୍ଟ ଅନୁସାରେ , ଶାକିବ ଅଲ ହସନଙ୍କ ବିପକ୍ଷରେ ଆଇଏଫଆଇସି ବ୍ୟାଙ୍କ ସହ ଯୋଡ଼ି ହୋଇଥିବା ଚେକ୍ ବାଉନ୍ସ ମାମଲରେ ଆରେଷ୍ଟ ଓ୍ବାରେଣ୍ଟ ଜାରି କରାଯାଇଛି । ପୂର୍ବତନ ଅବାମୀ ଲିଗ୍ ସାଂସଦ ଶାକିବ ସେବେଠାରୁ ବିଦେଶରେ ରହୁଛନ୍ତି । ଯେବେଠାରୁ ପୂର୍ବତନ ପ୍ରଧାନମନ୍ତ୍ରୀ ଶେଖ ହସୀନା ଛାତ୍ର ଆନ୍ଦୋଳନ ପରେ ଦେଶ ଛାଡ଼ି ପଳାଇଯାଇଥିଲେ । ଢାକାରେ ଅତିରିକ୍ତ ମୁଖ୍ୟ ମେଟ୍ରୋପୋଲିଟନ ମାଜିଷ୍ଟେ୍ରଟ ଜିୟଦୁର ରହମାନ ଦ୍ବାରା ଏହି ଆରେଷ୍ଟ ଓ୍ବାରେଣ୍ଟ ଜାରି କରାଯାଇଛି ।
ପ୍ରକାଶ ଯେ, ଶାକିବଙ୍କ ନାମରେ ଗତବର୍ଷ ୧୫ଡିସେମ୍ବରରେ ଚେକ୍ ଠକେଇ ମାମଲା ଆସିଥିଲା । ସେ ୧୮ଡିସେମ୍ବରରେ ପ୍ରାରମ୍ଭିକ ଶୁଣାଣି ସମୟରେ ୧୯ଜାନୁଆରୀ ପୂର୍ବରୁ ଅଦାଲତରେ ହାଜର ହେବା ଲାଗି କୁହାଯାଇଥିଲା । ଏହି ମାମଲା ଆଇଏଫଆଇସି ବ୍ୟାଙ୍କର ରିଲେଶନଶିପ ଅଫିସର ଶାହିବୁର ରହମାନ ବ୍ୟାଙ୍କ ତରଫରୁ ଦାୟର କରିଥିଲେ।
