ବରଗଡ଼,୧୨/୦୯: ବରଗଡ଼ ଜିଲ୍ଲାରେ ବେକାବୁ ହେଉଛି ସ୍କ୍ରବ୍ ଟାଇଫସ୍ । ଏହି ମାରାତ୍ମକ ବ୍ୟାକ୍ଟେରିଆଜନିତ ସଂକ୍ରମଣ ପୁଣି ୨ ମୁଣ୍ଡ ନେଇଛି । ଗତ ତିନିଦିନରେ ୪ଜଣ ଏଥିରେ ଆଖି ବୁଜିଲେଣି । ଆହୁରି ୨୨ ଜଣ ସଂକ୍ରମିତ ଚିକିତ୍ସାଧୀନ ଅଛନ୍ତି । ଲଗାତାର ଆକ୍ରାନ୍ତଙ୍କ ମୃତ୍ୟୁ ସମଗ୍ର ଜିଲ୍ଲାରେ ଭୟ ଓ ଆତଙ୍କ ବାତାବରଣ ସୃଷ୍ଟି କରିଛି ।
ଗତ ସୋମବାର ଅମ୍ବାଭୋନା ବ୍ଲକ ବୁଙ୍ଗାପାଲି ଗାଁର ଜଣେ ୪୨ ବର୍ଷୀୟା ଚାଷୀ ସ୍କ୍ରବ୍ ଟାଇଫସ୍ ଶିକାର ହୋଇଥିଲେ । ମଙ୍ଗଳବାର ପଦ୍ମପୁରର ଜଣେ ୭୦ ବର୍ଷୀୟା ମହିଳା ଏବଂ ବୁଧବାର ପଦ୍ମପୁରର ୧୬ ବର୍ଷୀୟା ନାବାଳିକାଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ସେହିଭଳି ଭେଡେନ ବ୍ଲକର ବଗର୍ତ୍ତିପାଲିର ଜଣେ ମହିଳାଙ୍କ ଗତ ୧ ତାରିଖରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ତିନିଦିନରେ ୪ଜଣଙ୍କ ମୃତ୍ୟୁ ଭୟ ବଢ଼ାଇଛି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଉପରୋକ୍ତ ଚାରି ମୃତକଙ୍କ ସମ୍ପର୍କରେ ବରଗଡ଼ ଜିଲ୍ଲା ସ୍ୱାସ୍ଥ୍ୟ ବିଭାଗ ପାଖରେ କୌଣସି ନିର୍ଦ୍ଦିଷ୍ଟ ତଥ୍ୟ ନ ଥିଲା । ସମସ୍ତେ ବରଗଡ଼ର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିବାରୁ ଜିଲ୍ଲା ସ୍ୱାସ୍ଥ୍ୟ ବିଭାଗର କାର୍ଯ୍ୟଧାରାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା । ବାରମ୍ବାର ପଚରାଯିବା ପରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ସ୍କ୍ରବ୍ ଟାଇଫସ୍ଜନିତ ମୃତ୍ୟୁକୁ ସ୍ୱୀକାର କରିଛନ୍ତି ।
ବୁଧବାର ଅପରାହ୍ନରେ ଜିଲ୍ଲା ସ୍ୱାସ୍ଥ୍ୟ ଅଧିକାରୀ ଡ. ନିରୂପମା ଷଡ଼ଙ୍ଗୀ ଓ ଏଡିପିଏଚ୍ଓ ଡ. ସୁଶାନ୍ତ କର ସ୍କ୍ରବ୍ ଟାଇଫସ୍ ସମ୍ପର୍କରେ ତଥ୍ୟ ରଖିଥିଲେ । ସ୍କ୍ରବ୍ ଟାଇଫସ୍ ସନ୍ଦେହରେ ଗତ ଜାନୁୟାରୀରୁ ଅଦ୍ୟାବଧି ୪୧୯ ଜଣଙ୍କ ରକ୍ତ ନମୁନା ପରୀକ୍ଷା କରାଯାଇଥିଲା । ଏ ପର୍ଯ୍ୟନ୍ତ ୧୦ ଜଣ ପଜିଟିଭ୍ ଚିହ୍ନଟ ହୋଇଛନ୍ତି । ତନ୍ମଧ୍ୟରୁ ୪ ଜଣଙ୍କ ମୃତ୍ୟୁ ହୋଇଛି । ଏବେ ଘରୋଇ ହସ୍ପିଟାଲରେ ୧୨ ଏବଂ ସରକାରୀ ହସ୍ପିଟାଲରେ ୧୦ ଜଣ ଚିକିତ୍ସାଧୀନ ଅଛନ୍ତି । ସଂକ୍ରମଣର ଭୟାବହତାକୁ ଦୃଷ୍ଟିରେ ରଖି ଜିଲ୍ଲାର ସମସ୍ତ ଘରୋଇ ହସ୍ପିଟାଲକୁ ରିପୋର୍ଟ ମାଗିଛି ଜିଲ୍ଲା ସ୍ୱାସ୍ଥ୍ୟ ବିଭାଗ । ଲକ୍ଷଣଯୁକ୍ତ ରୋଗୀ ଥିଲେ ତୁରନ୍ତ ଅବଗତ କରାଇବା ପାଇଁ ନିର୍ଦ୍ଦେଶ ଦିଆଯାଇଛି । ଯଦି କୌଣସି ବ୍ୟକ୍ତିଙ୍କ ଶରୀରରେ ସ୍କ୍ରବ୍ ଟାଇଫସ୍ ଲକ୍ଷଣ ଦେଖାଗଲେ ବିଳମ୍ବ ନ କରି ଡାକ୍ତରୀ ପରାମର୍ଶ କରିବା ପାଇଁ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ନିରୁପମା ଷଡ଼ଙ୍ଗୀ ପରାମର୍ଶ ଦେଇଛନ୍ତି । ଏଥିସହ ରୋଗୀଙ୍କଠାରୁ ରକ୍ତ ନମୁନା ସଂଗ୍ରହ କରି ନିୟମ ଅନୁସାରେ ଚିକିତ୍ସା କରିବାକୁ ଜିଲ୍ଲାର ଡାକ୍ତରମାନଙ୍କୁ ଆହ୍ୱାନ ଦେଇଛନ୍ତି ।
ଅନୁଧ୍ୟାନରୁ ଜଣାପଡ଼ିଛି ସ୍କ୍ରବ୍ ଟାଇଫସ୍ରେ ମୃତ ଓ ସଂକ୍ରମିତଙ୍କ ମଧ୍ୟରୁ ଅଧିକାଂଶ ବରଗଡ଼ ଓ ପଦ୍ମପୁର ଉପଖଣ୍ଡର । ପଦ୍ମପୁର, ପାଇକମାଳ, ଗାଇସିଲେଟ୍, ଝାରବନ୍ଧ, ବିଜେପୁର, ଭେଡେନ୍ ଓ ଅମ୍ବାଭୋନା ବ୍ଲକରେ ସଂକ୍ରମଣ ବଢ଼ିବାରେ ଲାଗିଛି । ହେଲେ ସ୍ୱାସ୍ଥ୍ୟ ବିଭାଗ ତରଫରୁ ଏଯାଏ କୌଣସି ସତର୍କତାମୂଳକ ପଦକ୍ଷେପ କିମ୍ବା ସାମୂହିକ ନମୁନା ପରୀକ୍ଷଣ ଆରମ୍ଭ ହୋଇନାହିଁ । ଏଭଳି ଅବହେଳାକୁ ନେଇ ବୁଦ୍ଧିଜୀବୀ ଓ ଚାଷୀ ସଙ୍ଗଠନ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଫସଲ ଅମଳ ସମୟରେ ସ୍କ୍ରବ୍ ଟାଇଫସ୍ ସଂକ୍ରମଣ ଚାଷୀଙ୍କ ନିଦ ହଜାଇ ଦେଇଛି । ସରକାରୀସ୍ତରରେ ବ୍ୟାପକ ସଚେତନତା ସୃଷ୍ଟି, ଆକ୍ରାନ୍ତଙ୍କ ଉତ୍ତମ ଚିକିତ୍ସା ବ୍ୟବସ୍ଥା ସହ ମୃତକଙ୍କ ପରିବାରକୁ କ୍ଷତିପୂରଣ ପ୍ରଦାନ କରିବାକୁ ଚାଷୀ ସଙ୍ଗଠନ ପକ୍ଷରୁ ଦାବି କରାଯାଇଛି ।
ସ୍କ୍ରବ୍ ଟାଇଫସ୍ କ’ଣ
ସ୍କ୍ରବ୍ ଟାଇଫସ୍ ‘ଓରିଏଣ୍ଟା ସୁସୁଗାମୁସି’ ନାମକ ବ୍ୟାକ୍ଟେରିଆ ଜନିତ ସଂକ୍ରମଣ । ‘ଚିଗର୍ଗ’ ନାମକ କୀଟ ଏହାର ବାହକ । ଏହି କୀଟ ସାଧାରଣତଃ ସନ୍ତସନ୍ତିଆ ଜମି, ବୁଦୁବୁଦିଆ ସ୍ଥାନ, ଚାଷଜମି, ଫୁଲବଗିଚା ଆଦି ଅଞ୍ଚଳରେ ଥାଆନ୍ତି । କୀଟ କାମୁଡ଼ିବା ପରେ ଶରୀରର ନିର୍ଦ୍ଦିଷ୍ଟ ସ୍ଥାନରେ ଘା’ ଭଳି କ୍ଷତ ହୋଇଯାଏ । ସଂକ୍ରମିତଙ୍କୁ ପ୍ରବଳ ଥଣ୍ଡ ସହ ଜ୍ୱର ହୁଏ । ମୁଣ୍ଡ ବ୍ୟଥା, ମାଂସପେଶୀ, ଫୁସ୍ଫୁସ୍ ଭଳି ଆଭ୍ୟନ୍ତରୀଣ ଅଙ୍ଗରେ ଅସହ୍ୟ ଯନ୍ତ୍ରଣା ହୁଏ । ରୋଗୀ ବେଳେବେଳେ ମାନସିକ ସନ୍ତୁଳନ ହରାଇବସେ । ରୋଗ ଚିହ୍ନଟରେ ବିଳମ୍ବ ହେଲେ ଜୀବନ ଚାଲିଯାଏ । ସ୍କ୍ରବ୍ ଟାଇଫସ୍ ଆରୋଗ୍ୟ ସାଧ୍ୟ । ହେଲେ ସଂକ୍ରମଣ ବଢ଼ିବା ପୂର୍ବରୁ ରକ୍ତ ନମୁନା ପରୀକ୍ଷାରୁ ଏହା ସ୍ପଷ୍ଟ ହେବା ଜରୁରୀ । ଡାକ୍ତରଙ୍କ ଠିକ୍ ପରାମର୍ଶରେ ଔଷଧ ସେବନ କଲେ ରୋଗୀ ସଂକ୍ରମଣରୁ ଆରୋଗ୍ୟ ଲାଭ କରିଥାଏ ।
