ଉମରକୋଟ,୧୯/୧୦: ଶ୍ରେଣୀଗୃହ ଚଟାଣ ଉପରେ ନିଘୋଡ଼ ନିଦରେ ଶୋଇ ପଡ଼ିଲେ ପ୍ରଧାନଶିକ୍ଷକ ସାନୁ ଭତ୍ରା । ନବରଙ୍ଗପୁର ଜିଲ୍ଲା ଝରିଗାଁ ବ୍ଳକ ଫୁଫୁଗାଁ ପଞ୍ଚାୟତର ଡେଙ୍ଗାଗୁଡ଼ା ସରକାରୀ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି ଏଭଳି ଅଭାବନୀୟ ଦୃଶ୍ୟ ।
ସୂଚନା ମୁତାବକ, ସରିଲା ଦଶହରା ପୂଜା । ଛୁଟି ପରେ ଖୋଲିଲା ସ୍କୁଲ୍ । ଜିଲ୍ଲାଭିତିକ ଶିକ୍ଷକ ନିଯୁକ୍ତି ଦାବିରେ ମିଳିତ କାର୍ଯ୍ୟାନୁଷ୍ଠାନ କମିଟିର ଆହ୍ଵାନ କ୍ରମେ ଶନିବାର ବ୍ଳକର ଅଧିକାଂଶ ସ୍କୁଲକୁ ଛାତ୍ରଛାତ୍ରୀଙ୍କୁ ପଠାଇ ନଥିଲେ ଅଭିଭାବକ । ଏହି ସ୍କୁଲକୁ ମଧ୍ୟ କୌଣସି ପିଲା ଆସିନଥିଲେ । ଏଭଳି ସୁଯୋଗକୁ ହାତଛଡ଼ା କରିନଥିଲେ ସ୍କୁଲ କର୍ତ୍ତୃପକ୍ଷ । ଶ୍ରେଣୀଗୃହର ଚଟାଣ ଉପରେ ଦରି ପକାଇ ନିଘୋଡ଼ ନିଦରେ ଶୋଇ ଯାଇଥିଲେ ପ୍ରଧାନ ଶିକ୍ଷକ । ଏମିତିକି ଶିକ୍ଷକ ଜଣକ ବିନା ସ୍କୁଲ ପୋଷାକରେ ଆସିଥିଲେ । ତାଙ୍କୁ ପଚରାଯିବାରୁ ପିନ୍ଧିଥିବା ପୋଷାକକୁ ଦେଖାଇ ଏହା ହିଁ ତାଙ୍କ ୟୁନିଫର୍ମ ବୋଲି କହିଥିଲେ । ସ୍କୁଲ ସମୟରେ ଶ୍ରେଣୀଗୃହରେ କାହିଁକି ଶୋଇଛନ୍ତି ବୋଲି ପଚରା ଯିବାରୁ ପିଲା କେହି ନଥୁବାରୁ ୟୁଟ୍ୟୁବ ଦେଖୁ ଦେଖୁ ଶୋଇପଡ଼ିଥିଲେ ବୋଲି କହିଥିଲେ ପ୍ରଧାନ ଶିକ୍ଷକ । ଜଣେ ଉଚ୍ଚ ବେତନଧାରୀ ପ୍ରଧାନ ଶିକ୍ଷକଙ୍କ ଏଭଳି କାର୍ଯ୍ୟକୁ ବିଭିନ୍ନ ମହଲରେ ନିନ୍ଦା କରାଯାଇଛି।